ബെംഗളൂരു: നഗരത്തിലെ ചുറ്റിപ്പറ്റിയുള്ള സാറ്റലൈറ്റ് ടൗണ് റിംഗ് റോഡ് അഥവാ എസ്ടിആർആർ പദ്ധതി ഘട്ടംഘട്ടമായി മുന്നേറുകയാണ്.280 കിലോമീറ്ററിലധികം ദൈർഘ്യമുള്ള ഈ റിംഗ് റോഡ് നഗരത്തിന്റെ പ്രധാന ഭാഗങ്ങളിലേക്ക് പ്രവേശിക്കാതെ തന്നെ ബെംഗളൂരുവിന്റെ വിവിധ പ്രാന്തപ്രദേശങ്ങള് തമ്മില് എളുപ്പത്തില് ബന്ധിപ്പിക്കുകയാണ് ലക്ഷ്യമിടുന്നത്. 2026-2027 കാലയളവില് കൂടുതല് ഭാഗങ്ങള് ഗതാഗതത്തിനായി തുറക്കുന്നതോടെ നഗരത്തിന് ചുറ്റുമുള്ള യാത്രാ സൗകര്യം കൂടുതല് മെച്ചപ്പെടുമെന്നാണ് പ്രതീക്ഷ.എസ്ടിആർആറിന്റെ ചില ഭാഗങ്ങള് ഇതിനകം ഗതാഗതത്തിനായി തുറന്നുകഴിഞ്ഞു. മറ്റു ചില ഭാഗങ്ങളില് നിർമ്മാണം പുരോഗമിക്കുകയാണ്.
നിലവില് പ്രവർത്തിക്കുന്ന ഭാഗങ്ങള് വഴി നഗരത്തിലെ ഒരു പ്രദേശത്തുനിന്ന് മറ്റൊരു പ്രദേശത്തേക്ക് പോകാൻ നഗരമധ്യത്തിലൂടെ സഞ്ചരിക്കേണ്ട ആവശ്യം കുറയുന്നു എന്നതാണ് ഏറ്റവും വലിയ പ്രത്യേകത. ഇതിലൂടെ പ്രധാന നഗര റോഡുകളിലെ ഗതാഗത സമ്മർദം കുറയ്ക്കാനും യാത്രാ സമയം ലാഭിക്കാനും സാധിക്കും.ഹൊസ്കോട്ടെ മേഖലയ്ക്കാണ് പദ്ധതിയില് പ്രത്യേക പ്രാധാന്യമുള്ളത്. ഹൊസ്കോട്ടെയുമായി ബന്ധിപ്പിക്കുന്ന എസ്ടിആർആർ ഭാഗങ്ങള് കൂടുതല് വികസിക്കുന്നതോടെ ഈ പ്രദേശത്തുനിന്ന് ബെംഗളൂരുവിന്റെ മറ്റു പ്രാന്തപ്രദേശങ്ങളിലേക്കുള്ള യാത്ര കൂടുതല് എളുപ്പമാകും. ഹൊസ്കോട്ടെ വഴി വിവിധ പ്രധാന റോഡുകളിലേക്കും വ്യവസായ, താമസ മേഖലകളിലേക്കും മികച്ച ബന്ധം ലഭിക്കുമെന്നതാണ് കാര്യം.അനേക്കല്, സർജാപൂർ, ദൊഡ്ഡബല്ലാപൂർ, ദേവനഹള്ളി, നെലമംഗല തുടങ്ങിയ പ്രധാന പ്രാന്തപ്രദേശങ്ങളെയും എസ്ടിആർആർ ബന്ധിപ്പിക്കുന്നു. ഈ പ്രദേശങ്ങളെ തമ്മില് നേരിട്ട് ബന്ധിപ്പിക്കുന്ന റോഡ് ശൃംഖല വികസിക്കുന്നതോടെ ബെംഗളൂരുവിന്റെ നഗരപരിധിക്ക് പുറത്തുള്ള മേഖലകളിലേക്കുള്ള യാത്ര കൂടുതല് സുഗമമാകും.
ഹൊസ്കോട്ടെയിലെ എസ്ടിആർആർ ബന്ധം പുതിയ താമസ, വാണിജ്യ മേഖലകള്ക്കും ഗുണകരമാകുമെന്നാണ് റിപ്പോർട്ടിലെ വിലയിരുത്തല്. ഹൊസ്കോട്ടെയ്ക്ക് സമീപമുള്ള സോഭ വണ്വേള്ഡ് പോലുള്ള വലിയ വികസന പദ്ധതികള്ക്കും എസ്ടിആർആറിലേക്കുള്ള നേരിട്ടുള്ള ബന്ധം ലഭിക്കുന്നുണ്ട്. ഇതോടെ ഈ മേഖലയില് നിന്നുള്ള യാത്ര കൂടുതല് എളുപ്പമാകും.എസ്ടിആർആറിന്റെ എല്ലാ ഭാഗങ്ങളും ഒരേസമയം പൂർത്തിയാക്കുന്നതിന് പകരം വിവിധ ഘട്ടങ്ങളിലായാണ് പദ്ധതി മുന്നോട്ടുപോകുന്നത്. ഇതിനകം പൂർത്തിയായ ഭാഗങ്ങള് ഉപയോഗത്തിലേക്ക് കൊണ്ടുവരുകയും ശേഷിക്കുന്ന ഭാഗങ്ങളുടെ നിർമാണം പൂർത്തിയാക്കുകയും ചെയ്യുന്ന രീതിയിലാണ് പ്രവർത്തനം.2026-2027 കാലയളവില് കൂടുതല് ഭാഗങ്ങള് പ്രവർത്തനക്ഷമമാകുന്നതോടെ ബെംഗളൂരുവിന്റെ ചുറ്റുമുള്ള ഗതാഗത ബന്ധം കൂടുതല് ശക്തമാകുമെന്നാണ് പ്രതീക്ഷ. നഗരത്തിലെ തിരക്കിനെ ഗണ്യമായി കുറയ്ക്കാനും ഈ റോഡിന്റെ വരവോടെ സാധിക്കുമെന്നാണ് കരുതപ്പെടുന്നത്. അതിലൂടെ ബെംഗളൂരുവിലെ ഗതാഗത കുരുക്ക് ഒരുപരിധി വരെ പിടിച്ചു നിർത്താൻ സാധിക്കുമെന്നും വിലയിരുത്തലുണ്ട്.
