ബെംഗളൂരു: ട്രാഫിക് നിയമലംഘനങ്ങള്‍ പതിവാക്കിയ യുവതിക്ക് 1.36 ലക്ഷം രൂപ പിഴ ചുമത്തി ബെംഗളൂരു ട്രാഫിക് പോലീസ്.
270 നിയമലംഘന കേസുകളാണ് യുവതിയുടെ പേരില്‍ രജിസ്റ്റര്‍ ചെയ്തിട്ടുള്ളത്. ഹെല്‍മറ്റ് ധരിക്കാത്തതിനും, മൂന്ന് പേരെ ഇരുചക്ര വാഹനത്തില്‍ കയറ്റി സഞ്ചാരിച്ചതിനും, സിഗ്‌നല്‍ തെറ്റിച്ചതിനും ഇവര്‍ക്കെതിരെ കേസുകളുണ്ട്.
ഇവരുടെ ആക്ടിവ സ്‌കൂട്ടറും പോലീസ് പിടിച്ചെടുത്തു. നഗരത്തിനുള്ളിലെ പ്രധാന റൂട്ടിലുടനീളം സ്ഥാപിച്ച സിസിടിവി കാമറകളില്‍ നിയമലംഘനങ്ങളുടെ ദൃശ്യങ്ങള്‍ പതിഞ്ഞിട്ടുണ്ട്. ഇനിമുതല്‍ ഗതാഗത നിയമലംഘനം നടത്തില്ലെന്ന് സാക്ഷ്യപ്പെടുത്തിയ ഒരു കുറിപ്പും യുവതിയില്‍ നിന്ന് പോലീസ് വാങ്ങിയിട്ടുണ്ട്.
