ബെംഗളൂരു: നഗരത്തിലെ ഗതാഗത കുരുക്കിന് വലിയ പരിഹാരം വരുന്നു. കർണാടക മന്ത്രിസഭ 13,262 കോടി രൂപ ചെലവില് ബെംഗളൂരുവില് 11 പുതിയ മേല്പ്പാലങ്ങള്ക്കും എലിവേറ്റഡ് ഇടനാഴികള്ക്കും അംഗീകാരം നല്കിയതോടെയാണ് ഇത്.നഗരത്തിലെ ഗതാഗതക്കുരുക്ക് ലഘൂകരിച്ച് യാത്രാ സമയം കുറയ്ക്കുന്നതിനും ഗതാഗത സൗകര്യം മെച്ചപ്പെടുത്തുന്നതിനുമാണ് 75.60 കിലോമീറ്റർ ദൈർഘ്യമുള്ള ഈ പദ്ധതികള് ലക്ഷ്യമിടുന്നത്.ബെംഗളൂരു സ്മാർട്ട് ഇൻഫ്രാസ്ട്രക്ച്ചർ ലിമിറ്റഡ് (ബി സ്മൈല്) എന്ന പ്രത്യേക ഉദ്ദേശ്യ കമ്പനിയാണ് ഈ വലിയ നഗര വികസന പദ്ധതികള് നടപ്പാക്കുന്നത്. ബെംഗളൂരുവിലെ അഞ്ച് നഗരസഭകളിലും പദ്ധതി വ്യാപിപ്പിക്കുമെന്ന് നിയമ, പാർലമെന്ററി കാര്യ മന്ത്രി എച്ച്കെ പാട്ടീല് അറിയിച്ചു. ഇതോടെ നഗരത്തിന്റെ മുഖച്ഛായ തന്നെ മാറുമെന്നാണ് കരുതുന്നത്.
യെശ്വന്ത്പുര-കെആർ പുരം (28 കിലോമീറ്റർ), കനകപുര റോഡിലെ റാഗിഗുഡ്ഡ-തലഘട്ടപുരം (18.5 കിലോമീറ്റർ) എന്നിവിടങ്ങളിലേക്കുള്ള എലിവേറ്റഡ് ഇടനാഴികള് പ്രധാന പദ്ധതികളില് ഉള്പ്പെടുന്നു. നിരവധി ചെറിയ മേല്പ്പാലങ്ങളും ഗ്രേഡ് സെപ്പറേറ്ററുകളും ഇതിന്റെ ഭാഗമാണ്. പതിനൊന്നോളം ബൃഹത് പദ്ധതികള് ഇതിന്റെ ഭാഗമായി അംഗീകാരം ലഭിച്ചവയില് ഉള്പ്പെടുന്നു.ബി-സ്മൈല് ഡയറക്ടർ (സാങ്കേതികം) ബിഎസ് പ്രഹ്ളാദ് പറയുന്നതനുസരിച്ച്, ഗതാഗത ക്രമം, ഉത്ഭവവും ലക്ഷ്യസ്ഥാനവും സംബന്ധിച്ച പാറ്റേണുകള് എന്നിവ വിശകലനം ചെയ്ത രണ്ടുവർഷത്തെ പഠനത്തിന് ശേഷമാണ് ഈ ഇടനാഴികള്ക്ക് അന്തിമ രൂപം നല്കിയത്. നഗരത്തിലുടനീളം യാത്രകള് സുഗമമാക്കാൻ ഒരു സമഗ്രമായ പരിഹാരം നല്കുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു.ബൈയപ്പനഹള്ളിയിലെ ഐഒസി ജംഗ്ഷനിലെ ദീർഘകാല ഗതാഗത പദ്ധതിക്കും മന്ത്രിസഭ അനുമതി നല്കി. ഒരു എലിവേറ്റഡ് റോട്ടറി മേല്പ്പാലവും ഒരു ദ്വിപാത റെയില് ഓവർബ്രിഡ്ജും ഉള്പ്പെടുന്ന പദ്ധതിയുടെ പുതുക്കിയ എസ്റ്റിമേറ്റ് 436.44 കോടി രൂപയാണ്. ഇത് മധ്യ ബെംഗളൂരുവിനെയും വടക്കൻ ഭാഗങ്ങളെയും തമ്മില് ബന്ധിപ്പിക്കുന്നത് മെച്ചപ്പെടുത്തും.
ബൈയപ്പനഹള്ളി ലെവല് ക്രോസിംഗില് ഒരു അധിക ദ്വിപാത റെയില് ഓവർബ്രിഡ്ജും പദ്ധതിയുടെ ഭാഗമാണ്.ഗതാഗത പദ്ധതികള്ക്ക് പുറമെ, 85 കോടി രൂപയുടെ ഒരു ബയോഗ്യാസ് ശുദ്ധീകരണ, കംപ്രഷൻ പദ്ധതിക്കും കാബിനറ്റ് അംഗീകാരം നല്കി. പൊതു-സ്വകാര്യ പങ്കാളിത്ത മാതൃകയില് അഞ്ച് മലിനജല ശുദ്ധീകരണ പ്ലാന്റുകളില് നിന്നുള്ള മാലിന്യം സംസ്കരിക്കുന്നതിനാണിത്. ഇന്റർമീഡിയറ്റ് റിംഗ് റോഡ് (ഐആർആർ) 2027 പദ്ധതി പുനരുജ്ജീവിപ്പിക്കുന്നതിനുള്ള പുതുക്കിയ വിജ്ഞാപനവും സർക്കാർ പുറത്തിറക്കി.സർക്കാർ സ്ഥാപനങ്ങളായ രാജ്ഭവൻ, കുമാര കൃപ ഗസ്റ്റ് ഹൗസ്, കണ്ടീരവ സ്റ്റേഡിയം, കോരമംഗല സ്റ്റേഡിയം എന്നിവയ്ക്ക് വസ്തു നികുതി ഇളവ് നല്കാനും മന്ത്രിസഭ അംഗീകരിച്ചു. യെശ്വന്ത്പുര, ഓള്ഡ് മദ്രാസ് റോഡ്, ഇലക്ട്രോണിക് സിറ്റി, സിർസി സർക്കിള്, നായണ്ടഹള്ളി, നാഗവാര ഉള്പ്പെടെയുള്ള പ്രധാന ബെംഗളൂരു പ്രദേശങ്ങളെ ഈ പുതിയ മേല്പ്പാല ശൃംഖല ബന്ധിപ്പിക്കും.
ക്യാബിനറ്റ് അംഗീകരിച്ച പ്രധാന പദ്ധതികള്ആർഎൻഎസ് ശാന്തിനികേതൻ സമീപമുള്ള തുംകൂർ റോഡിലെ എംഇഐ ജംഗ്ഷനില് സ്പ്ലിറ്റ് ഫ്ലൈഓവർമഹാലക്ഷ്മി ലേഔട്ടില് വെസ്റ്റ് ഓഫ് ചോർഡ് റോഡില് നിന്ന് ഔട്ടർ റിംഗ് റോഡ് വരെ പൈപ്പ്ലൈൻ റോഡില് ഗ്രേഡ് സെപ്പറേറ്ററുകള്പഴയ യെലഹങ്ക വഴിയുള്ള പോലീസ് സ്റ്റേഷൻ ജംഗ്ഷനില് നിന്ന് എൻഎച്ച്-7 (നവയുഗ ഫ്ലൈഓവർ) വരെ ദൊഡ്ഡബല്ലാപുര റോഡില് എലിവേറ്റഡ് കോറിഡോർകനകപുര റോഡില് കൊണങ്കുന്ന്റെ സർക്കിളിലും രഘുവനഹള്ളി ക്രോസിലും എലിവേറ്റഡ് കോറിഡോർമിനർവ സർക്കിള്-ഹഡ്സണ് സർക്കിള് എലിവേറ്റഡ് കോറിഡോർ, ഇതില് നിലവിലെ ബിജിഎസ് ഫ്ലൈഓവറില് നിന്ന് ടൗണ് ഹാള് വരെ ലൂപ്പ് ഫ്ലൈഓവർ ഉള്പ്പെടെ സംഗോളി രായണ്ണ സർക്കിള് (ആനന്ദ്രാവോ ഫ്ലൈഓവർ) മുതല് നൃപതുങ്ക റോഡ് (കെആർ സർക്കിള്) വരെ കോറിഡോർമൈസൂരു റോഡില് സിർസി സർക്കിളില് നിന്ന് നയന്ദഹള്ളിവരെ കോറിഡോർഹൊസൂർ റോഡില് ഷൂളേ സർക്കിളില് നിന്ന് സെന്റ് ജോണ്സ് ആശുപത്രിവരെ കോറിഡോർ.
