ബെംഗളൂരു: ബെംഗളൂരുവില് ഐടി കമ്പനി ജീവനക്കാരൻ കോർപ്പറേറ്റ് ക്രെഡിറ്റ് കാർഡ് ദുരുപയോഗം ചെയ്ത് 27 ലക്ഷം രൂപ തട്ടിയെടുത്തതായി പരാതി.അശ്ലീല ഉള്ളടക്കങ്ങള് ഉപയോഗിച്ച് മുതിർന്ന മാനേജ്മെന്റ് ജീവനക്കാരനെ ഭീഷണിപ്പെടുത്തുകയും ചെയ്തു. സംഭവത്തില് യുവാവിനെതിരെ പൊലീസ് കേസെടുത്തു. ഔദ്യോഗിക ചെലവുകള്ക്കായി രണ്ട് ലക്ഷം രൂപ മാത്രം ചെലവഴിക്കാൻ പ്രത്യേക അനുമതിയുള്ള കോർപ്പറേറ്റ് ക്രെഡിറ്റ് കാർഡ് ജീവനക്കാരന് നല്കിയിരുന്നു. എന്നാല്, 2023 ഒക്ടോബർ മുതല് 2024 ജനുവരി വരെയുള്ള നാല് മാസ കാലയളവില് അദ്ദേഹം 27,01,139 രൂപ ദുരുപയോഗം ചെയ്തതായി കമ്പനി ആരോപിച്ചു. അഴിമതി ചൂണ്ടിക്കാട്ടി, 2024 ജനുവരി 12 ന് ജീവനക്കാരനെ ഇമെയില് അയച്ചു. ജനുവരി 15 ന് നല്കിയ മറുപടിയില്, ചൈനയിലെയും പാകിസ്ഥാനിലെയും തിരിച്ചറിയാത്ത വ്യക്തികളുടെ ഭീഷണിയെത്തുടർന്നാണ് താൻ പ്രവർത്തിച്ചതെന്ന് അവകാശപ്പെട്ട് ദുരുപയോഗം ചെയ്തതായി അദ്ദേഹം സമ്മതിച്ചു.
പിന്നീട് മൂന്ന് ഗഡുക്കളായി തുക തിരിച്ചടയ്ക്കാമെന്ന് അദ്ദേഹം കമ്പനിക്ക് ഉറപ്പ് നല്കി. ജനുവരി 29 ന് അയച്ച മെയിലില്, ഫെബ്രുവരി രണ്ടാം വാരത്തോടെ 10 ലക്ഷം രൂപ നല്കുമെന്നും ബാക്കി കുടിശ്ശിക ഗഡുക്കളായി അടച്ചുതീർക്കുമെന്നും അദ്ദേഹം പറഞ്ഞു. മതിയായ സമയവും നിരവധി അവസരങ്ങളും നല്കിയിട്ടും, തുക തിരിച്ചടയ്ക്കാൻ കഴിഞ്ഞില്ല. 2024 ഫെബ്രുവരി 9 ന് ജീവനക്കാരൻ തന്റെ മാനേജർക്ക് അശ്ലീല ചിത്രങ്ങള് അയയ്ക്കുകയും ആത്മഹത്യാ ഭീഷണി മുഴക്കുകയും ചെയ്തതോടെ വിഷയം കൂടുതല് വഷളായി. ഇതിനെത്തുടർന്ന് കമ്പനി ഔദ്യോഗികമായി പരാതി നല്കി. പരാതിയുടെ അടിസ്ഥാനത്തില് വർത്തൂർ പോലീസ് സ്റ്റേഷൻ എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചു. കൂടുതല് അന്വേഷണം നടന്നുവരികയാണ്.
