തുമകുരു: കർണാടകയിലെ മാണ്ഡ്യ ജില്ലയിലെ ഒരു ക്ഷേത്രത്തിലുണ്ടായ തർക്കത്തിനിടയില് തന്നെ അസഭ്യം പറയുകയും മുഖത്ത് അടിക്കുകയും ചെയ്തുവെന്ന വനിതാ സബ് ഇൻസ്പെക്ടറുടെ പരാതിയെത്തുടർന്ന് ബിജെപി എംഎല്എ ബി സുരേഷ് ഗൗഡയുടെ മകള് ഐശ്വര്യക്കെതിരെ കേസ് രജിസ്റ്റർ ചെയ്തു.ആഗസ്റ്റ് 12-ന് നടന്ന സംഭവത്തിന്റെ സിസിടിവി ദൃശ്യങ്ങള് സോഷ്യല് മീഡിയയില് വൈറലായി.ഭീമ അമാവാസിയോടനുബന്ധിച്ച് പ്രത്യേക സുരക്ഷാ ഡ്യൂട്ടിക്കായി നിയോഗിക്കപ്പെട്ട എസ്ഐ സവിത ഡ്യൂട്ടിയിലുണ്ടായിരുന്ന ആറാതി ഉക്കഡ ക്ഷേത്രത്തിലാണ് സംഭവം നടന്നത്.
ദർശനം ലഭിക്കാൻ വൈകിയതില് ഐശ്വര്യ എതിർപ്പ് പ്രകടിപ്പിച്ചതിനെത്തുടർന്നാണ് വാക്കേറ്റമുണ്ടായതെന്ന് പരാതിയില് പറയുന്നു. ചെറിയൊരു വാക്കുതർക്കത്തിന് ശേഷം ഐശ്വര്യ വനിതാ പൊലീസ് ഉദ്യോഗസ്ഥന്റെ തലയില് അടിക്കുന്നതായി സിസിടിവി ദൃശ്യങ്ങളില് കാണാം. തുടർന്ന് ഉദ്യോഗസ്ഥയും ഐശ്വര്യയുടെ തോളില് അടിക്കുന്നതും, സമീപത്തുണ്ടായിരുന്ന മറ്റൊരു പൊലീസുകാരനും മറ്റുള്ളവരും ചേർന്ന് ഇവരെ പിടിച്ചു മാറ്റുന്നതും ദൃശ്യങ്ങളില് വ്യക്തമാണ്.ഔദ്യോഗിക കൃത്യനിർവ്വഹണത്തിലുള്ള ഉദ്യോഗസ്ഥരെ ആക്രമിക്കുകയോ ബലം പ്രയോഗിക്കുകയോ ചെയ്യുക, സ്വമേധയാ പരിക്കേല്പ്പിക്കുക, മനപ്പൂർവ്വം അപമാനിക്കുക, ക്രിമിനല് ഭീഷണിപ്പെടുത്തുക തുടങ്ങിയ ഭാരതീയ ന്യായ സംഹിതയിലെ വിവിധ വകുപ്പുകള് പ്രകാരം ഐശ്വര്യക്കെതിരെ എഫ്ഐആർ രജിസ്റ്റർ ചെയ്തിട്ടുണ്ട്.
പൊലീസ് ഉദ്യോഗസ്ഥ തന്നെ അസഭ്യം പറഞ്ഞു എന്ന് കാണിച്ച് ഐശ്വര്യയും മാണ്ഡ്യ പോലീസ് സൂപ്രണ്ട് മല്ലികാർജുൻ ബാലദണ്ടിക്ക് എതിർ പരാതി നല്കിയിട്ടുണ്ടെന്ന് പൊലീസ് അറിയിച്ചു. രണ്ട് പരാതികളും പൊലീസ് അന്വേഷിച്ചു വരികയാണ്.തന്റെ മകള് ചെയ്തത് തെറ്റാണെന്നും അതില് താൻ മാപ്പ് ചോദിക്കുന്നുവെന്നും ബിജെപി എംഎല്എ സുരേഷ് ഗൗഡ പ്രതികരിച്ചു. രാഷ്ട്രീയ സ്വാധീനം കേസന്വേഷണത്തെ സ്വാധീനിക്കുമോ എന്ന ആശങ്ക ഉയർത്തിയും ഐശ്വര്യക്കെതിരെ കർശന നടപടി ആവശ്യപ്പെട്ടും സമൂഹമാധ്യമങ്ങളില് വലിയ പ്രതിഷേധമാണ് ഉയർന്നിരിക്കുന്നത്. ഡ്യൂട്ടിയിലുള്ള പൊലീസ് ഉദ്യോഗസ്ഥരോടുള്ള പെരുമാറ്റത്തെക്കുറിച്ചും രാഷ്ട്രീയ നേതാക്കളുമായി ബന്ധമുള്ളവർക്ക് ലഭിക്കുന്ന പ്രത്യേക പരിഗണനയെക്കുറിച്ചും ഈ സംഭവം വലിയ ചർച്ചകള്ക്ക് വഴിവെച്ചിട്ടുണ്ട്. ഇരു പരാതികളിലും പൊലീസ് അന്വേഷണം പുരോഗമിക്കുകയാണ്.
