ബെംഗളൂരു: ഏറെ തിരക്കുള്ള മൈസൂരു – ബെംഗളൂരു പാതയിലെ ടോൾ നിരക്ക് വർധിപ്പിച്ച് ഹൈവേ അതോറിറ്റി. അഞ്ചുരൂപ മുതൽ 50 രൂപവരെയാണ് വർധന. ഏപ്രിൽ ഒന്നുമുതൽ പുതിയ നിരക്കുകൾ നിലവിൽ വരുമെന്ന് നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ) വ്യക്തമാക്കി. ഇത് രണ്ടാം തവണയാണ് ടോൾ നിരക്ക് ഉയർത്തിയത്.
ബെംഗളൂരു – മൈസൂർ, ബെംഗളൂരു – ഹൈദരാബാദ് ഹൈവേകളിലും ബെംഗളൂരു സാറ്റലൈറ്റ് ടൗണിലെ ഹോസ്‌കോട്ട് – ദേവനഹള്ളി വിഭാഗത്തിലും ടോൾ നിരക്ക് ഉയർത്തി. ബെംഗളൂരു – നിദാഘട്ട റൂട്ടിൽ കാർ, വാൻ, ജീപ്പ് എന്നിവയ്ക്ക് ഒരു ദിശയിലേക്ക് 170 രൂപയാക്കി ഉയർത്തി. ബസ്, ലോറി വാഹനങ്ങൾക്ക് ഒരു വശത്തേക്ക് 565 രൂപയായിരുന്നത് 580 രൂപയാക്കി ഉയർത്തി. ലൈറ്റ് കൊമേഴ്സ്യൽ വാഹനങ്ങൾക്കും മിനി ബസുകൾക്കും ഒരു വശത്തേക്ക് 270 രൂപയാണ് നൽകേണ്ടത്. വലിയ വാഹനങ്ങൾക്ക് 1,110 രൂപ നൽകണം. മുൻപ് ഈ നിരക്ക് 1,060 ആയിരുന്നു.
പ്രതിമാസ പാസുകൾക്ക് 800 രൂപവരെയാണ് വർധന. ദേവനഹള്ളി നല്ലൂര്‍ ടോള്‍ പ്ലാസയിലും നിരക്ക് വര്‍ധിച്ചിട്ടുണ്ട്. ദേശീയപാത 7 (കർണാടക അതിർത്തി – ദേവനഹള്ളി) 71.45 കിലോമീറ്റർ ഭാഗം ഉപയോഗിക്കുന്നതിന് കാറുകൾ, ജീപ്പുകൾ, വാനുകൾ, ലൈറ്റ് മോട്ടോർ വാഹനങ്ങൾ 115 രൂപയും മടക്കയാത്രയ്ക്ക് 175 രൂപയും നൽകണം. ബാഗേപള്ളിയിലാണ് ടോൾ പിരിക്കുക.ദൊഡ്ഡബല്ലാപ്പൂർ മുതൽ ഹോസ്‌കോട്ട് വരെയുള്ള ഭാഗം തുറന്ന് അഞ്ച് മാസത്തിനുള്ളിൽ ടോൾ പരിഷ്‌ക്കരണം നടത്തും. ദൊഡ്ഡബല്ലാപ്പൂർ ബൈപാസിനും ഹൊസ്‌കോട്ടിനുമിടയിൽ ഒരു യാത്രയ്ക്ക് 80 രൂപയും മടക്കയാത്രയ്ക്ക് 120 രൂപയും കാറുകൾക്കും വാനുകൾക്കും ജീപ്പുകൾക്കും ഒരുമാസത്തെ 50 യാത്രകൾക്ക് 2,720 രൂപയുമായിരിക്കും.
