ബെംഗളൂരു: രാജ്യത്തിൻ്റെ പ്രധാന ഐടി നഗരമായ ബെംഗളൂരുവിൻ്റെ വികസനം മുന്നിൽകണ്ട് വൻ പദ്ധതികളാണ് കർണാടക സർക്കാർ പ്രഖ്യാപിച്ചിരിക്കുന്നത്. നഗരത്തിലെ ഗതാഗതക്കുരുക്ക് പരിഹരിക്കാനുള്ള പദ്ധതികളിൽ പലതും ആരംഭിച്ചു കഴിഞ്ഞു. ചില പദ്ധതികളിൽ ചർച്ചകളും സർവേകളും പഠനങ്ങളും തുടരുകയാണ്.പ്രഖ്യാപിച്ച പദ്ധതികളുടെ ഭാഗമായ ടണൽ റോഡുകളും ഡബിൾ ഡെക്കർ ഇടനാഴികളും ബെംഗളൂരു നഗരത്തിൽ വെള്ളപ്പൊക്കത്തിന് കാരണമാകുമെന്നാണ് നിലവിലെ ആരോപണം. ഐഐഎസ്‌സിയിലെ ഗവേഷകർ നടത്തിയ പഠനത്തിലാണ് ടണൽ റോഡുകൾ ഉൾപ്പെടുന്ന വൻ പദ്ധതികൾ ബെംഗളൂരു നഗരത്തെ വെള്ളത്തിൽ മുക്കാൻ സാധ്യതയുണ്ടെന്ന സൂചന നൽകുന്നത്.
ബെംഗളൂരു നഗരത്തിലെ ഗതാഗതം സുഗമമാക്കാനുള്ള ടണൽ റോഡ് പദ്ധതികൾ വരും വർഷങ്ങളിൽ വെള്ളപ്പൊക്കത്തിന് കാരണമാകുമെന്നാണ് എംആർടിഎസ് പഠനം വ്യക്തമാക്കുന്നതായി ടൈംസ് ഓഫ് ഇന്ത്യ റിപ്പോർട്ട് ചെയ്തു. നഗരത്തിൽ നിർമിക്കുന്ന ഡബിൾ ഡെക്കർ റോഡുകൾ, ടണൽ റോഡുകൾ നഗരത്തിന് നേട്ടമാകുമെങ്കിലും ഈ സാഹചര്യം മുതലെടുത്ത് സ്വന്തം വാഹനങ്ങൾ ഉപയോഗിക്കുന്നവരുടെ എണ്ണം ഉയരും. ഇതുവഴി പൊതുഗതാഗത സംവിധാനങ്ങൾ ഉപയോഗിക്കുന്നവരുടെ എണ്ണം കുറയ്ക്കുമെന്നും മുന്നറിയിപ്പ് നൽകുന്നുണ്ട്. എംആർടിഎസിൻ്റെ ട്രാൻസ്പോർട്ട് മോഡ് വിഹിതം 2041 ആകുമ്പോഴേക്കും 43.5 ശതമാനത്തിൽ നിന്ന് 42.2 ശതമാനമായി കുറയുമെന്നും റിപ്പോർട്ട് പറയുന്നു.
ബെംഗളൂരു നഗരത്തിലെ വൻ പദ്ധതികളായ ടണൽ റോഡുകൾ, സ്കൈഡെക്ക് എന്നീ പദ്ധതികളുമായി ബന്ധപ്പെട്ട് ബെംഗളൂരുവിലെ പൗരന്മാരുടെ സംഘടന നടത്തിയ ചർച്ചയിലാണ് ഈ ആശങ്കകൾ ഉയർന്നത്. സിവിക് – ബാംഗ്ലൂർ ഗാന്ധിഭവനിൽ സംഘടിപ്പിച്ച ചടങ്ങിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ (ഐഐഎസ്‌സി) പ്രൊഫസർ ആശിഷ് വർമ ബെംഗളൂരുവിൻ്റെ നിർദ്ദിഷ്ട ഗതാഗത പദ്ധതികളുടെ പ്രത്യാഘാതങ്ങളെക്കുറിച്ച് വിശദീകരിച്ചു. ടണൽ റോഡ്, സ്കൈ ഡെക്ക് പദ്ധതികളെക്കുറിച്ചാണ് കൂടുതൽ വിശദീകരണം നടത്തിയത്.
ബെംഗളൂരു ട്വിൻ ട്യൂബ് പ്രോജക്ട്’ എന്ന് വിളിക്കപ്പെടുന്ന ടണൽ റോഡ് പദ്ധതിക്കെതിരെയും സ്കൈഡെക്ക് പദ്ധതിക്കെതിരെയും ശക്തമായ എതിർപ്പാണ് ഉയരുന്നത്. പദ്ധതി സംസ്ഥാനത്തെ വൻ സാമ്പത്തിക പ്രതിസന്ധിക്ക് കാരണമാകുമെന്ന കാമ്പയിലാണ് നടക്കുന്നത്. എന്നാൽ ഈ പദ്ധതികളുമായി ബൃഹത് ബെംഗളൂരു മഹാനഗര പാലിക (ബിബിഎംപി) മുന്നോട്ട് പോകുകയാണ്. നഗരത്തിലെ കടുത്ത ഗതാഗതക്കുരുക്കും മലിനീകരണവും പരിഹരിക്കുന്നതിന് സബർബൻ, മെട്രോ റെയിൽ സംവിധാനങ്ങളാണ് മികച്ചതെന്നാണ് ആശങ്ക പങ്കുവച്ചവരുടെ വാദം.
വരും വർഷങ്ങളിൽ ഐടി നഗരമായ ബെംഗളൂരുവിൻ്റെ ജനസംഖ്യ 30 ദശലക്ഷത്തിലെത്തുമെന്നാണ് പഠനത്തിലെ മറ്റൊരു പ്രധാന കണ്ടെത്തൽ. ഇതോടെ നഗരത്തിലെ നിലവിലുള്ള അടിസ്ഥാന സൗകര്യങ്ങൾ തികയാത്ത അവസ്ഥയുണ്ടാകും. ബെംഗളൂരു നഗരത്തിൻ്റെ വികസനവും വരും വർഷങ്ങളിലെ ഗതാഗത സൗകര്യങ്ങളും സുഗമമാക്കാനുള്ള 170 കിലോമീറ്റർ ദൈർഘ്യമുള്ള തുരങ്കപാതകൾ, ഡബിൾ ഡെക്കർ പാസേജ് വേ, എലിവേറ്റഡ് കോറിഡോറുകൾ, അണ്ടർപാസുകൾ എന്നിവ ഉൾപ്പെടുന്ന വൻ പദ്ധതികളുടെ സാധ്യതാ പഠനങ്ങൾ ഉൾപ്പെടുന്ന ബ്ലൂ പ്രിൻ്റ് ബിബിഎംപി പുറത്തുവിട്ട സാഹചര്യത്തിൽ കൂടിയാണ് പുതിയ പഠനങ്ങൾ പുറത്തുവരുന്നത്. ആൾട്ടിനോക്ക് കൺസൾട്ടിങ് എൻജിനീയറിങ് ആണ് നിർണായക നിർദേശങ്ങളടങ്ങുന്ന റിപ്പോർട്ട് ബിബിഎംപിക്ക് കൈമാറിയത്
