വാഷിംഗ്ടണ്‍: മാസ്‌കിന് പകരം സ്ത്രീകളുടെ അടിവസ്ത്രം ധരിച്ചെത്തിയ യുവാവിനെ വിമാനത്തില്‍നിന്ന് ഇറക്കിവിട്ടു.യുണൈറ്റഡ് എയര്‍ലൈന്‍സിന്റെ വിമാനത്തിലാണ് സംഭവം. വിമാനം ടേക്ക് ഓഫ് ചെയ്യുന്നതിന് മുമ്ബാണ് ഫ്‌ളോറിഡ കേപ്‌കോറല്‍ സ്വദേശിയായ ആദം ജെന്നെ എന്ന യുവാവിനെ ജീവനക്കാര്‍ ഇറക്കിവിട്ടത്.
ഫോര്‍ട്ട് ലൗഡര്‍ഡെയ്ല്‍ വിമാനത്താവളത്തില്‍ നിന്ന് വാഷിംഗ്ടണിലേക്ക് പോവുകയായിരുന്നു വിമാനം. യുവാവ് സ്ത്രീകളുടെ അടിവസ്ത്രമാണ് ധരിച്ചതെന്ന് ജീവനക്കാരുടെ ശ്രദ്ധയില്‍പ്പെട്ടതോടെ ഇയാളോട് വിമാനത്തില്‍നിന്നിറങ്ങാന്‍ ആവശ്യപ്പെടുകയായിരുന്നു. ആദം കാരണം തിരക്കിയപ്പോള്‍ നിര്‍ദേശാനുസരണമുള്ള മാസ്‌ക് ധരിച്ചിട്ടില്ലെന്നായിരുന്നു കാബിന്‍ ക്രൂവിന്റെ മറുപടി.
തുടര്‍ന്ന് ഒന്നും മിണ്ടാതെ ഇയാള്‍ വിമാനത്തില്‍ നിന്നിറങ്ങി. വിമാനത്തിലുണ്ടായിരുന്നവര്‍ മൊബൈലില്‍ പകര്‍ത്തിയ സംഭവത്തിന്റെ വീഡിയോ സോഷ്യല്‍ മീഡിയയില്‍ പ്രചരിക്കുന്നുണ്ട്. മാസ്‌ക് നിര്‍ബന്ധമാക്കിയതിനെതിരേയുള്ള തന്റെ പ്രതിഷേധമായിരുന്നെന്ന് ആദം പിന്നീട് പ്രതികരിച്ചു. മണ്ടത്തരം മനസിലാക്കി കൊടുക്കാന്‍ അതേരീതി തന്നെയാണ് നല്ലതെന്നാണ് താന്‍ കരുതുന്നതെന്നും, സമാനരീതിയില്‍ നേരത്തെ മറ്റുചില വിമാനങ്ങളിലും യാത്രചെയ്തിട്ടുണ്ടെന്നും യുവാവ് പറഞ്ഞു
