ബെംഗളൂരു: എസ്‌റ്റീം മാളില്‍ നിന്ന് വെറ്ററിനറി കോളേജ് വരെ നിർമ്മിക്കാൻ ഉദ്ദേശിക്കുന്ന 2.2 കിലോമീറ്റർ നീളമുള്ള ഹെബ്ബാള്‍ തുരങ്ക പദ്ധതിക്കെതിരെ സാമ്പത്തിക, കരാർ, ഗതാഗത ആസൂത്രണ ആശങ്കകള്‍ ഉന്നയിച്ച്‌ സംസ്ഥാന ധനവകുപ്പ്.പദ്ധതി മാറ്റിവെക്കണമെന്നും സമഗ്ര ഗതാഗത പദ്ധതിയുടെ അടിസ്ഥാനത്തില്‍ പുതിയ നിർദേശം സമർപ്പിക്കണമെന്നും വകുപ്പ് ശുപാർശ ചെയ്‌തിരുന്നു.2025ല്‍ പുതുക്കിയ മന്ത്രിസഭാ കുറിപ്പിന്റെ കരട് പരിശോധിച്ച ശേഷമാണ് ധനവകുപ്പ് വിവിധ ആശങ്കകള്‍ ഉന്നയിച്ചതെന്ന് അടുത്തിടെ പൊതുവേദിയില്‍ ലഭ്യമായ രേഖ വ്യക്തമാക്കുന്നു. എന്നാല്‍ ഈ ആശങ്കകള്‍ പരിഗണിക്കാതെ മന്ത്രിസഭ പദ്ധതിയുമായി മുന്നോട്ടുപോയി. 2025 ഡിസംബർ എട്ടിന് പുറത്തിറക്കിയ സർക്കാർ ഉത്തരവിലൂടെ ബെംഗളൂരു വികസന അതോറിറ്റിയെ പദ്ധതിയുടെ നിർവഹണ ഏജൻസിയായി നിയമിക്കുകയും ചെയ്തു.
നേരത്തെ ഉന്നയിച്ച ചില ആശങ്കകള്‍ പരിഹരിക്കാൻ പുതിയ നിർദേശത്തില്‍ ശ്രമിച്ചിട്ടുണ്ടെങ്കിലും, നിർദ്ദിഷ്‌ട വടക്ക് തെക്ക് തുരങ്കവുമായി ഹെബ്ബാള്‍ ചെറുതുരങ്കത്തെ എങ്ങനെ ബന്ധിപ്പിക്കും, പദ്ധതിയുടെ സാമ്പത്തിക ബാധ്യത ബെംഗളൂരു വികസന അതോറിറ്റിക്ക് എത്രത്തോളം ഇത് താങ്ങാനാകും, മറ്റ് ഗതാഗത മാർഗങ്ങള്‍ സ്വതന്ത്രമായി വിലയിരുത്തിയിട്ടുണ്ടോ തുടങ്ങിയ കാര്യങ്ങളില്‍ ധനവകുപ്പ് ചോദ്യങ്ങള്‍ ഉന്നയിച്ചു.വടക്ക് തെക്ക് തുരങ്കത്തിനായി നിലവിലുള്ള ബി സ്മൈല്‍ ടെൻഡറില്‍ മാറ്റം വരുത്താനുള്ള നിർദേശമാണ് പ്രധാന ആശങ്കകളിലൊന്ന്. ചെറുതുരങ്കത്തിന് വഴിയൊരുക്കുന്നതിനായി മെഹ്ക്രി സർക്കിളിലെ പ്രധാന പ്രവേശന, പുറത്തേക്കുള്ള പാതകളില്‍ മാറ്റം വരുത്തുകയോ ചിലത് ഒഴിവാക്കുകയോ ചെയ്യുന്നതിന് നിലവിലെ ടെൻഡറില്‍ അനുബന്ധ വ്യവസ്ഥ ഉള്‍പ്പെടുത്താനാണ് നീക്കം.ടെൻഡർ പുറത്തിറക്കിയശേഷം പദ്ധതിയുടെ പരിധിയില്‍ മാറ്റം വരുത്തുന്നത് നിയമപരമായ തർക്കങ്ങള്‍ക്കും നഷ്‌ടപരിഹാര ആവശ്യങ്ങള്‍ക്കും വഴിവെക്കാമെന്ന് ധനവകുപ്പ് മുന്നറിയിപ്പ് നല്‍കി. ആദ്യ ടെൻഡറിലെ വ്യവസ്ഥകള്‍ അടിസ്ഥാനമാക്കി അപേക്ഷ സമർപ്പിച്ച അന്താരാഷ്ട്ര കമ്പനികളുടെ പങ്കാളിത്തം കുറയാനും സാധ്യതയുണ്ടെന്നും ചൂണ്ടിക്കാട്ടി.
വടക്ക് തെക്ക് തുരങ്കത്തിന്റെ പുതുക്കിയ ഉപയോഗസാധ്യതകളും സാമ്പത്തിക മാതൃകയും സമഗ്രമായി പുനഃപരിശോധിക്കാതെ നടപടിക്രമപരമായ അനുബന്ധ ഉത്തരവിലൂടെ മാറ്റങ്ങള്‍ നടപ്പാക്കാൻ ശ്രമിക്കുന്നതിനെയും വകുപ്പ് ചോദ്യം ചെയ്തു.2215 കോടി രൂപ ചെലവ് കണക്കാക്കുന്ന പദ്ധതിയുടെ മുഴുവൻ തുകയും ബെംഗളൂരു വികസന അതോറിറ്റിയുടെ ആഭ്യന്തര വരുമാനത്തില്‍നിന്ന് കണ്ടെത്താനുള്ള തീരുമാനത്തിലും ധനവകുപ്പ് ആശങ്ക പ്രകടിപ്പിച്ചു. ഡോ. കെ. ശിവറാം കാരന്ത് ലേഔട്ടിനായുള്ള ഇ ലേലവും നിക്ഷേപത്തുകയും ഉള്‍പ്പെടെയുള്ള ആസ്‌തി ധനസമ്പാദന മാർഗങ്ങളിലൂടെ 2026 മാർച്ചോടെ 10,000 കോടി രൂപ വരുമാനം ലഭിക്കുമെന്ന പ്രതീക്ഷയിലാണ് പദ്ധതി മുന്നോട്ടുവെച്ചിരിക്കുന്നതെന്നാണ് റിപ്പോർട്ട്.എന്നാല്‍ വിപണിയിലെ മാറ്റങ്ങളും നിയമപരമോ നിയന്ത്രണപരമോ ആയ കാലതാമസങ്ങളും ഈ വരുമാനത്തെ ബാധിക്കാമെന്ന് ധനവകുപ്പ് മുന്നറിയിപ്പ് നല്‍കിയിരുന്നു. പ്രതീക്ഷിക്കുന്ന ഒറ്റത്തവണ വരുമാനത്തിന്റെ 20 ശതമാനത്തിലധികം തുരങ്ക പദ്ധതിക്കായി ചെലവഴിക്കുന്നത് അതോറിറ്റിയുടെ മറ്റ് പ്രധാന ചുമതലകളെ ബാധിക്കുമെന്നും വകുപ്പ് ചൂണ്ടിക്കാട്ടി. ലേഔട്ട് വികസനം, കുടിവെള്ള വിതരണം, മലിനജല നിർമാർജനം, പാർക്കുകള്‍ തുടങ്ങിയ അടിസ്ഥാന സൗകര്യങ്ങളുടെ വികസനം ഇതില്‍ ഉള്‍പ്പെടുന്നു.ഗതാഗത ആസൂത്രണവുമായി ബന്ധപ്പെട്ടും നിർദേശത്തില്‍ പോരായ്‌മകളുണ്ടെന്നാണ് ധനവകുപ്പിന്റെ വിലയിരുത്തല്‍.
പ്രമുഖരായ വിദഗ്‌ധർ തയ്യാറാക്കിയ സമഗ്ര സാധ്യതാപഠന റിപ്പോർട്ടോ സ്വതന്ത്ര വിശദമായ പദ്ധതി റിപ്പോർട്ടോ ഇല്ലെന്ന് വകുപ്പ് ചൂണ്ടിക്കാട്ടി. വടക്ക് തെക്ക് തുരങ്കം നടപ്പാക്കുന്ന ബി സ്മൈല്‍ തന്നെ തയ്യാറാക്കിയ വിശദമായ പദ്ധതി റിപ്പോർട്ടിനെ ആശ്രയിക്കുന്നതിനെയും ചോദ്യം ചെയ്തു.സ്വകാര്യ വാഹനങ്ങളുടെ സഞ്ചാരം സുഗമമാക്കുന്നതിലാണ് നിർദേശം പ്രധാനമായും ശ്രദ്ധ കേന്ദ്രീകരിക്കുന്നതെന്നും ധനവകുപ്പ് നിരീക്ഷിച്ചു. ബെംഗളൂരു മെട്രോയുടെ രണ്ടാം ഘട്ടം ബി വിമാനത്താവള പാത, സബർബൻ റെയില്‍വേ, മറ്റ് ഉയർന്ന യാത്രാശേഷിയുള്ള പൊതുഗതാഗത സംവിധാനങ്ങള്‍ എന്നിവയുമായി പദ്ധതിയെ എങ്ങനെ സംയോജിപ്പിക്കുമെന്ന കാര്യത്തില്‍ വ്യക്തമായ വിശദീകരണമില്ലെന്നും രേഖയില്‍ പറയുന്നു.
