കൊച്ചി: ആൺകുട്ടികളുടെ ചേലാകർമം നിരോധിക്കണമെന്ന് ആവശ്യപ്പെട്ട് സമർപ്പിക്കപ്പെട്ട പൊതുതാൽപര്യ ഹരജി കേരള ഹൈക്കോടതി തള്ളി. യുക്തിവാദി സംഘടനയായ നോൺ റിലീജ്യസ് സിറ്റിസൺസ്(എൻ.ആർ.സി) നൽകിയ ഹരജിയാണ് ചീഫ് ജസ്റ്റിസ് എസ്. മണികുമാർ, ജസ്റ്റിസ് മുരളി പുരുഷോത്തം എന്നിവർ അംഗങ്ങളായ ബെഞ്ച് തള്ളിയത്. വെറും പത്രവാർത്തകൾ അടിസ്ഥാനമാക്കിയുള്ള ഹരജി നിയമപരമായി നിലനിൽക്കില്ലെന്ന് ബെഞ്ച് നിരീക്ഷിച്ചു.
എൻ.ആർ.സിക്കു പുറമെ ടി.എം ആരിഫ് ഹുസൈൻ, നൗഷാദ് അലി, ഷാഹുൽ ഹമീദ്, യാസീൻ എൻ., കെ. അബ്ദുൽ കലാം എന്നിവരും ഹരജിയിൽ പങ്കാളികളാണ്. 18 വയസിനുമുൻപ് ചേലാകർമം നടത്തുന്നത് കുട്ടികളുടെ മൗലികാവകാശങ്ങളുടെ പച്ചയായ ലംഘനമാണെന്നും മനുഷ്യാവകാശ ലംഘനമാണെന്നുമാണ് ഹരജിയിൽ ചൂണ്ടിക്കാട്ടിയത്. നടപടി നിയമവിരുദ്ധമായി പ്രഖ്യാപിക്കുകയും ജാമ്യമില്ലാ കുറ്റമാക്കുകയും ചെയ്യണമെന്നും ഹരജിക്കാർ ആവശ്യപ്പെട്ടിരുന്നു.കോടതി നിയമനിർമാണ സമിതിയല്ലെന്ന് ഹരജി തള്ളിക്കൊണ്ട് ഹൈക്കോടതി ബെഞ്ച് വ്യക്തമാക്കി.
പരാതിക്കാർക്ക് അവരുടെ വാദം കൃത്യമായി സമർത്ഥിക്കാൻ കഴിഞ്ഞിട്ടില്ലെന്നും കോടതി ചൂണ്ടിക്കാട്ടി. യുനൈറ്റഡ് നേഷൻസ് കൺവൻഷൻ ഓൺ ദി റൈറ്റ്സ് ഓഫ് ചൈൽഡ്, ഇന്റർനാഷനൽ കവനെന്റ് ഓൺ സിവിൽ ആൻഡ് പൊളിറ്റിക്കൽ റൈറ്റ്സ് തുടങ്ങി കുട്ടികളുടെ അവകാശങ്ങൾ പ്രഖ്യാപിക്കുന്ന വിവിധ അന്താരാഷ്ട്ര കൺവെൻഷനുകളും പ്രമേയങ്ങളും കൂട്ടിച്ചേർത്തായിരുന്നു പരാതിക്കാർ ഹരജി നൽകിയത്. ചേലാകർമം നിർബന്ധിത മതകർമമല്ലെന്നും ഹരജിയിൽ വാദിക്കുന്നു.
രക്ഷിതാക്കൾ ഏകപക്ഷീയമായി കുട്ടികൾക്കുമേൽ അടിച്ചേൽപിക്കുന്നതാണിതെന്നും പരാതിക്കാർ ആരോപിച്ചു. ചേലാകർമം നിയമവിരുദ്ധമായി പ്രഖ്യാപിക്കുന്നതോടൊപ്പം കേന്ദ്ര സർക്കാർ നടപടി നിരോധിച്ചുകൊണ്ട് നിയമം തയാറാക്കണമെന്നും ഹരജിയിൽ ആവശ്യപ്പെട്ടിരുന്നു. അഭിഭാഷകരായ ജീവേഷ്, സാബു എം. ഫിലിപ്പ്, പി. ഷഹീൻ, ആകാശ് എസ് എന്നിവരാണ് ഹരജിക്കാർക്കു വേണ്ടി കോടതിയിൽ ഹാജരായത്. സംസ്ഥാന സർക്കാരിനു വേണ്ടി സീനിയർ ഗവൺമെന്റ് പ്ലീഡർ കെ.പി ഹരീഷും കേന്ദ്ര സർക്കാരിനു വേണ്ടി കൗൺസൽ ബി. പ്രമോദും നിലപാട് വ്യക്തമാക്കി.
ഒന്നാം ക്ലാസ് പ്രവേശനത്തിന് ആറു വയസെന്ന കേന്ദ്ര നിര്ദേശം; മന്ത്രിസഭ ഇന്ന് പരിഗണിക്കും
തിരുവനന്തപുരം: ഒന്നാം ക്ലാസ് പ്രവേശനത്തിന് പ്രായപരിധി ആറ് വയസാക്കിയ കേന്ദ്ര നിര്ദേശം സംസ്ഥാനത്ത് നടപ്പാക്കുന്നത് മന്ത്രിസഭ ബുധനാഴ്ച തീരുമാനമെടുക്കും.പ്രായപരിധി നടപ്പിലാക്കുന്നതിനെ നിര്ബന്ധിച്ച് കേന്ദ്ര സര്ക്കാര് സര്ക്കുലര് അയച്ചതിനെ തുടര്ന്നാണ് തീരുമാനം. മന്ത്രി സഭാ യോഗത്തിന് മുമ്ബ് മുഖ്യമന്ത്രിയുമായി ചര്ച്ച നടത്തുമെന്നും വിദ്യാഭ്യാസ മന്ത്രി വി ശിവന്കുട്ടി പറഞ്ഞു.
കേരളമടക്കമുള്ള പല സംസ്ഥാനങ്ങളും നിര്ദേശം നടപ്പിലാക്കാത്ത സാഹചര്യത്തിലാണ് കേന്ദ്രം സര്ക്കുലര് അയച്ചത്. അതേസമയം കേരളത്തിലെ കേന്ദ്രീയ വിദ്യാലയങ്ങള് ഈ നിര്ദേശം നടപ്പിലാക്കിയിരുന്നു. സര്ക്കാര് എയ്ഡഡ് സ്കൂളുകളിലും സംസ്ഥാന സിലബസ് പിന്തുടരുന്ന സിബിഎസ്ഇ സ്കൂളുകളിലും അഞ്ച് വയസിലാണ് ഒന്നാം ക്ലാസ് പ്രവേശനം.സംസ്ഥാനത്തെ സാഹചര്യം കൂടി പരിഗണിച്ചായിരിക്കും തീരുമാനം.
കുട്ടികള്ക്ക് ദോഷകരമാകാത്ത വിധമുള്ള തീരുമാനമായിരിക്കും എടുക്കുകയെന്ന് മന്ത്രി വ്യക്തമാക്കി. പല സ്കൂളുകളിലും അടുത്ത അധ്യയന വര്ഷത്തേക്കുള്ള പ്രവേശന നടപടികള് ആരംഭിച്ച സാഹചര്യത്തില് കേന്ദ്ര നിര്ദേശം പരക്കെ ആശങ്ക പരത്തിയിട്ടുണ്ട്.
