ബെംഗളൂരു: യാത്രക്കാർ ഏറെക്കാലമായി കാത്തിരിക്കുന്ന ബെംഗളൂരു വിമാനത്താവള റോഡിലെ സദഹള്ളി അണ്ടർപാസിന്റെ ഒരു ഭാഗത്തെ നിർമ്മാണം ആരംഭിച്ചു.ഇതിന് പിന്നാലെ ടോള് പിരിക്കുന്ന ഭാഗത്ത് ബാരിക്കേഡുകള് സ്ഥാപിച്ചതിനൊപ്പം വാഹന ഗതാഗതത്തില് നിയന്ത്രണങ്ങളും വഴിതിരിച്ചുവിടലുകളും ഏർപ്പെടുത്തിയിട്ടുണ്ട്.അടിപ്പാതയുടെ നാല് വശങ്ങളിലൊന്നില് സംരക്ഷണ ഭിത്തി നിർമ്മിക്കുന്നതിനുള്ള മണ്ണ് നീക്കം ചെയ്യല് ജോലികള് ആരംഭിച്ചതായി ദേശീയപാത അതോറിറ്റി ഓഫ് ഇന്ത്യ അധികൃതർ അറിയിച്ചു. എതിർവശത്തുള്ള ഭാഗത്തെ നിർമ്മാണവും ഉടൻ ആരംഭിക്കും. ഇതിനായി ആവശ്യമായ യന്ത്രസാമഗ്രികള് സ്ഥലത്ത് എത്തിച്ചിട്ടുണ്ട്.
നിർമ്മാണ പ്രവർത്തനങ്ങള് ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിലേക്കും ദേവനഹള്ളിയിലേക്കും യാത്ര ചെയ്യുന്നവർക്ക് ഗതാഗതക്കുരുക്ക് ഉണ്ടാക്കാൻ സാധ്യതയുണ്ട്. സമീപത്തെ പ്രസ്റ്റീജ് 13 ഡിഗ്രീസ് നോർത്ത് ഷോപ്പിങ് മാളിന്റെ നിർമ്മാണവും അവസാനഘട്ടത്തിലേക്ക് കടന്നിരിക്കുകയാണ്.ഈ പാതയിലൂടെയുള്ള മെട്രോ പദ്ധതിക്ക് ഇനിയും ഏകദേശം രണ്ട് വർഷം വേണ്ടിവരുമെന്നാണ് പ്രതീക്ഷിക്കുന്നത്. അടിപ്പാത നിർമ്മാണം, പുതിയ വ്യാപാരകേന്ദ്രം, മെട്രോ നിർമ്മാണം എന്നിവ ഒരേസമയം പുരോഗമിക്കുന്ന സാഹചര്യത്തില് ബെംഗളൂരു വിമാനത്താവള ഇടനാഴിയില് വരും ദിവസങ്ങളില് ഗതാഗതത്തിരക്ക് കൂടുതല് രൂക്ഷമാകുമെന്ന ആശങ്കയും ഉയരുന്നുണ്ട്.സദഹള്ളിയില് അണ്ടർപാസ് എന്ന ആവശ്യം കാലങ്ങളായി ഉയരുന്നത്ബെംഗളൂരുവിലെ കെംപെഗൗഡ അന്താരാഷ്ട്ര വിമാനത്താവളത്തിലേക്കുള്ള ബെല്ലാരി റോഡിലെ സദഹള്ളി ജംഗ്ഷനിലാണ് ഏറെക്കാലമായി കാത്തിരുന്ന സദഹള്ളി അണ്ടർപാസ് പദ്ധതി നടപ്പാക്കുന്നത്.
ഹെബ്ബാള് മുതല് വിമാനത്താവളം വരെയുള്ള പ്രധാന പാതയിലെ അവസാനത്തെ ട്രാഫിക് സിഗ്നല് ഒഴിവാക്കുകയാണ് പദ്ധതിയുടെ പ്രധാന ലക്ഷ്യം.നാഷണല് ഹൈവേ അതോറിറ്റി ഓഫ് ഇന്ത്യയുടെ നേതൃത്വത്തിലുള്ള പദ്ധതിക്ക് ഏകദേശം 35 കോടി രൂപയുടെ ചെലവാണ് കണക്കാക്കുന്നത്. ഏകദേശം 700 മീറ്റർ നീളമുള്ള ആറുവരി അണ്ടർപാസ് ആയിരിക്കും നിർമ്മിക്കുക. ഇതോടെ വിമാനത്താവളത്തിലേക്കും തിരിച്ചുമുള്ള പ്രധാന വാഹനങ്ങള്ക്ക് സദഹള്ളി ജംഗ്ഷനിലെ സിഗ്നല് ഒഴിവാക്കി നേരിട്ട് സഞ്ചരിക്കാനാകും.നിലവിലുള്ള സർവീസ് റോഡുകള് രണ്ട് വരിയില് നിന്ന് നാല് വരിയാക്കി വികസിപ്പിച്ചാണ് നിർമ്മാണകാലത്തെ ഗതാഗതം നിയന്ത്രിക്കുന്നത്.
ഇതിന് പിന്നാലെയാണ് ഇവിടെ ബാരിക്കേഡുകള് സ്ഥാപിക്കല്, ഗതാഗതം തിരിച്ചുവിടല്, സർവീസ് റോഡ് വീതികൂട്ടല് തുടങ്ങിയ പ്രാരംഭ ജോലികള് ആരംഭിച്ചിട്ടുണ്ട്.അണ്ടർപാസ് കട്ട് ആൻഡ് കവർ രീതിയിലാണ് നിർമ്മിക്കുന്നത്. നിർമ്മാണ പ്രവർത്തനങ്ങള് പ്രധാനമായും രാത്രി 11 മണി മുതല് പുലർച്ചെ 5 മണി വരെ നടത്താൻ ട്രാഫിക് പോലീസ് അനുമതി നല്കിയിട്ടുണ്ട്. പദ്ധതി ഏകദേശം 15 മാസത്തിനുള്ളില് പൂർത്തിയാക്കാനാണ് ലക്ഷ്യമിടുന്നത്. പദ്ധതി പൂർത്തിയായാല് ഹെബ്ബാളില് നിന്ന് വിമാനത്താവളം വരെയുള്ള ഏകദേശം 22 കിലോമീറ്റർ പാത സിഗ്നല് രഹിതമാകും.
