ബെംഗളൂരു: ബെംഗളൂരുവിലെ ഓട്ടോറിക്ഷാ ഡ്രൈവര്മാര്ക്കെതിരെ കര്ശന നടപടിയുമായി പൊലീസ്. യാത്രക്കാരില് നിന്ന് അമിത നിരക്ക് ഈടാക്കുന്നു, ചോദ്യം ചെയ്യുന്ന യാത്രക്കാരെ ഉപദ്രവിക്കുന്നു എന്നീ പരാതികള് ഉയര്ന്നതിന് പിന്നാലെയാണ് നടപടി.യാത്രക്കാരെ ഉപദ്രവിക്കുന്നതായി ആരോപിക്കപ്പെടുന്ന ഓട്ടോറിക്ഷാ ഡ്രൈവര്മാര്ക്കെതിരെ നിരവധി കേസുകളും രജിസ്റ്റര് ചെയ്തിട്ടുണ്ട്.യാത്രക്കാരില് നിന്ന് അമിത നിരക്ക് ഈടാക്കിയതിനും ആവശ്യപ്പെട്ട സ്ഥലങ്ങളിലേക്ക് യാത്ര നിഷേധിച്ചതിനും കഴിഞ്ഞ മൂന്ന് മാസത്തിനുള്ളില് ഏകദേശം 2,988 കേസുകള് രജിസ്റ്റര് ചെയ്തു. നഗരത്തിലുടനീളമുള്ള യാത്രക്കാരില് നിന്ന്, പ്രത്യേകിച്ച് വൈകുന്നേരങ്ങളില്, അമിത നിരക്ക് ആവശ്യപ്പെടുന്ന ഓട്ടോ ഡ്രൈവര്മാര്, മീറ്റര് ചാര്ജ് ഈടാക്കാന് വിസമ്മതിക്കുന്നതായി പരാതികള് ഉയരുന്ന സാഹചര്യത്തിലാണ് നടപടി.
നിയമപരമായി അനുവദനീയമായ രാത്രി സമയത്തിന് വളരെ മുമ്പുതന്നെ ഡ്രൈവര്മാര് ‘ഒന്നര’ നിരക്ക് ഈടാക്കുന്ന സംഭവങ്ങള് യാത്രക്കാര് ചൂണ്ടിക്കാട്ടിയതിനെ തുടര്ന്ന് പ്രത്യേക എന്ഫോഴ്സ്മെന്റ് നടപടികള് ആരംഭിച്ചതായി അധികൃതര് അറിയിച്ചു. പൊലീസ് ഡാറ്റ പ്രകാരം, അമിത നിരക്ക് ആവശ്യപ്പെട്ടതിന് ഓട്ടോ ഡ്രൈവര്മാര്ക്കെതിരെ ആകെ 1,354 കേസുകള് രജിസ്റ്റര് ചെയ്തിട്ടുണ്ട്.കൂടാതെ യാത്രക്കാരെ വണ്ടിയില് കയറ്റാത്തതിനുംനിശ്ചിത സ്ഥലങ്ങളിലേക്ക് യാത്ര ചെയ്യാന് വിസമ്മതിച്ചതിനും 1,634 കേസുകള് ഡ്രൈവര്മാര്ക്കെതിരെ രജിസ്റ്റര് ചെയ്തിട്ടുണ്ട്. ചില ഓട്ടോ ഡ്രൈവര്മാര് പ്രാദേശിക ഭാഷ പരിചയമില്ലാത്ത ആളുകളെ, പ്രത്യേകിച്ച് സന്ദര്ശകരെയും മറ്റ് സംസ്ഥാനങ്ങളില് നിന്നുള്ള കുടിയേറ്റക്കാരെയും കബളിപ്പിക്കുന്നതായി നിരവധി പരാതികള് ലഭിച്ചതെന്ന് ട്രാഫിക് പൊലീസ് ഉദ്യോഗസ്ഥര് പറഞ്ഞു.പല കേസുകളിലും, ഡ്രൈവര്മാര് സര്വീസ് പൂര്ണ്ണമായും നിരസിക്കുകയോ സാധാരണ നിരക്ക് ഇരട്ടി ആവശ്യപ്പെടുകയോ ചെയ്തതായി യാത്രക്കാര് പരാതിപ്പെട്ടു.
നിലവിലുള്ള ഗതാഗത നിയമങ്ങള് പ്രകാരം, രാത്രി 10 മണിക്ക് ശേഷം മാത്രമേ ഓട്ടോ ഡ്രൈവര്മാര്ക്ക് മീറ്റര് നിരക്കിന്റെ ഒന്നര ഇരട്ടി ഈടാക്കാന് അനുവാദമുള്ളൂ. എന്നിരുന്നാലും, രാത്രി 8 മണി മുതല് തന്നെ നിരവധി ഡ്രൈവര്മാര് ഉയര്ന്ന നിരക്ക് ആവശ്യപ്പെടാന് തുടങ്ങിയതായി പൊലീസ് കണ്ടെത്തിയിട്ടുണ്ട്.തിരക്കേറിയ വാണിജ്യ മേഖലകള്, റെയില്വേ സ്റ്റേഷനുകള്, ബസ് സ്റ്റാന്ഡുകള്, ടെക് ഇടനാഴികള് എന്നിവിടങ്ങളില് എന്ഫോഴ്സ്മെന്റ് സംഘങ്ങള് പരിശോധനകള് ശക്തമാക്കിയിട്ടുണ്ടെന്ന് ഉദ്യോഗസ്ഥര് പറഞ്ഞു. നിയമങ്ങള് ലംഘിക്കുന്ന ഡ്രൈവര്മാര്ക്കെതിരെ മോട്ടോര് വാഹന നിയമത്തിലെ പ്രസക്തമായ വ്യവസ്ഥകള് പ്രകാരം പിഴ ചുമത്തുമെന്ന് ഉദ്യോഗസ്ഥര് പറഞ്ഞു.അതേസമയം പൊലീസ് നടപടിയെ യാത്രക്കാര് സ്വാഗതം ചെയ്യുകയും നഗരത്തിലെ ഓട്ടോറിക്ഷാ പ്രവര്ത്തനങ്ങള് കര്ശനമായി നിരീക്ഷിക്കണമെന്ന് ആവശ്യപ്പെടുകയും ചെയ്തു.
അതിനിടെ മാന്യമായി യാത്രക്കാരെ സേവിക്കുന്ന ഓട്ടോ ഡ്രൈവര്മാരും നടപടിയെ പിന്തുണയ്ക്കുന്നുണ്ട് എന്ന് പൊലീസ് പറഞ്ഞു. ഉത്തരവാദിത്തമില്ലാത്ത കുറച്ച് ഡ്രൈവര്മാര് കാരണം, മുഴുവന് ഓട്ടോ സമൂഹത്തിനും ചീത്തപ്പേരുണ്ടാകുന്നു എന്നാണ് സതീഷ് എന്ന ഓട്ടോ ഡ്രൈവര് ഹാന്സ് ഇന്ത്യയോട് പറഞ്ഞത്.പൊതുജനങ്ങളുടെ പരാതികളുടെ അടിസ്ഥാനത്തില് ഉടനടി നടപടി സ്വീകരിക്കുന്നുണ്ടെന്നും, നിയമലംഘകര്ക്കെതിരെ വരും ആഴ്ചകളില് പ്രത്യേക ഡ്രൈവ് തുടരുമെന്നും പൊലീസ് ഉദ്യോഗസ്ഥര് മുന്നറിയിപ്പ് നല്കി. നിയമലംഘനങ്ങള് ഉടന് റിപ്പോര്ട്ട് ചെയ്യണമെന്നും അധികൃതര് യാത്രക്കാരോട് ആവശ്യപ്പെട്ടിട്ടുണ്ട്. കുറ്റവാളികള്ക്കെതിരെ കര്ശന നടപടി സ്വീകരിക്കാന് ഇത് സഹായിക്കും എന്നും പൊലീസ് വ്യക്തമാക്കി.
