ബെംഗളൂരു: നഗരത്തിലെ നിർദ്ദിഷ്ട തുരങ്കപാത ബെംഗളൂരുവിലെ ലാല്ബാഗ് ഭൂഗർഭശാസ്ത്ര സ്മാരകത്തിന് അപകടസാധ്യതകള് സൃഷ്ടിച്ചേക്കാമെന്ന് മുന്നറിയിപ്പുമായി ജിയോളജിക്കല് സർവേ ഓഫ് ഇന്ത്യ.ബൊട്ടാണിക്കല് ഗാർഡനില് തന്നെ നിർദേശിച്ചിരിക്കുന്ന ടണല് ബോറിംഗ് മെഷീൻ ഷാഫ്റ്റിന്റെ സ്ഥാനം സ്വതന്ത്രമായി സാങ്കേതികമായി പുനഃപരിശോധിക്കണമെന്നും ജിഎസ്ഐ ശുപാർശ ചെയ്തു.പ്രകാശ് ബെലവാടിയുടെ നേതൃത്വത്തില് സമർപ്പിച്ച പൊതുതാല്പര്യ ഹർജിയുമായി ബന്ധപ്പെട്ടാണ് 27 പേജുള്ള വിദഗ്ധ റിപ്പോർട്ട് കർണാടക ഹൈക്കോടതിയില് സമർപ്പിച്ചത്.
ലാല്ബാഗ് ബൊട്ടാണിക്കല് ഗാർഡനിലെ പെനിൻസുലാർ ഗ്നൈസിക് കോംപ്ലക്സ് എന്ന ദേശീയ ഭൂഗർഭശാസ്ത്ര സ്മാരകത്തിന് അടിയിലൂടെയോ അതിന് സമീപത്തുകൂടിയോ കടന്നുപോകുന്ന നിർദേശിച്ച 16.7 കിലോമീറ്റർ ഭൂഗർഭ തുരങ്കപാതയുടെ ഭൂഗർഭശാസ്ത്ര, ജിയോടെക്നിക്കല് ആഘാതങ്ങളാണ് റിപ്പോർട്ട് പ്രധാനമായും പരിശോധിക്കുന്നത്.ഹെബ്ബാള് എസ്റ്റീം മാള് ജങ്ഷൻ മുതല് സെൻട്രല് സില്ക്ക് ബോർഡ് വരെയാണ് തുരങ്കപാത നിർദേശിച്ചിരിക്കുന്നത്. തുരങ്കം ഭൂഗർഭശാസ്ത്ര സ്മാരകത്തിന് അടിയിലൂടെ കടന്നുപോകാൻ സാധ്യതയുണ്ടെന്ന് ചൂണ്ടിക്കാട്ടി ബെംഗളൂരു സൗത്ത് എംപി തേജസ്വി സൂര്യ 2025 ഒക്ടോബറില് ജിഎസ്ഐക്ക് കത്തയച്ചതിനെ തുടർന്നാണ് വിലയിരുത്തല് ആരംഭിച്ചത്.ഇക്കഴിഞ്ഞ മാർച്ചില് ജിഎസ്ഐ ആഭ്യന്തര വിദഗ്ധ സമിതി രൂപീകരിച്ചു. മാർച്ച് 30 മുതല് ഏപ്രില് 1 വരെ സമിതി ലാല്ബാഗില് സ്ഥലപരിശോധന നടത്തി.
വിശദമായ ഡിസൈൻ തയ്യാറാക്കുന്നതിനും നിർമാണത്തിന് മുമ്പുള്ള പ്രവർത്തനങ്ങള് ആരംഭിക്കുന്നതിനും മുമ്പ് ഷാഫ്റ്റിനും സംരക്ഷിത സ്മാരകത്തിനുമിടയിലെ അകലം പരമാവധി വർധിപ്പിക്കണമെന്നാണ് ജിഎസ്ഐ നിർദ്ദേശം.റിപ്പോർട്ട് പ്രകാരം ഷാഫ്റ്റിന് ഏകദേശം 40 മീറ്റർ ആഴമുണ്ടാകും. ഇവിടെ കടുപ്പമുള്ള ഗ്രാനൈറ്റ് ഗ്നൈസ് പാറകള് കണ്ടെത്താൻ സാധ്യതയുള്ളതിനാല് വലിയ തോതിലുള്ള ഡ്രില്ലിംഗും സ്ഫോടന പ്രവർത്തനങ്ങളും ആവശ്യമായി വന്നേക്കാം. ഇത്തരം ഖനന പ്രവർത്തനങ്ങള് കൃത്യമായി രൂപകല്പ്പന ചെയ്യുകയും നിരീക്ഷിക്കുകയും ചെയ്തില്ലെങ്കില്, ഉണ്ടാകുന്ന വൈബ്രേഷനും പാറയിലെ സമ്മർദ്ദ പുനർവിതരണവും പുരാതന പാറകളില് പുതിയ വിള്ളലുകള് രൂപപ്പെടുന്നതിനോ നിലവിലുള്ള വിള്ളലുകള് കൂടുതല് വികസിക്കുന്നതിനോ കാരണമാകാമെന്നാണ് മുന്നറിയിപ്പ്.സ്മാരകത്തിന്റെ മുകളില് സ്ഥിതി ചെയ്യുന്ന ചരിത്രപ്രസിദ്ധമായ കെംപെ ഗൗഡ വാച്ച് ടവർ തുരങ്ക ഷാഫ്റ്റിന് സമീപത്തായതിനാല് ആശങ്ക കൂടുതല് ശക്തമാകുന്നു. നിർമ്മാണ പ്രവർത്തനങ്ങളില് നിന്നുള്ള വൈബ്രേഷനും പാറകളിലുണ്ടാകാവുന്ന ആഘാതവുമാണ് ഇതിന് കാരണം.
ലാല്ബാഗ് മേഖലയിലെ നിലവിലുള്ള ഭൂഗർഭ പരിശോധനകള് പര്യാപ്തമല്ലെന്നും, പ്രദേശത്തെ ഭൂഗർഭശാസ്ത്രപരമായ വ്യതിയാനങ്ങളും അതിന്റെ സംവേദനക്ഷമതയും കണക്കിലെടുത്ത് കൂടുതല് പരിശോധനകള് ആവശ്യമാണെന്നും ജിഎസ്ഐ വ്യക്തമാക്കി.വിശദമായ പദ്ധതി റിപ്പോർട്ടില് രണ്ട് ബോർഹോളുകളും ഏകദേശം 115 മീറ്റർ വീതം നീളമുള്ള രണ്ട് സീസ്മിക് റിഫ്രാക്ഷൻ പ്രൊഫൈലുകളും ഉള്പ്പെടുത്തിയിട്ടുണ്ട്. ഒരു ബോർഹോളില് 28.5 മീറ്റർ കനമുള്ള സാന്ദ്രമായ സില്ട്ടി മണല് പാളിക്ക് താഴെയാണ് പാറ കണ്ടെത്തിയത്. മറ്റൊരു ബോർഹോളില് ഭൂനിരപ്പിന് തൊട്ടുതാഴെയോ അതിനോട് ചേർന്നോ പാറ കണ്ടെത്തി.സീസ്മിക് സർവേയിലും വ്യത്യാസങ്ങള് കണ്ടെത്തി. ഒരു പ്രൊഫൈലില് ഏകദേശം 15 മുതല് 18 മീറ്റർ ആഴത്തിലാണ് പുതിയ പാറ കണ്ടെത്തിയത്. മറ്റൊരു പ്രൊഫൈലില് 1 മുതല് 12 മീറ്റർ വരെ ആഴത്തില് തന്നെ പാറ കണ്ടെത്തി.
ഡിസൈൻ അന്തിമമാക്കുന്നതിന് മുമ്പ് കൂടുതല് ബോർഹോളുകള്, ജിയോഫിസിക്കല് സർവേകള്, ത്രിമാന ഭൂഗർഭശാസ്ത്ര മോഡലിങ് എന്നിവ നടത്തണമെന്നും ഏജൻസി ശുപാർശ ചെയ്തു.ലാല്ബാഗ് മേഖലയിലൂടെ നിർദേശിച്ചിരിക്കുന്ന തുരങ്കത്തിന് മുകളിലുള്ള മണ്ണിന്റെയും പാറയുടെയും പാളി താരതമ്യേന കുറവാണ്. തുരങ്കത്തിന്റെ മുകള്ഭാഗത്തിന് ഏകദേശം 20.5 മുതല് 23.5 മീറ്റർ വരെ കവർ മാത്രമാണുണ്ടാകുക. ഓരോ തുരങ്കത്തിന്റെയും കുഴിച്ചെടുക്കേണ്ട വ്യാസം ഏകദേശം 14.6 മീറ്ററാണ്.ഇത് ഭൂതലത്തില് മണ്ണ് താഴ്ന്നുപോകുന്നതിനും ഭൂമിയുടെ ഘടനയില് മാറ്റമുണ്ടാകുന്നതിനുമുള്ള സാധ്യത വർധിപ്പിക്കാമെന്ന് ജിഎസ്ഐ വ്യക്തമാക്കി.ലാല്ബാഗ് തടാകത്തിന്റെ സാമീപ്യം കണക്കിലെടുത്ത് ഭൂഗർഭജലത്തെ ബാധിക്കാനുള്ള സാധ്യതയും ജിഎസ്ഐ ചൂണ്ടിക്കാട്ടി. നിർമാണ ഘട്ടത്തിലെ ഭൂഗർഭജലം പമ്പ് ചെയ്ത് നീക്കം ചെയ്യുന്നതും, സ്ഥിരമായ ഡ്രെയിനേജ് സംവിധാനവും ഭൂഗർഭജലനിരപ്പില് മാറ്റമുണ്ടാക്കുകയോ പാറകളിലെ വിള്ളലുകളിലൂടെ ജലത്തിന്റെ ഒഴുക്ക് തിരിച്ചുവിടുകയോ ചെയ്യാമെന്നാണ് അവർ ചൂണ്ടിക്കാണിക്കുന്നത്.
