മുംബൈയുടെ ലോക്കല് ട്രെയിനുകളിലെ തിരക്ക് നഗരജീവിതത്തിന്റെ പതിവ് കാഴ്ചയാണ്. എന്നാല് തിരക്ക് അതിരുവിടുമ്പോള് യാത്രക്കാർ നേരിടുന്ന അപകടസാധ്യത എത്രത്തോളം ഗുരുതരമാണെന്ന് വ്യക്തമാക്കുന്ന ദൃശ്യങ്ങളാണ് ഇപ്പോള് സോഷ്യല് മീഡിയയില് വൈറലാകുന്നത്.ഓടിക്കൊണ്ടിരിക്കുന്ന തിരക്കേറിയ ലോക്കല് ട്രെയിനിന്റെ പുറത്തേക്ക് തൂങ്ങിനിന്ന് യാത്ര ചെയ്യുന്ന രണ്ട് സ്ത്രീകളുടെ വീഡിയോയാണ് വലിയ ചർച്ചയ്ക്ക് വഴിവെച്ചിരിക്കുന്നത്.വൈറലായ വീഡിയോയില് ഒരാള് വെള്ളയും പൂക്കളുമുള്ള ടോപ്പും നീലനിറത്തിലുള്ള പാന്റും ധരിച്ച് ട്രെയിനിന്റെ വശത്ത് മുറുകെ പിടിച്ച് നില്ക്കുന്നതാണ് കാണുന്നത്.
തോളില് ബാഗും ഉണ്ടായിരുന്നു. മറ്റൊരു സ്ത്രീയും തൊട്ടടുത്തായി ട്രെയിനിന്റെ പുറത്ത് പിടിച്ചുനിന്ന് യാത്ര ചെയ്യുന്നതായി ദൃശ്യങ്ങളില് വ്യക്തമാണ്. ട്രെയിൻ വേഗത്തില് സഞ്ചരിക്കുന്നതിനിടെയായിരുന്നു ഈ അപകടകരമായ യാത്ര.വീഡിയോ പുറത്തുവന്നതോടെ സോഷ്യല് മീഡിയയില് സമ്മിശ്ര പ്രതികരണങ്ങളാണ് ഉയർന്നത്. ചിലർ സ്ത്രീകള് ഇത്തരത്തില് ജീവൻ പണയപ്പെടുത്തി യാത്ര ചെയ്യുന്നതിനെ വിമർശിച്ചപ്പോള്, മറ്റുചിലർ മുംബൈയിലെ ലോക്കല് ട്രെയിനുകളിലെ അമിത തിരക്കും യാത്രക്കാരുടെ സമ്മർദവുമാണ് ഇത്തരം സാഹചര്യങ്ങളിലേക്ക് ആളുകളെ നയിക്കുന്നതെന്ന് ചൂണ്ടിക്കാട്ടി. നഗരത്തിന്റെ പ്രശസ്തമായ ‘മുംബൈ സ്പിരിറ്റ്’ എന്ന പേരില് ഇത്തരം അപകടകരമായ യാത്രകളെ മഹത്വവത്കരിക്കരുതെന്നും പലരും അഭിപ്രായപ്പെട്ടു.
മുംബൈയുടെ ഉപനഗര റെയില് ശൃംഖലയില് പ്രതിദിനം വലിയ തോതില് ആളുകളാണ് യാത്ര ചെയ്യുന്നത്. അതിനാല് തന്നെ യാത്രക്കാരുടെ സുരക്ഷയും തിരക്ക് നിയന്ത്രിക്കുന്നതിനുള്ള സംവിധാനങ്ങളും കൂടുതല് ശക്തമാക്കണമെന്ന ആവശ്യവും ഈ വീഡിയോയ്ക്ക് പിന്നാലെ ഉയരുകയാണ്. ‘മുംബൈ സ്പിരിറ്റ്’ എന്ന് വിളിക്കപ്പെടുന്ന അതിജീവന മനോഭാവം, ജീവൻ അപകടത്തിലാക്കുന്ന യാത്രയെ സാധാരണ കാഴ്ചയാക്കി മാറ്റുന്നതാകരുതെന്ന ചർച്ചയ്ക്കാണ് ഈ വൈറല് ദൃശ്യങ്ങള് ഇപ്പോള് വഴിതുറന്നിരിക്കുന്നത്.
