ബെംഗളൂരു: ഇടുങ്ങിയ റോഡുകളിലൂടെയും തിരക്കേറിയ കവലകളിലൂടെയും എളുപ്പത്തില് സഞ്ചരിച്ച് മെട്രോ സ്റ്റേഷനുകളിലേക്ക് യാത്രക്കാരെ എത്തിക്കാൻ ഇനി മുതല് ചെറിയ ബസുകള് സർവീസ് നടത്തും.ബെംഗളൂരുവിലെ മെട്രോ സ്റ്റേഷനുകളിലേക്കുള്ള ഫസ്റ്റ്, ലാസ്റ്റ് മൈല് കണക്റ്റിവിറ്റി പ്രശ്നം പരിഹരിക്കുകയാണ് പദ്ധതിയുടെ ലക്ഷ്യം.ആറ് മീറ്ററോ അതില് താഴെയോ നീളമുള്ള ചെറിയ ബസുകള് പ്രത്യേക മെട്രോ ഫീഡർ സർവീസുകളായി അവതരിപ്പിക്കാൻ ഗ്രേറ്റർ ബെംഗളൂരു അതോറിറ്റി, ബെംഗളൂരു മെട്രോപൊളിറ്റൻ ട്രാൻസ്പോർട്ട് കോർപ്പറേഷനോട് നിർദേശിച്ചു. ഇതിലൂടെ കൂടുതല് ആളുകളെ കാറുകളും ഇരുചക്ര വാഹനങ്ങളും ഒഴിവാക്കി പൊതുഗതാഗതത്തിലേക്ക് ആകർഷിക്കാനാകുമെന്നാണ് പ്രതീക്ഷ.സാധാരണ ബസുകള്ക്ക് ഇടുങ്ങിയ റോഡുകളിലൂടെയും കുത്തനെയുള്ള വളവുകളിലൂടെയും സഞ്ചരിക്കാൻ പലപ്പോഴും ബുദ്ധിമുട്ടാണ്.
ഇതുമൂലം സമീപത്തെ മെട്രോ സ്റ്റേഷനിലെത്താൻ യാത്രക്കാർ ഓട്ടോ, ടാക്സി, സ്വകാര്യ വാഹനങ്ങള് എന്നിവയെ ആശ്രയിക്കേണ്ടിവരുന്നു. പുതിയ മിനി ബസുകള് ഇത്തരം ഇടുങ്ങിയ റോഡുകളിലേക്ക് എത്തി താമസമേഖലകളെ നേരിട്ട് മെട്രോ സ്റ്റേഷനുകളുമായി ബന്ധിപ്പിക്കുമെന്നാണ് റിപ്പോർട്ട്.ഇതിനായി 200 ബസുകള് വാങ്ങുന്നതിനുള്ള നടപടികള് ഗതാഗത വകുപ്പ് ഇതിനകം ആരംഭിച്ചിട്ടുണ്ട്. മെട്രോ സ്റ്റേഷനുകളിലേക്കും പ്രധാന ഗതാഗത കേന്ദ്രങ്ങളിലേക്കുമുള്ള ഫസ്റ്റ്, ലാസ്റ്റ് മൈല് കണക്റ്റിവിറ്റി മെച്ചപ്പെടുത്തുന്നതിനായി മാത്രമായിരിക്കും ഈ ബസുകള് ഉപയോഗിക്കുക. ബിഎംടിസിയുടെ കീഴില് പ്രത്യേക ഫീഡർ സർവീസുകളായിട്ടായിരിക്കും ബസുകള് ഓടുക.പദ്ധതിയെ സ്പെഷ്യല് പ്രോജക്റ്റ് ആയി പരിഗണിക്കും. സംസ്ഥാന അർബൻ ട്രാൻസ്പോർട്ട് ഫണ്ടില് നിന്ന് 100 ശതമാനം ധനസഹായം ലഭ്യമാക്കാനാണ് സർക്കാർ ശ്രമിക്കുന്നത്. ഇതിന് പുറമെ, നഗരത്തിലുടനീളം ബിഎംടിസി വഴി സർവീസ് നടത്തുന്നതിനായി 500 മിനി ബസുകള്ക്ക് 125 കോടി രൂപ അനുവദിക്കണമെന്ന് ബെംഗളൂരു മെട്രോ റെയില് കോർപ്പറേഷൻ ലിമിറ്റഡ് നിർദേശം സമർപ്പിച്ചിട്ടുണ്ട്.സാധാരണ ബസുകള്ക്ക് കാര്യക്ഷമമായി സർവീസ് നടത്താൻ കഴിയാത്ത പ്രദേശങ്ങളില് നിന്ന് മെട്രോ സ്റ്റേഷനുകളിലേക്ക് യാത്രക്കാരെ എത്തിക്കുകയാണ് ഈ നിർദേശത്തിന്റെ ലക്ഷ്യം. മെട്രോ സ്റ്റേഷനുകളില് നിന്ന് അകലെയുള്ള ബസ് സ്റ്റോപ്പുകള് ബിഎംആർസിയും ബിഎംടിസിയും സംയുക്തമായി പരിശോധിച്ചിട്ടുണ്ട്.
ഇവയില് പല ബസ് സ്റ്റോപ്പുകളും മെട്രോ സ്റ്റേഷനുകള്ക്ക് സമീപത്തേക്ക് മാറ്റാനുള്ള നടപടികള് ആരംഭിച്ചു. ശരാശരി 100 മീറ്ററിനുള്ളില് നടക്കാവുന്ന ദൂരത്തില് ബസ് സ്റ്റോപ്പുകള് ഒരുക്കുകയാണ് ലക്ഷ്യം. ഇത് ചെറിയ ദൂരത്തേക്ക് ഇലക്ട്രിക് ബൈക്ക്, സൈക്കിള്, ഓട്ടോ തുടങ്ങിയവ ഉപയോഗിക്കേണ്ട സാഹചര്യം കുറയ്ക്കും. ബെംഗളൂരുവിലെ നിലവിലുള്ള മൂന്ന് മെട്രോ പാതകളിലും ബിഎംടിസി ഇപ്പോള് സർവീസ് നടത്തുന്നുണ്ട്.നഗരത്തിലെ 83 മെട്രോ സ്റ്റേഷനുകളില് 54 എണ്ണത്തിലും നിലവില് പ്രത്യേക മെട്രോ ഫീഡർ ബസുകള് ലഭ്യമാണ്. ബിഎംടിസിയുടെ 255 ഫീഡർ ബസുകള് പ്രതിദിനം ശരാശരി 1.5 ലക്ഷം യാത്രക്കാരെ കൊണ്ടുപോകുന്നുണ്ട്. റോഡിന്റെ വീതി കുറവായതിനാലോ കുത്തനെയുള്ള വളവുകളുള്ളതിനാലോ പ്രവേശനം ബുദ്ധിമുട്ടുള്ള പ്രദേശങ്ങളിലെ കണക്റ്റിവിറ്റി പ്രശ്നം പരിഹരിക്കാൻ മിനി ബസുകള് സഹായിക്കുമെന്നാണ് വിലയിരുത്തല്.
