പ്രശസ്ത ഫോട്ടോഗ്രാഫറും നടനും പരസ്യചിത്ര സംവിധായകനുമായ രാധാകൃഷ്ണൻ ചക്യാട്ട് (61) അന്തരിച്ചു. വ്യാഴാഴ്ച രാത്രി ഹൃദയാഘാതത്തെ തുടർന്ന് പുണെയില്‍ വെച്ചായിരുന്നു അന്ത്യം.ദുല്‍ഖർ സല്‍മാൻ നായകനായ ‘ചാർളി’ എന്ന ചിത്രത്തിലെ ഡേവിഡ് എന്ന കഥാപാത്രത്തിലൂടെ പ്രേക്ഷകർക്ക് സുപരിചിതനായിരുന്നു അദ്ദേഹം.നാല് പതിറ്റാണ്ടിലേറെ കാലമായി ഫോട്ടോഗ്രഫി രംഗത്ത് സജീവമായിരുന്ന രാധാകൃഷ്ണൻ ക്യാമറ, ഫോട്ടോഗ്രഫി വിഷയങ്ങളില്‍ പരിശീലനപരിപാടികളും നടത്തിയിരുന്നു. സാമൂഹിക മാധ്യമങ്ങളില്‍ സജീവമായിരുന്ന അദ്ദേഹം പിക്സല്‍ വില്ലേജ് എന്ന പേരില്‍ ക്യാമറ, ഫോട്ടോഗ്രഫി പരിശീലനവുമായി ബന്ധപ്പെട്ട ഒരു ഓണ്‍ലൈൻ പ്ലാറ്റ്ഫോമും ആരംഭിച്ചിരുന്നു.
പിക്സല്‍ വില്ലേജിന്റെ യൂട്യൂബ് ചാനലിലും അദ്ദേഹം സജീവമായിരുന്നു.കൊച്ചി, തൃപ്പൂണിത്തുറ സ്വദേശിയായ രാധാകൃഷ്ണൻ ചാക്യാട്ട് ഏറെക്കാലം മുംബൈ കേന്ദ്രീകരിച്ചായിരുന്നു പ്രവർത്തിച്ചിരുന്നത്. ഫാഷൻ ഫോട്ടോഗ്രഫിയിലാണ് അദ്ദേഹം തന്റെ കരിയർ വളർത്തിയെടുത്തത്. ഫാഷൻ ഫോട്ടോഗ്രാഫർ റഫീഖ് സയ്യിദിന്റെ കീഴില്‍ അപ്രന്റിസ് ആയാണ് തുടക്കം. പിന്നീട് അദ്ദേഹം പരസ്യ ഏജൻസിയായ ന്യൂക്ലിയസില്‍ ചേർന്നു.2000-ലാണ് രാധാകൃഷ്ണൻ ഇന്ത്യയിലുടനീളമുള്ള പ്രമുഖ പരസ്യ ഏജൻസികള്‍ക്കും കോർപ്പറേഷനുകള്‍ക്കുമായി ഒരു സ്വന്തം നിലയ്ക്ക് കരിയർ ആരംഭിച്ചത്.
ലൈഫ്സ്റ്റൈല്‍, ഫാഷൻ ഫോട്ടോഗ്രാഫി എന്നിവയുള്‍പ്പെടെ വിവിധ വിഭാഗങ്ങളിലായി അദ്ദേഹത്തിന്റെ പ്രവർത്തനങ്ങള്‍ വ്യാപിച്ചു. കൂടാതെ റാഡിസണ്‍, താജ്, എച്ച്‌ഡിഎഫ്സി, സോണി തുടങ്ങിയ പ്രധാന ദേശീയ ക്ലയന്റുകളുമായി അദ്ദേഹം സഹകരിച്ചു.2017-ല്‍, ഫോട്ടോഗ്രാഫിയെക്കുറിച്ചുള്ള തന്റെ വിപുലമായ അറിവ് അഭിലാഷമുള്ള ഫോട്ടോഗ്രാഫർമാരുമായി പങ്കിടുക എന്ന ലക്ഷ്യത്തോടെയുള്ള ഒരു ഓണ്‍ലൈൻ പ്ലാറ്റ്ഫോമായ പിക്സല്‍ വില്ലേജ് രാധാകൃഷ്ണൻ സ്ഥാപിച്ചു. ട്യൂട്ടോറിയലുകള്‍, വർക്ക് ഷോപ്പുകള്‍, അവലോകനങ്ങള്‍ എന്നിവയിലൂടെ, ഫോട്ടോഗ്രാഫി വിദ്യാഭ്യാസം വിശാലമായ പ്രേക്ഷകർക്ക് ലഭ്യമാക്കി.ഇന്ന് (23.05.2025, വെള്ളിയാഴ്ച) വൈകുന്നേരമാണ് സംസ്കാരചടങ്ങുകള്‍. ഭാര്യ: ബിന്ദു രാധാകൃഷ്ണൻ, മകൻ: വിഷ്ണു, സഹോദരങ്ങള്‍: വേണു , ശശികുമാർ, അമ്മ: രാധ ചാക്യാട്ട്, അച്ഛൻ: പരേതനായ ഗോപാല മേനോൻ.
