ബെംഗളൂരു: കര്ണാടക മുഖ്യമന്ത്രി പദവിയില് നിന്ന് സിദ്ധരാമയ്യ രാജിവെച്ചേക്കുമെന്ന അഭ്യൂഹങ്ങള് ശക്തമാകുന്നതിനിടെ, വ്യാഴാഴ്ച രാവിലെ അദ്ദേഹം മന്ത്രിസഭാ അംഗങ്ങള്ക്കായി നിര്ണ്ണായകമായ ഒരു പ്രഭാതഭക്ഷണ യോഗം ഒരുക്കുന്നതായി ഔദ്യോഗിക വൃത്തങ്ങള് അറിയിച്ചു.സാഹചര്യത്തിന്റെ ഗൗരവം വ്യക്തമാക്കിക്കൊണ്ട് ഉപമുഖ്യമന്ത്രി ഡി.കെ. ശിവകുമാര് തന്റെ ദല്ഹി യാത്ര വെട്ടിച്ചുരുക്കി വ്യാഴാഴ്ച പുലര്ച്ചെ തന്നെ ബെംഗളൂരുവിലേക്ക് തിരിക്കും. മുഖ്യമന്ത്രിയുടെ ഔദ്യോഗിക വസതിയില് നടക്കുന്ന ഈ യോഗത്തില് പങ്കെടുക്കാനാണ് അദ്ദേഹം നേരത്തെ മടങ്ങുന്നത്.സംസ്ഥാനത്ത് നേതൃമാറ്റം വേണമെന്നും സിദ്ധരാമയ്യ എ.ഐ.സി.സി തലത്തില് കേന്ദ്ര പദവിയും രാജ്യസഭാ സീറ്റും ഏറ്റെടുക്കണമെന്നും കോണ്ഗ്രസ് ഹൈക്കമാന്ഡ് ആവശ്യപ്പെട്ടതായാണ് റിപ്പോര്ട്ട്.
ലോക്സഭാ പ്രതിപക്ഷ നേതാവ് രാഹുല് ഗാന്ധിയില് നിന്ന് നേരിട്ട് സന്ദേശം ലഭിച്ച പശ്ചാത്തലത്തിലാണ് സിദ്ധരാമയ്യ രാജിവെക്കാന് ഒരുങ്ങുന്നതെന്ന് അറിയുന്നു. രാഹുല് ഗാന്ധി ആവശ്യപ്പെട്ടാല് താന് സ്ഥാനം ഒഴിയുമെന്ന് സിദ്ധരാമയ്യ മുന്പ് പലതവണ വ്യക്തമാക്കിയിരുന്നു.എന്നാല്, കര്ണാടകയിലെ നേതൃമാറ്റ വാര്ത്തകള് വെറും ഊഹാപോഹങ്ങള് മാത്രമാണെന്നാണ് കോണ്ഗ്രസ് നേതൃത്വത്തിന്റെ ഔദ്യോഗിക പ്രതികരണം.വരാനിരിക്കുന്ന രാജ്യസഭാ, ലെജിസ്ലേറ്റീവ് കൗണ്സില് തിരഞ്ഞെടുപ്പുകളെക്കുറിച്ച് ചര്ച്ച ചെയ്യാനാണ് സിദ്ധരാമയ്യയെയും ശിവകുമാറിനെയും എ.ഐ.സി.സി അധ്യക്ഷന് മല്ലികാര്ജുന് ഖാര്ഗെ, രാഹുല് ഗാന്ധി, കെ.സി. വേണുഗോപാല് എന്നിവര് ചൊവ്വാഴ്ച ദല്ഹിയിലേക്ക് വിളിച്ചതെന്നാണ് പാര്ട്ടി വ്യക്തമാക്കുന്നത്.കോണ്ഗ്രസ് സര്ക്കാര് തങ്ങളുടെ ഭരണകാലയളവിന്റെ പകുതി (രണ്ടര വര്ഷം) 2025 നവംബര് 20-ഓടെ പൂര്ത്തിയാക്കിയ സാഹചര്യത്തിലാണ് നേതൃമാറ്റത്തിനായുള്ള സമ്മര്ദ്ദം ഡി.കെ. ശിവകുമാര് ക്യാമ്പ് ശക്തമാക്കിയത്.
