നമ്മ മെട്രോയുടെ നിരക്ക് നിര്ണയ റിപ്പോര്ട്ട് വീണ്ടും വിവാദത്തില്. ബെംഗളൂരു മെട്രോ റെയില് കോര്പറേഷന് ലിമിറ്റഡ് (ബിഎംആര്സിഎല്) പുറത്തിറക്കിയ, നിരക്ക് നിര്ണയ സമിതി (എഫ്.എഫ്.സി) റിപ്പോര്ട്ടില് നിരവധി പൊരുത്തക്കേടുകളുണ്ടെന്ന് ആരോപിച്ച് ബെംഗളൂരു സൗത്ത് എംപി തേജസ്വി സൂര്യ രംഗത്തെത്തി.നിരക്ക് വര്ധനയിലെ വൈരുദ്ധ്യങ്ങള് തിരുത്താന് നടപടി വേണമെന്നും ബിജെപി എംപി ആവശ്യപ്പെട്ടു. ഇക്കാര്യം ചൂണ്ടിക്കാട്ടി ബിഎംആര്സിഎല് മാനേജിങ് ഡയറക്ടര്ക്ക് എംപി കത്ത് നല്കി.
ഫെബ്രുവരി 9-ന് ബിഎംആര്സിഎല് മെട്രോ നിരക്കില് 110%-ല് അധികം വര്ധനവ് വരുത്തിയിരുന്നു.പിന്നീട് പൊതുജനങ്ങളില് നിന്നുള്ള പ്രതികരണത്തെ തുടര്ന്ന് ഇത് 71% ആയി കുറച്ചു. ഈ വര്ധന നമ്മ മെട്രോയെ ഇന്ത്യയിലെ ഏറ്റവും ചിലവേറിയ മെട്രോ സംവിധാനങ്ങളിലൊന്നായി മാറ്റുകയും ചെയ്തിരുന്നു.’എഫ്.എഫ്.സി ശുപാര്ശ ചെയ്തതിന് വിരുദ്ധമായി ബിഎംആര്സിഎല് 105%ത്തിന്റെ യുക്തിരഹിതമായ നിരക്ക് വര്ധനയാണ് നടപ്പാക്കിയത്. എഫ്.എഫ്.സി നല്കിയ ഫോര്മുല ശരിയായി ഉപയോഗിച്ചാല് ഏകദേശം 50-55% മാത്രമായിരിക്കും യഥാര്ഥ നിരക്ക് വര്ധനവ്’ – തേജസ്വി സൂര്യ പറഞ്ഞു.
റിപ്പോര്ട്ടില് മെയിന്റനന്സ്, അഡ്മിനിസ്ട്രേറ്റീവ് ചെലവുകളില് 366% വര്ധന കാണിക്കുന്നുണ്ട്. എന്നാല് യഥാര്ഥ വര്ധനവ് 118.5% മാത്രമായിരിക്കണമെന്നും അദ്ദേഹം ചൂണ്ടിക്കാട്ടി. ജനങ്ങള്ക്കുമേല് അധികഭാരം അടിച്ചേല്പ്പിക്കുന്നതാണ് ബിഎംആര്സിഎല്ലിന്റെയും എഫ്.എഫ്.സിയുടെയും നടപടിയെന്ന് തേജസ്വി സൂര്യ വിമര്ശിച്ചു.ന്യായമായതും താങ്ങാനാവുന്നതുമായ നിരക്ക് ഘടന ഉറപ്പാക്കുന്നതില് വന്ന വീഴ്ച യാത്രക്കാര്ക്ക് ബുദ്ധിമുട്ടുണ്ടാക്കുന്നതാണ്. തിരക്കേറിയ റൂട്ടുകളില് 82% വരെ നിരക്ക് വര്ധനയുണ്ടായി. എന്നാല് ഡല്ഹി മെട്രോ ഓഗസ്റ്റില് നടപ്പാക്കിയ നിരക്ക് വര്ധന ശരാശരി 7% മാത്രമായിരുന്നുവെന്നും എംപി ചൂണ്ടിക്കാട്ടുന്നു. അതേസമയം വിഷയത്തില് ബിഎംആര്സിഎല് ഇതുവരെ പ്രതികരിച്ചിട്ടില്ല
