ബെംഗളൂരു: നഗരത്തിലെ യാത്രക്കാരുടെ സാമ്പത്തിക ഭാരം ഉയർത്തിക്കൊണ്ട് ജൂലൈ 1 മുതല് ടോള് നിരക്കില് വർധന. നന്ദി ഇക്കണോമിക് കോറിഡോർ എന്റർപ്രൈസസ് ലിമിറ്റഡ്, ബെംഗളൂരു എലിവേറ്റഡ് ടോള്വേ പ്രൈവറ്റ് ലിമിറ്റഡ് എന്നിവയാണ് പുതിയ നിരക്കുകള് പ്രഖ്യാപിച്ചത്.ഇതോടെ നൈസ് റോഡ്, ഇലക്ട്രോണിക്സ് സിറ്റി എക്സ്പ്രസ് വേ, ഹൊസൂർ റോഡ് എന്നിവ വഴിയുള്ള യാത്രയ്ക്ക് കൂടുതല് ചെലവ് വരുമെന്നാണ് കണക്കാക്കുന്നത്.സംസ്ഥാന സർക്കാരുമായി 2000 സെപ്റ്റംബർ 4-ന് ഒപ്പുവെച്ച കരാർ പ്രകാരമുള്ള വാർഷിക ടോള് നിരക്ക് പരിഷ്കരണത്തിന്റെ ഭാഗമായാണ് പുതിയ വർധനയെന്ന് നൈസ് അറിയിച്ചു. ബെംഗളൂരു-മൈസൂരു ഇൻഫ്രാസ്ട്രക്ച്ചർ കോറിഡോർ (ബിഎംഐസി) പദ്ധതിയുടെ ഭാഗമായ 40.8 കിലോമീറ്റർ നീളമുള്ള പെരിഫറല് റോഡിലും 8.1 കിലോമീറ്റർ നീളമുള്ള ലിങ്ക് റോഡിലുമാണ് പുതിയ നിരക്കുകള് ബാധകമാകുന്നത്.
ഇരുചക്ര വാഹനങ്ങള്ക്കും കാറുകള്ക്കും യാത്ര ചെയ്യുന്ന ദൂരത്തിനനുസരിച്ച് കുറഞ്ഞത് 10 ശതമാനമെങ്കിലും ടോള് വർധിപ്പിച്ചിട്ടുണ്ട്. കണക്കുകള് അടുത്ത മുഴുവൻ സംഖ്യയിലേക്ക് റൗണ്ട് ഓഫ് ചെയ്താണ് പുതിയ നിരക്കുകള് നിശ്ചയിച്ചിരിക്കുന്നത്. നൈസ് റോഡ് വഴി ബനശങ്കരി, തവരേക്കരെ, ഇലക്ട്രോണിക്സ് സിറ്റി തുടങ്ങിയ പ്രദേശങ്ങളിലേക്ക് സർവീസ് നടത്തുന്ന ബിഎംടിസി ബസുകള് ഈ അധിക ടോള് ചെലവ് യാത്രക്കാരിലേക്ക് മാറ്റാൻ സാധ്യതയുണ്ടെന്നാണ് റിപ്പോർട്ട്.അതേസമയം, 9.98 കിലോമീറ്റർ നീളമുള്ള ഇലക്ട്രോണിക്സ് സിറ്റി എലിവേറ്റഡ് എക്സ്പ്രസ് വേയുടെയും, സില്ക്ക് ബോർഡ് ജംഗ്ഷൻ മുതല് കർണാടക-തമിഴ്നാട് അതിർത്തിവരെയുള്ള 24.36 കിലോമീറ്റർ ദേശീയപാത 44 ഭാഗത്തിന്റെയും ടോള് നിരക്കുകളും പുതുക്കിയിട്ടുണ്ട്. ഈ വർഷം മാർച്ച് 31 വരെയുള്ള മൊത്തവില സൂചിക അടിസ്ഥാനമാക്കിയാണ് പുതിയ നിരക്കുകള് നിശ്ചയിച്ചിരിക്കുന്നത്. ഇവ 2027 ജൂണ് 30 വരെ പ്രാബല്യത്തില് തുടരും.ഇലക്ട്രോണിക്സ് സിറ്റി എലിവേറ്റഡ് എക്സ്പ്രസ് വേയില് കാറുകള്, ജീപ്പുകള്, വാനുകള് എന്നിവയ്ക്ക് ഒരു ദിവസത്തിനുള്ളിലെ ഒന്നിലധികം യാത്രകള്ക്കുള്ള ടോള് 95 രൂപയില് നിന്ന് 100 രൂപയായി ഉയർന്നു.
പ്രതിമാസ പാസ് 1885 രൂപയില് നിന്ന് 1960 രൂപയായി വർധിക്കുകയും ചെയ്തിട്ടുണ്ട്. എന്നാല് ഒറ്റ യാത്രയ്ക്കുള്ള ടോളില് മാറ്റമില്ല.ഇരുചക്ര വാഹനങ്ങളുടെ പ്രതിമാസ പാസ് 755 രൂപയില് നിന്ന് 785 രൂപയായി ഉയർത്തിയെങ്കിലും ഒറ്റയാത്രയ്ക്കും ഒന്നിലധികം യാത്രകള്ക്കുമുള്ള ടോള് നിരക്കുകളില് മാറ്റമില്ല. അത്തിബെലെ ടോള് പ്ലാസയില് കാറുകള്, ജീപ്പുകള്, വാനുകള് എന്നിവയുടെ ഒന്നിലധികം യാത്രകള്ക്കുള്ള ടോള് 55 രൂപയില് നിന്ന് 60 രൂപയായി വർധിപ്പിച്ചു.ദേശീയപാത 44-ലെ 24.365 കിലോമീറ്റർ ഭാഗത്തിന്റെ പരിപാലന ചുമതലയുള്ള പ്രത്യേക ഉദ്ദേശ്യ കമ്പനിയായ ബെംഗളൂരു എലിവേറ്റഡ് ടോള്വേ പ്രൈവറ്റ് ലിമിറ്റഡ്ന്റെ കണ്സഷനെയർ മുംബൈ ആസ്ഥാനമായ ഗ്ലോബല് ഇൻഫ്രാസ്ട്രക്ച്ചർ പാർട്ണേഴ്സ് എന്ന കമ്പനിയാണ്. നിലവിലെ സാഹചര്യത്തില് വർധനവ് നേരിയതെന്ന് തോന്നുമെങ്കിലും സ്ഥിരം യാത്രക്കാരെ സംബന്ധിച്ച് ഇത് സാമ്പത്തികമായി ബാധിക്കുന്ന തീരുമാനം തന്നെയാണ്.
