ന്യൂഡൽഹി: ബെംഗളൂരു റെസിഡൻസി റോഡിലെ പബ്ബിൽ രാത്രികാല പരിശോധനയ്ക്കിടെ പോലീസുകാരെ കയ്യേറ്റം ചെയ്യുകയും അസഭ്യം പറയുകയും ചെയ്ത സംഭവത്തിൽ ആന്ധ്രാപ്രദേശ് കേഡർ ഐ.എ.എസ് ഉദ്യോഗസ്ഥനെതിരെ പോലീസ് കേസെടുത്തു. കുപ്പം ഏരിയ ഡെവലപ്‌മെന്റ് അതോറിറ്റി പ്രോജക്ട് ഡയറക്ടറും 2019 ബാച്ച് ഐ.എ.എസ് ഉദ്യോഗസ്ഥനുമായ വികാസ് മാർമറ്റിനെതിരെയാണ് നടപടി. സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വൈറലായിട്ടുണ്ട്.ഒക്ടോബർ 10-ന് പുലർച്ചെ 1.30-ഓടെ റെസിഡൻസി റോഡിലെ ‘കവോർ ബാർ ആൻഡ് റെസ്റ്റോറന്റിലാണ്’ സംഭവം നടന്നത്. ബെംഗളൂരു പോലീസ് കമ്മീഷണറുടെ നിർദ്ദേശപ്രകാരം സെൻട്രൽ ക്രൈം ബ്രാഞ്ചിന്റെ സ്പെഷ്യൽ എൻക്വയറി വിംഗ് ഇൻസ്പെക്ടർ അരുൺ സലുങ്കെയും സംഘവും പബ്ബുകളിൽ പരിശോധന നടത്തുന്നതിനിടയിലാണ് തർക്കമുണ്ടായത്.
പ്രായം പരിശോധിക്കുന്നതിനായി ഉപഭോക്താക്കളുടെ തിരിച്ചറിയൽ കാർഡുകൾ പരിശോധിക്കുകയായിരുന്നു പോലീസ്.പരിശോധനയ്ക്കിടെ പബ്ബിലെത്തിയ വികാസ് മാർമറ്റും സംഘവും പോലീസുകാരോട് തർക്കിക്കുകയും അസഭ്യം പറയുകയും ചെയ്തതായി പരാതിയിൽ പറയുന്നു. താൻ ഐ.എ.എസ് ഉദ്യോഗസ്ഥനാണെന്ന് ഇയാൾ പരാമർശിച്ചതായും റിപ്പോർട്ടുകളുണ്ട്. സംഭവത്തിന് ശേഷം കബ്ബൺ പാർക്ക് പോലീസ് സ്റ്റേഷനിൽ പരാതി നൽകിയ ഇൻസ്പെക്ടർ അരുൺ സലുങ്കെ വൈദ്യപരിശോധനയും തേടി. ഔദ്യോഗിക കൃത്യനിർവഹണം തടസ്സപ്പെടുത്തൽ, ദേഹോപദ്രവമേൽപ്പിക്കൽ, ഭീഷണിപ്പെടുത്തൽ തുടങ്ങിയ ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം പോലീസ് കേസെടുത്തിട്ടുണ്ട്.ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നൈഡുവിന്റെ മണ്ഡലമായ കുപ്പത്തിന്റെ ചുമതലയുള്ള ഉദ്യോഗസ്ഥനാണ് വികാസ് മാർമറ്റ്.
മുഖ്യമന്ത്രിയുടെ ഓഫീസിൽ നിന്നുള്ള നിർദ്ദേശപ്രകാരം ചീഫ് സെക്രട്ടറി സായ് പ്രസാദ് സംഭവത്തെക്കുറിച്ച് അന്വേഷിച്ച് റിപ്പോർട്ട് സമർപ്പിക്കാൻ ഉത്തരവിട്ടിട്ടുണ്ട്. എന്നാൽ ഉദ്യോഗസ്ഥരെ സംരക്ഷിക്കുന്ന നിലപാടാണ് സർക്കാരുടേതെന്ന് ചൂണ്ടിക്കാട്ടി പ്രതിപക്ഷമായ വൈ.എസ്.ആർ. കോൺഗ്രസ് പാർട്ടി രംഗത്തെത്തി. മാതൃകയാകേണ്ട ഉദ്യോഗസ്ഥർ ഗുണ്ടകളെക്കാൾ മോശമായി പെരുമാറുന്നുവെന്നും മുഖ്യമന്ത്രി ഇവരെ സംരക്ഷിക്കാൻ ശ്രമിക്കുകയാണെന്നും വൈ.എസ്.ആർ.സി.പി വക്താവ് ഭൂമന കരുണാകര റെഡ്ഡി ആരോപിച്ചു.ഐ.ഐ.ടി കാൻപൂർ പൂർവ്വ വിദ്യാർത്ഥിയായ വികാസ് മാർമറ്റിന്റെ പഴയ സിവിൽ സർവീസ് പരിശീലന വീഡിയോകളും ചന്ദ്രബാബു നൈഡുവിനൊപ്പമുള്ള ചിത്രങ്ങളും നിലവിൽ സമൂഹമാധ്യമങ്ങളിൽ വലിയ തോതിൽ പ്രചരിക്കുന്നുണ്ട്.
