ബെംഗളൂരു: തമിഴ്നാട്ടിലെ ഗൂഡലൂരിൽ നിന്ന് ബെംഗളൂരുവിലേക്ക് അതിവേഗം എത്തിച്ചേരാനുള്ള റൂട്ട് ഗൂഗിൾ മാപ്പിൽ തിരഞ്ഞ് യാത്ര ചെയ്തയാൾ ഒടുവിൽ പടികളിൽ കുടുങ്ങി. ബെംഗളൂരുവിൽ നിന്ന് 250 കിലോമീറ്റർ അകലെയുള്ള ഗൂഡലൂരിൽ നിന്നാണ് കാർ യാത്രക്കാർ വേഗത്തിൽ നഗരത്തിലേക്ക് തിരിച്ചെത്താനുള്ള വഴി തേടി കുടുങ്ങിയത്.
ഗൂഗിൾ മാപ്പ് ശരിയായ വഴി തന്നെയാണ് കാണിച്ചത്. പക്ഷെ അത് കാറിന് പോകാൻ കഴിയുന്ന വഴിയായിരുന്നില്ല. കുറെ പടികൾ ഇറങ്ങിയാൽ മറ്റൊരു റോഡിലേക്ക് എളുപ്പത്തിൽ ബെംഗളൂരുവിലേക്കുള്ള മറ്റൊരു റോഡിൽ എത്തിച്ചേരും. ഈ വഴിയാണ് ഗൂഗിൾ മാപ്പ് കാണിച്ചത്. മാപ്പ് വണ്ടി തിരിക്കാനാവശ്യപ്പെട്ടപ്പോൾ സംശയിക്കാതെ തിരിച്ചു. നേരെ പടികൾക്കിടയിലേക്ക് ഇറങ്ങുകയും അവിടെ കുടുങ്ങുകയും ചെയ്തു. റിപ്പോര്ട്ടുകൾ പ്രകാരം കാറിലുള്ളവർക്ക് അപകടമൊന്നും പറ്റിയില്ല.
പോലീസ് ക്വാർട്ടേഴ്സിന് അരികിലൂടെയുള്ള വഴിയിലൂടെ പോയാൽ വേഗത്തിൽ കര്ണാടക സംസ്ഥാനത്തേക്ക് എത്താമെന്നായിരുന്നു മാപ്പ് കാണിച്ചത്.
അപകടം നടന്നയുടനെ പോലീസിന്റെ സഹായം ലഭിച്ചു. സമീപവാസികളും ഓടിയെത്തി. ഫോര്ച്യൂണർ എസ്യുവിയാണ് കുടുങ്ങിയത്. കുത്തനെയുള്ള പടികളിലേക്കാണ് ഇറങ്ങിച്ചെന്നത്. ഓരോ സ്റ്റെപ്പും സാവധാനം ഇറക്കി താഴേക്ക് കൊണ്ടുവരാനാണ് ശ്രമിച്ചത്. ഗ്രൗണ്ട് ക്ലിയറൻസ് ഉയര്ന്നതായതിനാൽ ഇത് കുറെയെല്ലാം സാധിക്കുമായിരുന്നു. പക്ഷെ സ്റ്റെപ്പ് ഇറക്കുമ്പോൾ വണ്ടി ചാടുന്നത് അപകടകരമായി. ഇതോടെ കല്ലുകളും മറ്റും കൂട്ടിയിട്ട് പ്രത്യേക പാത നിര്മ്മിച്ചാണ് വണ്ടി താഴെയിറക്കിയത്. വാഹനത്തിന് കാര്യമായ കേടുപാടൊന്നും വന്നില്ല.
