വസന്തത്തിന് എന്തുക്കൊണ്ടാകും ബെംഗുളൂരു നഗരത്തിനോട് ഇത്ര പ്രണയം? രാജ്യത്തെ ഏറ്റവും സുന്ദരമായ നഗരമായ ‘ഗാര്ഡന് സിറ്റി’, സ്പ്രിംഗ് സീസണ് (മാര്ച്ച് – ഏപ്രില്) എത്തിയതോടെ അടിമുടി പൂത്തുലഞ്ഞ് പ്രണയാതുരമായിരിക്കുകയാണ് (Spring Season Of Bangalore). സൂര്യ കിരണങ്ങള് ഈ പുഷ്പങ്ങള്ക്കും പൂമരങ്ങള്ക്കും കൂടുതല് വശ്യത സമ്മാനിക്കുന്ന പ്രഭാതങ്ങളും സായ്ഹ്നങ്ങളും നഗരം ഒരു മാന്ത്രികലോകമായി തീരുന്നു. നഗരത്തിലെ ഓരോ കോണും വ്യത്യസ്തങ്ങളായ പുഷ്പങ്ങളാല് പൂത്ത് നില്ക്കുന്ന കാഴ്ച എങ്ങനെയാണ് വിവിരച്ചു നല്കേണ്ടത്.
നഗരം മുഴുവനും വസന്തത്താല് പൂത്ത് നില്ക്കുകയാണ്. ബെംഗുളരുവിലെ വസന്തകാലങ്ങളിലെ ഈ വിസ്മയങ്ങള്ക്ക് ഈ നഗരത്തോളം തന്നെ പഴക്കമുണ്ട്. എങ്കിലും ഇന്ന് കാണുന്ന പല വിഭാഗത്തില്പ്പെട്ട പൂമരങ്ങള്ക്കും പിന്നില് ബ്രട്ടീഷുകാരാണ്. ഇംഗ്ലണ്ടിലെ വസന്തകാലം ഓര്മ്മിപ്പിക്കാനായി അവര് പറിച്ചുനട്ട പൂമരങ്ങളുടെ പിന്മുറക്കാരാണ്, ഇന്ന് ‘പൂന്തോട്ടങ്ങളുടെ നഗരത്തിലെ’ തെരുവോരങ്ങളിലും പാര്ക്കുകളിലും ഒക്കെ കാണുന്ന അതിമനോഹരമായ ഈ പൂമരങ്ങള്.
മഞ്ഞ പുഷ്പങ്ങള് നിറഞ്ഞു നില്ക്കുന്ന കോപ്പര് പോഡ് മരങ്ങള്, ഇളം ചുവപ്പിലെ ഡെലോനിക്സ് റീജിയ ഉള്പ്പെടുള്ള ചുവപ്പിന്റെ പലതരത്തിലുള്ള നിറങ്ങോട് കൂടിയ ഗുല്മോഹര് മരങ്ങള്, പിങ്കിലും പര്പ്പിളിലും വെള്ളയിലും ഒക്കെ മതിലുകളില് പടര്ന്ന് നില്ക്കുന്ന ബൊഗെയ്ന്വില്ല പുഷ്പങ്ങള്, പിങ്ക് നിറത്തോട് കൂടിയ തബേബുയ റോസാ/ പിങ്ക് ട്രെപംറ്റ് ട്രീ/ പിങ്ക് പൂയി, മഞ്ഞ നിറങ്ങണിഞ്ഞ പുഷ്പങ്ങളോട് കൂടിയ തബേബുയ അര്ജന്റീന അല്ലെങ്കില് ദ ട്രീ ഓഫ് ഗോള്ഡ് ഇങ്ങനെ ഒട്ടേറേ പൂമരങ്ങളും വള്ളിച്ചെടികളും ഒക്കെ തെരുവോരങ്ങളില് കാണാം.
പൂമരങ്ങള് പൊഴിച്ചിട്ട പൂക്കള് നിറഞ്ഞു കിടക്കുന്ന റോഡുകളിലൂടെ കിലോമീറ്ററുകളോളം ഒരു റൈഡ് പോവുകയോ അല്ലെങ്കില് ആ മരങ്ങള്ക്ക് കീഴിലൂടെ റൊമാന്റിക്ക് വൈബിലൂടെയുള്ള നടത്തങ്ങളോ ഒക്കെ പലരും ഭാവനയില് കാണുന്നുണ്ടാകും. വസന്തകാലത്ത് ബെംഗളൂരു നഗരത്തില് എത്തിയാല് അത് സാധ്യമാകും. സ്പ്രിംഗ് സീസണിന്റെ വൈബുകള് ആസ്വദിക്കാന് കഴിയുന്ന ബെംഗളൂരുവിലെ ചില ഇടങ്ങളും പാതകളും നിങ്ങള്ക്കായി പങ്കുവയ്ക്കുകയാണ്.
കുന്ദലഹള്ളി – ബ്രൂക്ക്ഫീല്ഡ്
സൗത്ത് ബെംഗളൂരുവിലെ വൈറ്റ് ഫീല്ഡ് ഉള്പ്പടെയുള്ള മറ്റ് സബര്ബന് പ്രദേശങ്ങള്ക്കൊപ്പം കുന്ദലഹള്ളി – ബ്രൂക്ക്ഫീല്ഡ് പാത വസന്തകാലത്ത് പൂത്ത് നില്ക്കും. ഈ പാത, പിങ്ക് പുഷ്പങ്ങളാല് അതിശയകമരായ രീതിയില് പൂത്തുനില്ക്കുന്ന തബേബുയ റോസയും ട്രെപംറ്റ് മരങ്ങളും വൈലറ്റ് നിറങ്ങളിലെ പുഷ്പങ്ങളാല് ഹൃദയം കവരുന്ന ജകരണ്ട മരങ്ങളും കൊണ്ട് നിറഞ്ഞിരിക്കുന്നു. ബൈക്കിലോ സൈക്കിളിലോ ഒരു റൈഡിംഗിന് പോകാന് പറ്റുന്ന മികച്ചൊരു റോഡാണിത്.
ലാല്ബാഗ് ബൊട്ടാണിക്കല് ഗാര്ഡന്
പിങ്ക്, യെല്ലോ/ ഗോള്ഡ് ട്രമ്പറ്റ് മരങ്ങള് ലാല്ബാഗിനുള്ളില് നിറയെ പൂത്തുനില്ക്കുന്ന സമയമാണിത്. ഒരു പ്രഭാത നടത്തതിനോ അലസമായ സായാഹ്ന നടത്തതിനോ സ്പ്രിംഗ് സീസണില് ലാല്ബാഗ് തിരഞ്ഞെടുക്കാം. ചുറ്റും പൂക്കളാല് നിറഞ്ഞു നില്ക്കുന്ന പൂമരങ്ങളില് ഒന്നിന്റെ ചുവട്ടില് റൊമാന്റിക്ക് വൈബോട് വിശ്രമിക്കാനും സൊറ പറയാനും സമയം കണ്ടെത്താം.
എംജി റോഡ്
ബെംഗളൂരു നഗരത്തിലെ ഏറ്റവും തിരക്കേറിയ റോഡുകളിലൊന്നാണ് മഹാത്മാഗാന്ധി റോഡ് അല്ലെങ്കില് എംജി റോഡ്. തെരുവുകളില് ചില്ലറ വില്പ്പനശാലകളും ധാരാളം ഭക്ഷണശാലകളും ഉണ്ട്. അതിലുപരി ഇവിടെ നിന്ന് നയിക്കുന്ന തെരുവുകള് വസന്തകാലത്ത് അതി മനോഹരമാണ്. ബൊഗൈന്വില്ല, പിങ്ക് ട്രെപംറ്റ്, ജകരണ്ട മരങ്ങള് നിറഞ്ഞ് നില്ക്കുന്ന ഈ ക്രോസ് റോഡുകളിലൂടെ ചെറുനടത്തങ്ങള്ക്കും റൈഡുകള്ക്കും പറ്റിയതാണ്.
സോണി സിഗ്നല് – ഇന്ദിരനഗര്
കോറമംഗലയിലെ സോണി സിഗ്നലില് നിന്നും ഇന്ദിര നഗറിലേക്കുള്ള റോഡിന്റെ ഇരുവശങ്ങളും പിങ്ക് പൂമരങ്ങളാല് നിറഞ്ഞുനില്ക്കുന്നു. പിങ്ക് ട്രെപംറ്റ് മരങ്ങള്ക്കിടയിലൂടെ ഈ യാത്രയുടെ ഏറ്റവും ആവേശം ഡോമലൂര് ബ്രിഡ്ജ് കയറുമ്പോഴാണ്. പിങ്ക് പുഷ്പങ്ങള് പൂത്ത് നില്ക്കുന്നതിന്റെ ഗംഭീര കാഴ്ചകള് ഇവിടെ കാണാം. അതുപോലെ തന്നെ ഇന്ദിരനഗറിലെ ഹഡ്രഡ് ഫീറ്റ് റോഡിലെയും അവിടെ നിന്നുള്ള ക്രോസ് റോഡുകളും പൂമരങ്ങളാല് നിറഞ്ഞുനില്ക്കുന്നവയാണ്.
കബ്ബണ് പാര്ക്ക്
ബെംഗളൂരു നിവാസികള്ക്ക് ഏറെ പ്രിയങ്കരമായ കബ്ബണ് പാര്ക്കിന്, സ്പ്രിംഗ് സീസണില് സൗന്ദര്യം വര്ധിക്കും. കാണുന്നമാത്രയില് ഹൃദയം തല്ക്ഷണം കീഴടക്കുന്ന മനോഹാരിതയിലേക്ക് കബ്ബണ് പാര്ക്കും ഇപ്പോള് മാറി കഴിഞ്ഞു. നന്നായി പരിപാലിക്കപ്പെടുന്ന ഈ പാര്ക്കിലെ മരങ്ങള് പുഷ്പങ്ങളുടെ മേലാപ്പ് തീര്ത്തിരിക്കുന്നു, പാതകള് പുഷ്പശയ്യകളായി മാറിയിരിക്കുന്നു. ഒരു അലസ നടത്തതിന് ഇതിലും മികച്ച ഒരുയിടം നഗരത്തിനുള്ളിലുണ്ടാവില്ല.
മറ്റിടങ്ങള്
ബന്നാര്ഘട്ട നാഷണല് പാര്ക്കും ബയോളജിക്കല് പാര്ക്കും സ്പ്രിംഗ് സീസണില് കിടു വൈബാണ് നല്കുന്നത്. നാഷണല് കോളേജിന് സമീപത്തുള്ള റൈഡും ഗംഭീരമായിരിക്കും, എഇസിഎസ് ലേഔട്ടും ബസവന്ഗുഡിയും ജയനഗര് 4-ാം ബ്ലോക്കും ജനറല് പോസ്റ്റ് ഓഫീസിന് സമീപവും പിങ്ക് പൂമരങ്ങളാല് സമൃദ്ധമാണ്. സിറ്റി റെയില്വേ സ്റ്റേഷന്റെ പല ഭാഗങ്ങളിലും തബേബുയ അര്ജന്റീന അല്ലെങ്കില് ദി ട്രീ ഓഫ് ഗോള്ഡ് പൂമരങ്ങളാല് മോഹിപ്പിക്കും.
