ബെംഗളൂരു: ലഖ്നൗവില് നിന്ന് ബെംഗളൂരുവിലേക്ക് സർവീസ് നടത്തിയ ഇൻഡിഗോ വിമാനത്തില് ബോംബ് ഭീഷണി. വിമാനം ബെംഗളൂരുവില് ഇറങ്ങുന്നതിന് തൊട്ടുമുമ്പ് വിമാനത്തിനുള്ളില് ബോംബ് ഉണ്ടെന്ന് പരാമർശിക്കുന്ന കുറിപ്പ് ക്യാബിൻ ക്രൂ അംഗങ്ങള് കണ്ടെത്തുകയായിരുന്നുവെന്ന് റിപ്പോർട്ടുകള് വ്യക്തമാക്കുന്നു.വിമാനജീവനക്കാർ ഉടൻ തന്നെ വിവരം പൈലറ്റിനെ അറിയിക്കുകയും, തുടർന്ന് ബന്ധപ്പെട്ട അധികാരികളെ വിവരം ധരിപ്പിക്കുകയും ചെയ്തു. ഇൻഡിഗോ 6ഇ321 വിമാനം രാവിലെ 9:40 ഓടെ ബെംഗളൂരു വിമാനത്താവളത്തില് സുരക്ഷിതമായി ഇറങ്ങി.ബോംബ് സ്ക്വാഡ് സ്ഥലത്തെത്തിയിട്ടുണ്ടെന്നും സുരക്ഷാ പ്രോട്ടോക്കോളുകള് കർശനമായി പാലിച്ചുവരികയാണെന്നും അധികൃതർ അറിയിച്ചു. വിമാനത്തില് പരിശോധനകള് നടന്നു വരികയാണ്. സുരക്ഷാ ഉദ്യോഗസ്ഥരുടെ അനുമതി ലഭിച്ചതിന് ശേഷം മാത്രമേ വിമാനം വീണ്ടും സർവീസുകള് പുനരാരംഭിക്കുകയുള്ളൂ.
