ബെംഗളൂരു: രാജ്യത്തിന്റെ പല ഭാഗങ്ങളില് നിന്നും തെക്കുപടിഞ്ഞാറൻ മണ്സൂണ് പിവാങ്ങുന്ന സാഹചര്യം തുടരുന്നതിനിടെ ഐടി നഗരമായ ബെംഗളൂരുവില് മഴയ്ക്ക് സാധ്യത.ബംഗാള് ഉള്ക്കടലില് രൂപപ്പെടുന്ന കാലാവസ്ഥാ വ്യതിയാനം നഗരത്തില് മഴയ്ക്ക് കാരണമാകുമെന്ന സൂചനകളാണ് നല്കുന്നത്. ബംഗാള് ഉള്ക്കടലില് രൂപപ്പെടുന്ന കാലാവസ്ഥാ വ്യതിയാനം വരും ദിവസങ്ങളില് ശക്തിപ്രാപിക്കും. ഇതോടെ നഗരത്തില് ഒറ്റപ്പെട്ടയിടങ്ങളില് നേരിയ മഴയ്ക്കോ ഇടിമിന്നലോട് കൂടിയ മഴയ്ക്കോ സാധ്യതയുണ്ട്.ബെംഗളൂരു നഗരത്തില് ചൂടുള്ള കാലാവസ്ഥ തുടരുന്നതിനിടെയാണ് വരും ദിവസങ്ങളില് മഴയ്ക്ക് സാധ്യതയുണ്ടെന്ന മുന്നറിയിപ്പ് കാലാവസ്ഥാ വകുപ്പ് നല്കിയത്.
ശനിയാഴ്ച വൈകുന്നേരത്തോടെ വടക്കൻ ആൻഡമാൻ കടലിലും അതിനോട് ചേർന്നുള്ള പ്രദേശങ്ങളിലും ന്യൂനമർദം രൂപപ്പെടാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ന്യൂനമർദം പടിഞ്ഞാറ് – വടക്കുപടിഞ്ഞാറ് ദിശയിലേക്ക് നീങ്ങുകയും തുടർന്ന് തിങ്കളാഴ്ചയോടെ കിഴക്കൻ – മധ്യ ബംഗാള് ഉള്ക്കടലില് ന്യൂനമർദത്തിന് കാരണമാകുകയും ചെയ്യും.ചൊവ്വാഴ്ചയോടെ പടിഞ്ഞാറൻ – മധ്യ ബംഗാള് ഉള്ക്കടലില് തീവ്ര ന്യൂനമർദമായി ശക്തിപ്രാപിക്കുമെന്ന് പ്രതീക്ഷിക്കുന്നു. തുടർന്ന് പടിഞ്ഞാറ് – വടക്കുപടിഞ്ഞാറ് ദിശയില് സഞ്ചരിച്ച് ബുധനാഴ്ചയോടെ തെക്കൻ ഒഡീഷ – വടക്കൻ ആന്ധ്രാ പ്രദേശ് തീരങ്ങള്ക്ക് അടുത്തെത്തുമെന്നുമാണ് കാലാവസ്ഥാ മുന്നറിയിപ്പ്.ബംഗാള് ഉള്ക്കടലില് അതിവേഗം രൂപപ്പെടുന്ന ന്യൂനമർദം അന്തരീക്ഷത്തിലെ ഈർപ്പം കരയിലേക്ക് ആകർഷിക്കുന്നതിലൂടെ ചൂടിന് ശമനം ഉണ്ടായേക്കാം.
തീരദേശ ജില്ലകള്ക്കും ബെലഗാവി, ഗദഗ്, ധാർവാഡ്, ഹവേരി, ബിദാർ, കലബുറഗി, ചിക്കമഗളൂരു, ഹാസൻ, കൊടഗ് എന്നീ ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലേർട്ട് മുന്നറിയിപ്പ് നല്കി. ചൊവ്വാഴ്ച മുതല് വ്യാഴാഴ്ചവരെയുള്ള ദിവസങ്ങളില് കർണാടകയുടെ വിവിധ ഭാഗങ്ങളില് മഴ ശക്തമാകാൻ സാധ്യതയുണ്ട്.മറാത്ത്വാഡ മുതല് തെക്കുകിഴക്കൻ അറബിക്കടല് വരെ കർണാടകയുടെ ഉള്പ്രദേശങ്ങളിലൂടെയും കേരളത്തിലൂടെയും ഒരു ന്യൂനമർദ പാത്തി രൂപപ്പെടാൻ സാധ്യതയുണ്ടെന്ന് ബെംഗളൂരുവിലെ ഒരു കേന്ദ്ര കാലാവസ്ഥാ വകുപ്പ് ജീവനക്കാരൻ അറിയിച്ചു. ഇത് അടുത്ത ആഴ്ചയുടെ ആദ്യ പകുതിയില് ഇടിമിന്നലോട് കൂടിയ മഴയ്ക്ക് കാരണമാകും. തെക്കൻ കർണാടകയുടെ ഉള്പ്രദേശങ്ങളിലെ ജില്ലകളില് മണിക്കൂറില് 30 മുതല് 40 കിലോമീറ്റർ വരെ വേഗതയുള്ള ശക്തമായ കാറ്റിനൊപ്പം ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്ന് അദ്ദേഹം മുന്നറിയിപ്പ് നല്കി.
