തിരുവനന്തപുരം: ബുറേവി ചുഴലിക്കാറ്റ് വെള്ളിയാഴ്ചയോടെ. തിരുവനന്തപുരം മേഖലയില് എത്തുമെന്നാണ് വിദഗ്ധ പ്രവചനമെന്ന് മുഖ്യമന്ത്രി പിണറായി വിജയന്. ഡിസംബര് നാലിന് പുലര്ച്ചെ തെക്കന് തമിഴ്നാട്ടിലും തുടര്ന്ന് കേരളത്തിലും എത്തും. തിരുവനന്തപുരം മുതല് എറണാകുളം വരെ ഏഴ് ജില്ലകളില് ശക്തമായ മഴയും കാറ്റും ഉണ്ടാകും മൂന്ന് മുതല് അഞ്ച് ദിവസം വരെയാണ് ഇത് തുടരുക. ചുഴലിക്കാറ്റ് സ്ഥിതി വിലയിരുത്താന് പ്രധാനമന്ത്രി സംസാരിച്ചിരുന്നു. സംസ്ഥാനം സ്വീകരിച്ച നടപടികള് പ്രധാനമന്ത്രിയോട് വിശദീകരിച്ചിട്ടുണ്ടെന്നും മുഖ്യമന്ത്രി പറഞ്ഞു.
തീരദേശമേഖലയില് ശക്തമായ കടല് ക്ഷോഭത്തിനും സാധ്യതയുണ്ടെന്ന് വിലയിരുത്തലുണ്ട്.
മീന് പിടുത്തക്കാര്ക്ക് ശനിയാഴ്ച വരെ വിലക്ക് ഏര്പ്പെടുത്തിയിട്ടുണ്ട്. ഇടുക്കി അടക്കമുള്ള മലയോര ജില്ലകളില് മണിക്കൂറില് അറുപത് കിലോമീറ്ററിന് മുകളില് കാറ്റ് വീശാന് സാധ്യതയുണ്ട്. മലയോര മേഖലയില് മണ്ണിടിച്ചിലിനും ഉരുള്പ്പൊട്ടലിനും സാധ്യതയുണ്ട്. തിരുവനന്തപുരം കൊല്ലം പത്തനംതിട്ട ആലപ്പുഴ കോട്ടയം ഇടുക്കിയുടെ ഒരു ഭാഗം മഴയും കാറ്റും അതി തീവ്ര മഴ കാരണം വെള്ളപ്പൊക്കത്തിനും സാധ്യതയുണ്ടെന്നാണ് കണക്ക് കൂട്ടുന്നത്.
നിലവില് സംസ്ഥാനത്താകെ 13 ക്യാമ്ബുകളിലായി 690 പേര് താമസിക്കുന്നുണ്ട്. ശക്തമായ കാറ്റ് അടക്കം അസാധാരണ സാഹചര്യം ആണ് മുന്നിലുള്ളത്. അപകട സാധ്യത മുന്നില് കണ്ട് മുന്കരുതലെടുത്തണം. മേല്ക്കൂര ശക്തമല്ലാത്ത വീടുകളില് താമസിപ്പിക്കുന്നവരെ മാറ്റി താമസിപ്പിക്കും. അപകട സാധ്യതയുള്ള മരങ്ങള് മുറിച്ച് മാറ്റാന് അടക്കം നടപടി എടുക്കും.
ചുഴലിക്കാറ്റിന്റെ സാന്നിധ്യം നാളെ ഉച്ചക്ക് ശേഷം തലസ്ഥാന ജില്ലയില് അനുഭവപ്പെട്ട് തുടങ്ങുമെന്നാണ് ഇപ്പോഴുള്ള വിലയിരുത്തല്. സംസ്ഥാനത്ത് പ്രവേശിക്കും മുമ്ബ് കാറ്റിന്റെ ശക്തി കുറയുമെങ്കിലും തലസ്ഥാന ജില്ലയില് നാശ നഷ്ടങ്ങള്ക്ക് ഇടയാക്കുമെന്ന മുന്നറിയിപ്പ് കേന്ദ്ര കാലാവസ്ഥാ കേന്ദ്രം അറിയിച്ചിട്ടുണ്ട്. തിരുവനന്തപുരം മുതല് ആലപ്പുഴ വരെയുള്ള ജില്ലകളില് നാളെ റെഡ് അലര്ട്ട് പ്രഖ്യാപിച്ചിട്ടുണ്ട്. കനത്ത കാറ്റിന് ഒപ്പം അതി തീവ്ര മഴയും ഉണ്ടാകുമെന്ന് മുന്നറിയിപ്പ് ഉണ്ട്. 1077 എന്ന നമ്ബറില് തിരുവനന്തപുരം കളക്ട്രേറ്റില് കണ്ട്രോള് റൂം തുറന്നിട്ടുണ്ട്. 0471 2330077, 0471 2333101 എന്നീ നമ്ബറുകളില് തിരുവനന്തപുരം ഫയര് ഫോഴ്സ് കണ്ട്രോള് റൂമിലേക്കും വിളിക്കാം.
24 മണിക്കൂറും കണ്ട്രോള് റൂം പ്രവര്ത്തിക്കും. പത്തനംതിട്ട ജില്ലയില് കനത്ത കാറ്റും മഴയും ഉണ്ടാകുമെന്നാണ് മുന്നറിയിപ്പ്. അതുകൊണ്ട് തന്നെ ചുഴലിക്കാറ്റ് കടന്ന് പോകും വരെ ശബരിമല പ്രവേശനത്തിന് നിയന്ത്രണം ഏര്പ്പെടുത്തും. വേണ്ട മുന്കരുതലും ജാഗ്രതയും എടുക്കാന് പത്തനംതിട്ട ജില്ലാ ഭരണകൂടത്തിന് നിര്ദ്ദേശം നല്കിയിട്ടുണ്ട്. തെരഞ്ഞെടുപ്പ് പ്രവര്ത്തനങ്ങള്ക്കും പ്രചാരണത്തിനും ജാഗ്രത വേണം. കൊവിഡ് സാഹചര്യം മുന്നില് കണ്ട് വേണം രക്ഷാ ദുരിതാശ്വാസ പ്രവര്ത്തനങ്ങള് അടക്കം ഏകോപിപ്പിക്കാനെന്നും മുഖ്യമന്ത്രി പറഞ്ഞു.
വേണ്ട മുന്കരുതലെടുക്കാന് ആരോഗ്യ സംവിധാനങ്ങള്ക്കും നിര്ദ്ദേശം നല്കിയിട്ടുണ്ട്. പ്രകൃതി ക്ഷോഭം സൃഷ്ടിക്കാവുന്ന അധിക ഉത്തരവാദിത്തമാണ് ആരോഗ്യ പ്രവര്ത്തകര്ക്ക് ഉണ്ടാകുന്നത്. പൊതു ജനങ്ങള് അത് കൊണ്ടുതന്നെ വിട്ടുവീഴ്ച ഇല്ലാത്ത ജാഗ്രത പുലര്ത്തണം എന്നും മുഖ്യമന്ത്രി പറഞ്ഞു. പൊതുജനങ്ങളുടെ കൂട്ടായ പ്രവര്ത്തനമാണ് മഹാമാരിയുടെ കാലത്ത് അടക്കം കേരളത്തില് കണ്ടത്. പൊതു പ്രശ്നം എന്ന് കണ്ട് ഇടപെടാന് എല്ലാവര്ക്കും കഴിയണമെന്നും മുഖ്യമന്ത്രി ആവശ്യപ്പെട്ടു.
