ബെംഗളൂരുവില് രാത്രി സമയത്ത് തനിക്ക് നേരിട്ട ഞെട്ടിക്കുന്ന ദുരനുഭവം വെളിപ്പെടുത്തി കന്നഡ നടിയും ‘ബിഗ് ബോസ് കന്നഡ’ മുൻ മത്സരാർത്ഥിയുമായ ദിവ്യ സുരേഷ്.സംഭവത്തിന്റെ പശ്ചാത്തലത്തില് നഗരത്തിലെ വനിതാ സുരക്ഷയെക്കുറിച്ച് അവർ ശക്തമായ ആശങ്കയും പൊലീസിനോട് പ്രതിഷേധവും രേഖപ്പെടുത്തി.ഞായറാഴ്ച രാത്രി ഏകദേശം 11.30ഓടെ താനും ബന്ധുവും ചേർന്ന് പാർക്ക് ചെയ്തിരുന്ന കാറിലേക്ക് നടന്ന് പോകുന്നതിനിടെയാണ് സംഭവം നടന്നത് എന്ന് 33-കാരിയായ ദിവ്യ സുരേഷ് പറയുന്നു. ഈ സമയത്ത് അജ്ഞാതനായ ഒരാള് തങ്ങളെ പിന്തുടരുകയും പൊതുസ്ഥലത്ത് അശ്ലീല പ്രവർത്തികള് കാണിച്ചുവെന്നും അസഭ്യമായി പെരുമാറിയെന്നും അവർ ആരോപിച്ചു.
സംഭവം ശ്രദ്ധയില്പ്പെട്ട ഉടൻ തന്നെ താനും ബന്ധുവും ഇയാളെ ചോദ്യം ചെയ്തുവെങ്കിലും, ഇയാള് യാതൊരു മടിയും കാണിക്കാതെ തങ്ങളെ പിന്തുടരുന്നതും അശ്ലീല പ്രവർത്തി കാണിക്കുന്നതും തുടരുകയായിരുന്നുവെന്നും ഇൻസ്റ്റഗ്രാം സ്റ്റോറിയിലൂടെ അനുഭവം പങ്കുവെച്ച ദിവ്യ വ്യക്തമാക്കി. തങ്ങള് സുരക്ഷിതമായി കാറില് കയറിയ ശേഷവും ഇയാള് വാഹനത്തെ പിന്തുടർന്നുവെന്നും അവർ ആരോപിച്ചു.സംഭവം മൊബൈല് ഫോണില് ദൃശ്യമായി പകർത്തിയിരുന്നുവെന്നും അത് ഇൻസ്റ്റഗ്രാം സ്റ്റോറിയായി പങ്കുവെച്ചിരുന്നുവെന്നും ദിവ്യ പറഞ്ഞു. വീഡിയോയില് ബന്ധു സംശയാസ്പദനായ യുവാവിനെ ചൂണ്ടിക്കാട്ടി കാണിക്കുന്നതും പൊലീസിനെ ഉടൻ വിളിക്കണമെന്ന് ആവശ്യപ്പെടുന്നതും കേള്ക്കാമായിരുന്നു എന്ന് എൻഡിടിവി റിപ്പോർട്ട് ചെയ്യുന്നു.”രാത്രിയില് റോഡില് നടക്കുന്നു എന്നൊരു കാരണത്താല് ഒരു സ്ത്രീക്കും ഇത്തരത്തിലുള്ള പീഡനം നേരിടേണ്ടി വരരുത്,” എന്ന് ദിവ്യ കുറിച്ചു. “നിരന്തരം വാഗ്ദാനം ചെയ്യുന്ന വനിതാ സുരക്ഷ എവിടെയാണ്?” എന്ന ചോദ്യവും ബെംഗളൂരു പൊലീസിനെ ടാഗ് ചെയ്ത് അവർ ഉന്നയിച്ചു.
2021-ല് സംപ്രേഷണം ചെയ്ത ‘ബിഗ് ബോസ് കന്നഡ’ സീസണ് 8-ല് പങ്കെടുത്ത ദിവ്യ സുരേഷ് ‘നന്ന ഹെന്തി എംബിബിഎസ്’, ‘ജോടി ഹക്കി’ എന്നീ ടെലിവിഷൻ പരമ്പരകളിലൂടെയും ശ്രദ്ധ നേടിയിട്ടുണ്ട്. 2017-ല് ‘മിസ് ഇന്ത്യ സൗത്ത്’ കിരീടം നേടിയ അവർ അതേ വർഷം ‘#9, ഹില്ട്ടണ് ക്രോസ്’ എന്ന ചിത്രത്തിലൂടെ സിനിമയിലേക്ക് അരങ്ങേറ്റം കുറിച്ചു. തുടർന്ന് ‘റൗഡി ബേബി’, ‘കെംപു ഹളദി ഹസിരു’, ‘ഹിരണ്യ’ തുടങ്ങിയ ചിത്രങ്ങളിലും അഭിനയിച്ചു.അതേസമയം, 2025 ഒക്ടോബറില് ബെംഗളൂരുവിലെ ബ്യാതരായണപുരയില് നടന്ന ഹിറ്റ് ആൻഡ് റണ് അപകടവുമായി ബന്ധപ്പെട്ട കേസിലും ദിവ്യ സുരേഷിന്റെ പേര് വാർത്തകളില് ഇടം നേടിയിരുന്നു. സിസിടിവി ദൃശ്യങ്ങളുടെ അടിസ്ഥാനത്തില് അപകടത്തില് ഉള്പ്പെട്ട വാഹനത്തിന്റെ ഡ്രൈവറാണ് ദിവ്യ എന്ന് സംശയിച്ച് അന്വേഷണം നടത്തിയതായി പൊലീസ് അറിയിച്ചിരുന്നു. അതേസമയം നിലവിലെ പീഡനാരോപണവുമായി ആ കേസിന് ബന്ധമില്ല എന്നാണ് റിപ്പോർട്ടുകള്.
