ബെംഗളൂരു: ബെംഗളൂരു-മൈസൂരു അക്സസ് കണ്ട്രോള്ഡ് ഹൈവേയില് മള്ട്ടി-ലെയ്ൻ ഫ്രീ ഫ്ലോ (എം എല് എഫ് എഫ്) ടോളിങ് സംവിധാനം നടപ്പാക്കാനുള്ള പദ്ധതി ഉപേക്ഷിച്ച് ദേശീയപാത അതോറിറ്റി ഓഫ് ഇന്ത്യ (എൻഎച്ച്എഐ).പകരം വാഹനങ്ങള് സഞ്ചരിക്കുന്ന ദൂരത്തിന് അനുസരിച്ച് ടോള് ഈടാക്കുന്ന ക്ലോസ്ഡ് ടോളിങ് സംവിധാനം നടപ്പാക്കാനാണ് തീരുമാനം.117 കിലോമീറ്റർ ദൈർഘ്യമുള്ള ബെംഗളൂരു-മൈസൂരു ഹൈവേയില് നിലവില് മുഴുവൻ പാതയ്ക്കും നിശ്ചിത ടോള് നിരക്കാണ് ഈടാക്കുന്നത്. പുതിയ സംവിധാനത്തില് ഹൈവേയിലെ വിവിധ പ്രവേശന, പുറത്തുകടക്കല് പോയിന്റുകള് അടിസ്ഥാനമാക്കി വാഹനങ്ങള് ഉപയോഗിക്കുന്ന ഭാഗത്തിന് മാത്രമായിരിക്കും ടോള് ഈടാക്കുക. പദ്ധതിയുടെ സാങ്കേതിക വശങ്ങള് അടുത്തിടെ വിലയിരുത്തിയ ശേഷമാണ് തീരുമാനം.
എംഎല്എഫ്എഫ് ടോളിങ് സംവിധാനം പരീക്ഷണാടിസ്ഥാനത്തില് നടപ്പാക്കാൻ എൻഎച്ച്എഐ നേരത്തെ തിരഞ്ഞെടുത്ത പാതകളിലൊന്നായിരുന്നു ബെംഗളൂരു-മൈസൂരു ഹൈവേ. ടോള് പ്ലാസകള് ഒഴിവാക്കി ഗതാഗതം കൂടുതല് സുഗമമാക്കുക എന്ന ലക്ഷ്യത്തോടെയായിരുന്നു പദ്ധതി. ഇതിനായി സാങ്കേതികവിദ്യ നടപ്പാക്കുന്നതിനുള്ള ടെൻഡറും എൻഎച്ച്എഐ ക്ഷണിച്ചിരുന്നു.എന്നാല് ദൂരാധിഷ്ഠിത ടോളിങ് സംവിധാനം നടപ്പാക്കാൻ തീരുമാനിച്ചതോടെ എംഎല്എഫ്എഫ് പദ്ധതി തല്ക്കാലം മാറ്റിവെച്ചതായി എൻഎച്ച്എഐ ഉദ്യോഗസ്ഥർ അറിയിച്ചു.”എംഎല്എഫ്എഫ് ടോളിങ് സംവിധാനം നടപ്പാക്കുന്നതിനുള്ള നടപടികള് ആരംഭിക്കുകയും ടെൻഡർ ക്ഷണിക്കുകയും ചെയ്തിരുന്നു. എന്നാല് ബെംഗളൂരു-മൈസൂരു ഹൈവേയില് ക്ലോസ്ഡ്, ദൂരാധിഷ്ഠിത ടോളിങ് സംവിധാനവുമായി മുന്നോട്ടുപോകാനാണ് പിന്നീട് തീരുമാനിച്ചത്. രണ്ട് സംവിധാനങ്ങളും ഒരേസമയം നടപ്പാക്കാൻ കഴിയില്ല. അതിനാലാണ് എംഎല്എഫ്എഫ് പദ്ധതി തല്ക്കാലം നിർത്തിവെച്ചത്. ദൂരാധിഷ്ഠിത ടോളിങ് സംവിധാനം പ്രവർത്തനം ആരംഭിച്ച ശേഷം ഭാവിയില് എംഎല്എഫ്എഫ് നടപ്പാക്കുന്നതിന്റെ സാധ്യത വീണ്ടും പരിശോധിക്കാം,” എൻഎച്ച്എഐയിലെ ഒരു മുതിർന്ന ഉദ്യോഗസ്ഥനെ ഉദ്ധരിച്ച് ദ ഹിന്ദു റിപ്പോർട്ട് ചെയ്തു.എന്താണ് എംഎല്എഫ്എഫ് ടോളിങ്?എംഎല്എഫ്എഫ് സംവിധാനത്തില് പരമ്പരാഗത ടോള് പ്ലാസകള്ക്ക് പകരം ഹൈവേയ്ക്ക് മുകളിലായി സ്ഥാപിക്കുന്ന ഗാൻട്രികളാണ് ഉപയോഗിക്കുക.
ആർഎഫ്ഐഡി ഫാസ്റ്റാഗ് റീഡറുകള്, ഓട്ടോമേറ്റഡ് നമ്പർ പ്ലേറ്റ് റെക്കഗ്നിഷൻ (ANPR) ക്യാമറകള്, സാറ്റലൈറ്റ് അധിഷ്ഠിത വാഹന ട്രാക്കിങ് സംവിധാനങ്ങള് എന്നിവയുടെ സഹായത്തോടെയാണ് ടോള് പിരിവ് നടത്തുന്നത്.വാഹനങ്ങള് ടോള് പ്ലാസയില് നിർത്തുകയോ വേഗം കുറയ്ക്കുകയോ ചെയ്യാതെ സഞ്ചരിക്കുന്നതിനിടയില് തന്നെ ടോള് തുക സ്വമേധയാ ഈടാക്കാൻ ഈ സംവിധാനത്തിന് സാധിക്കും. ഫാസ്റ്റാഗുകളും വാഹന നമ്പർ പ്ലേറ്റുകളും സ്വമേധയാ തിരിച്ചറിഞ്ഞാണ് ടോള് ഇടപാടുകള് പൂർത്തിയാക്കുക.ടോള് പ്ലാസകളിലെ ഗതാഗതക്കുരുക്ക് കുറയ്ക്കാനും യാത്രാസമയം ലാഭിക്കാനും ഇന്ധന ഉപഭോഗം കുറയ്ക്കാനും വാഹനങ്ങളില് നിന്നുള്ള മലിനീകരണം കുറയ്ക്കാനും ഈ സംവിധാനത്തിന് കഴിയുമെന്നാണ് എൻഎച്ച്എഐയുടെ വിലയിരുത്തല്.ഇന്ത്യയിലെ ആദ്യ എംഎല്എഫ്എഫ് ടോളിങ് സംവിധാനം 2025 ഓഗസ്റ്റില് ഗുജറാത്തിലെ ദേശീയപാത 48-ലുള്ള ചോര്യാസി ഫീ പ്ലാസയില് നടപ്പാക്കിയിരുന്നു.
പുതിയ ടോളിങ് സംവിധാനം എങ്ങനെ?ദൂരാധിഷ്ഠിത ടോളിങ് സംവിധാനം നിലവില് വരുന്നതോടെ ഹൈവേ ഉപയോഗിക്കുന്നവർ സഞ്ചരിച്ച ദൂരത്തിന് മാത്രം പണം നല്കിയാല് മതിയാകും. ഹൈവേയില് എവിടെ പ്രവേശിച്ചുവെന്നും എവിടെയാണ് പുറത്തുകടന്നതെന്നും അടിസ്ഥാനമാക്കിയായിരിക്കും ടോള് കണക്കാക്കുക.പ്രത്യേകിച്ച് കുറഞ്ഞ ദൂരം മാത്രം സഞ്ചരിക്കുന്നവർക്ക് പുതിയ സംവിധാനം ഗുണകരമാകുമെന്നാണ് എൻഎച്ച്എഐയുടെ വിലയിരുത്തല്. ഹൈവേയുടെ ഒരു ഭാഗം മാത്രം ഉപയോഗിക്കുന്ന യാത്രക്കാർക്കും നിലവില് മുഴുവൻ ടോള് നല്കേണ്ടിവരുന്ന സാഹചര്യം ഒഴിവാക്കുകയാണ് ലക്ഷ്യം. ഉപയോഗിക്കുന്ന റോഡിന്റെ ഭാഗത്തിന് മാത്രം ടോള് ഈടാക്കുന്ന രീതിയിലൂടെ കൂടുതല് ന്യായമായ ഉപയോക്തൃ-പേയ് സംവിധാനം ഉറപ്പാക്കാനാകുമെന്നും അധികൃതർ വ്യക്തമാക്കി.
