കൊച്ചി: ഇത്തവണത്തെ ക്രിസ്മസ് അവധി ബെംഗളൂരുവിൽ പോയി അടിച്ചുപൊളിച്ചാലോ? യാത്രയെക്കുറിച്ചാണ് ആശങ്കയെങ്കിൽ അത് വേണ്ട, നാളെ തിരുവനന്തപുരത്ത് നിന്ന് പുറപ്പെടുന്ന സ്പെഷ്യൽ ട്രെയിനിൽ ഇപ്പോഴും സീറ്റുകൾ ബാക്കിയാണ്. എത്രയും പെട്ടെന്ന് ടിക്കറ്റെടുത്ത് യാത്ര പ്ലാൻ ചെയ്താൽ ഈ ക്രിസ്മസ് വെക്കേഷൻ അവിസ്മരണീയമാക്കാൻ കഴിയും. നേരത്തെ കേരളത്തിൽ നിന്ന് ബെംഗളൂരുവിലേക്ക് സ്പെഷ്യൽ ട്രെയിനുകൾ പ്രഖ്യാപിക്കാത്തത് യാത്രക്കാർ പ്രശ്നമായി ചൂണ്ടിക്കാട്ടിയിരുന്നെങ്കിലും അവസാന നിമിഷം റെയിൽവേ എസ്എംവിടി ബെംഗളൂരുവിൽ നിന്ന് സ്പെഷ്യൽ ട്രെയിൻ അനുവദിക്കുകയായിരുന്നു.
ഇന്ന് രാത്രി ബെംഗളൂരുവിൽ നിന്ന് വരുന്ന സ്പെഷ്യൽ ട്രെയിനിന്‍റെ മടക്കയാത്രയാണ് നാളെ. ബെംഗളൂരു – തിരുവന്തപുരം സർവീസിന്‍റെ ടിക്കറ്റുകൾ അതിവേഗത്തിൽ വിറ്റഴിഞ്ഞെങ്കിലും നാളത്തെ തിരുവനന്തപുരം – ബെംഗളൂരു ട്രെയിനിൽ ടിക്കറ്റുകൾ ബാക്കിയുണ്ട്. 06508 തിരുവനന്തപുരം നോർത്ത് – ബെംഗളൂരു സ്പെഷ്യൽ ട്രെയിൻ നാളെ വൈകീട്ട് 05:55നാണ് യാത്ര ആരംഭിക്കുക. ക്രിസ്മസ് ദിനത്തിൽ രാവിലെ 11:15ന് ട്രെയിൻ എസ്എംവിടി ബെംഗളൂരുവിലെത്തുകയും ചെയ്യും.
1 എസി ഫസ്റ്റ് ക്ലാസ് കോച്ച്, 2 എസി ടു ടയർ കോച്ചുകൾ, 3 എസി ത്രീ ടയർ കോച്ചുകൾ, 6 സ്ലീപ്പർ ക്ലാസ് കോച്ചുകൾ, 4 ജനറൽ സെക്കൻഡ് ക്ലാസ് കോച്ചുകൾ എന്നിവയുള്ള സ്പെഷ്യൽ ട്രെയിനിൽ നിലവിൽ സ്ലീപ്പർ ക്ലാസിൽ 154 ടിക്കറ്റുകളും 3 എ ക്ലാസിൽ 96 ടിക്കറ്റുകളും 2 എ ക്ലാസിൽ 70 ടിക്കറ്റുകളും, 1 എ ക്ലാസിൽ 16 ടിക്കറ്റുകളും ബാക്കിയുണ്ട് (തിങ്കളാഴ്ച രാവിലെ 10 മണിവരെയുള്ള ഐആർടിസി ട്രെയിൻ ടിക്കറ്റ് ബുക്കിങ് പ്രകാരം).സ്പെഷ്യൽ ട്രെയിനിൽ തിരുവനന്തപുരം നോർത്തിൽ നിന്ന് ബെംഗളൂരുവിലേക്ക് 1 എ ക്ലാസിന് 3190 രൂപയും, 2 എ ക്ലാസിന് 2070 രൂപ, 3 എ ക്ലാസിന് 1490 രൂപ, സ്ലീപ്പർ ക്ലാസിന് 550 രൂപയുമാണ് ടിക്കറ്റ് നിരക്ക്.വൈകീട്ട് 05:55 ന് തിരുവനന്തപുരം നോർത്തിൽ നിന്ന് പുറപ്പെടുന്ന ട്രെയിൻ 07:07 കൊല്ലം 07:43 കായംകുളം, 07:55 മാവേലിക്കര, 08:10 ചെങ്ങന്നൂർ, 08:24 തിരുവല്ല, 08:35 ചങ്ങനാശേരി, 08:57 കോട്ടയം, 10:10 എറണാകുളം, 10:37 ആലുവ, 11:37 തൃശൂർ, 01:20 പാലക്കാട് സ്റ്റേഷനുകളിലുമെത്തും.
