ബെംഗളൂരു; നിർദ്ദിഷ്ട ടണല് റോഡ് പദ്ധതിക്കെതിരെയും 1975ലെ കർണാടക സർക്കാരിന്റെ പാർക്കുകളുടെ സംരക്ഷണം നിയമത്തിലെ പുതിയ ഭേദഗതിക്കെതിരെയും പ്രതിഷേധിച്ച് ബെംഗളൂരു നിവാസികള് ഓഗസ്റ്റ് 30ന് ‘വാക്ക് ഫോർ ലാല്ബാഗ്’ എന്ന പേരില് പ്രതിഷേധ നടത്തം സംഘടിപ്പിക്കും.രാവിലെ 7 മണിക്ക് ലാല്ബാഗിന്റെ വെസ്റ്റ് ഗേറ്റില് നിന്നാണ് പ്രതിഷേധ നടത്തം ആരംഭിക്കുക.ബെംഗളൂരുവിലെ ഹരിതമേഖലകള് സംരക്ഷിക്കണമെന്നാവശ്യപ്പെട്ട് നഗരത്തിലെ പൗരന്മാരോടും പതിവായി ലാല്ബാഗില് നടക്കാനെത്തുന്നവരോടും പ്രതിഷേധത്തില് പങ്കെടുക്കണമെന്ന് സംഘാടകർ അഭ്യർഥിച്ചിട്ടുണ്ട്. ‘5 ശതമാനം അല്ല. 1 ശതമാനം പോലും വേണ്ട.
ലാല്ബാഗിന്റെ ഒരു ഇഞ്ച് ഭൂമി പോലും വിട്ടുകൊടുക്കില്ല’ എന്ന മുദ്രാവാക്യത്തോടെയാണ് സംഘാടകർ പ്രതിഷേധത്തിന് ആഹ്വാനം ചെയ്തിരിക്കുന്നത്.പാർക്കിന്റെ ഭൂമിയുടെ ഒരു ഭാഗം അടിസ്ഥാന സൗകര്യ പദ്ധതികള്ക്കായി ഉപയോഗിക്കാൻ അനുവദിക്കുന്ന പുതിയ നിയമഭേദഗതിക്കെതിരെയാണ് പ്രധാനമായും പ്രതിഷേധം. ബെംഗളൂരുവിലെ പ്രധാന ഹരിത ഇടങ്ങളിലൊന്നായ ലാല്ബാഗിന്റെ ഭൂമി മറ്റേതെങ്കിലും പദ്ധതികള്ക്കായി വിട്ടുനല്കുന്നത് പാർക്കിന്റെ പച്ചപ്പിനെയും പരിസ്ഥിതിയെയും ബാധിക്കുമെന്നാണ് പ്രതിഷേധക്കാരുടെ ആശങ്ക.കർണാടക നിയമസഭ ഓഗസ്റ്റ് 24നാണ് കർണാടക സർക്കാർ പാർക്കുകള് (സംരക്ഷണം) ഭേദഗതി ബില്, 2026 പാസാക്കിയത്. പുതിയ ഭേദഗതി പ്രകാരം സർക്കാർ പാർക്കിന്റെയോ ഉദ്യാനത്തിന്റെയോ ആകെ വിസ്തൃതിയുടെ പരമാവധി 5 ശതമാനം വരെ നിർദ്ദിഷ്ട പൊതുഅടിസ്ഥാന സൗകര്യ, പൊതുജനോപയോഗ പദ്ധതികള്ക്കായി മാറ്റിവയ്ക്കാൻ കഴിയും.
സർക്കാർ വകുപ്പുകള്, നിയമപരമായ അധികാര സ്ഥാപനങ്ങള്, സർക്കാർ കമ്പനികള്, തദ്ദേശ സ്വയംഭരണ സ്ഥാപനങ്ങള് എന്നിവ നടപ്പാക്കുന്ന ചില പ്രത്യേക പദ്ധതികള്ക്കാണ് ഈ വ്യവസ്ഥ ബാധകമാകുക.നിയമത്തിലെ പുതിയ വ്യവസ്ഥ പരിസ്ഥിതി സംഘടനകളുടെയും ബെംഗളൂരുവിലെ പൗരന്മാരുടെയും ശക്തമായ എതിർപ്പിന് ഇടയാക്കിയിട്ടുണ്ട്. നിർദ്ദേശിച്ചിരിക്കുന്ന ഹെബ്ബാള്-സെൻട്രല് സില്ക്ക് ബോർഡ് ടണല് റോഡ് പദ്ധതിക്ക് ഈ ഭേദഗതി വഴിയൊരുക്കുമെന്ന ആശങ്കയാണ് പ്രധാനമായും ഉയരുന്നത്. ഈ തുരങ്ക റോഡ് ലാല്ബാഗിന്റെ ഒരു ഭാഗത്തുകൂടി കടന്നുപോകാൻ സാധ്യതയുണ്ടെന്നാണ് പ്രതിഷേധക്കാർ പറയുന്നത്.ഇതിലൂടെ ലാല്ബാഗിലെ മരങ്ങളും പച്ചപ്പും ജൈവവൈവിധ്യവും, സംരക്ഷിത ഭൂമിശാസ്ത്ര പൈതൃകവും ബാധിക്കപ്പെടുമെന്നാണ് അവരുടെ വാദം.കഴിഞ്ഞ ഏതാനും ആഴ്ചകളായി ലാല്ബാഗില് തുരങ്ക റോഡ് പദ്ധതിക്കെതിരെ പൗര സംഘടനകളും സ്ഥിരമായി പാർക്കില് നടക്കാനെത്തുന്നവരും നിരവധി പ്രതിഷേധങ്ങള് നടത്തിയിട്ടുണ്ട്.
മനുഷ്യച്ചങ്ങല, ഒപ്പുശേഖരണം, ലാല്ബാഗിലെ പെനിൻസുലാർ ഗ്നൈസ് പാറയ്ക്ക് ചുറ്റുമുള്ള പ്രതീകാത്മക പ്രതിഷേധങ്ങള് തുടങ്ങിയവ ഇതില് ഉള്പ്പെടുന്നു.ലാല്ബാഗ് വാക്കേഴ്സ് അസോസിയേഷനും നിർദ്ദേശിച്ചിരിക്കുന്ന തുരങ്ക റോഡ് പദ്ധതിക്കെതിരെ രംഗത്തെത്തിയിട്ടുണ്ട്. പദ്ധതിയിലൂടെ പാർക്കിലെ പച്ചപ്പ്, ജൈവവൈവിധ്യം, ഭൂമിശാസ്ത്രപരമായ പൈതൃകം എന്നിവയ്ക്ക് ഉണ്ടാകാനിടയുള്ള ആഘാതമാണ് സംഘടന ചൂണ്ടിക്കാട്ടുന്നത്. ലാല്ബാഗ് പോലുള്ള നഗരത്തിലെ പ്രധാന ഹരിതമേഖലകള് റോഡ് നിർമാണത്തിനായി ഉപയോഗിക്കുന്നത് ഭാവിയില് ബെംഗളൂരുവിന്റെ പരിസ്ഥിതിയെ പ്രതികൂലമായി ബാധിക്കുമെന്നാണ് പ്രതിഷേധക്കാരുടെ നിലപാട്.
അതേസമയം, നിയമഭേദഗതി നിർദ്ദിഷ്ട പൊതുജനോപയോഗ പദ്ധതികള്ക്കായി മാത്രമാണ് ഉദ്ദേശിച്ചിരിക്കുന്നതെന്നും അതില് സുരക്ഷാ നടപടികള് ഉള്പ്പെടുത്തിയിട്ടുണ്ടെന്നും സംസ്ഥാന സർക്കാർ വ്യക്തമാക്കിയിട്ടുണ്ട്. പാർക്കിന്റെ ഭൂമി ഉപയോഗിക്കുന്നതിനുള്ള നിർദേശങ്ങള് ഉന്നതതല സമിതിയുടെ പരിശോധനയ്ക്ക് വിധേയമാക്കുമെന്നും സർക്കാർ പറയുന്നു.എന്നാല് സർക്കാർ വിശദീകരണം നല്കിയിട്ടും ലാല്ബാഗിനെ സംരക്ഷിക്കണമെന്ന ആവശ്യം ശക്തമായി തുടരുകയാണ്. തുരങ്ക റോഡ് പദ്ധതിക്കായി ലാല്ബാഗിന്റെ ഭൂമിയില് ചെറിയൊരു ഭാഗം പോലും വിട്ടുനല്കുന്നത് അംഗീകരിക്കില്ലെന്ന നിലപാടിലാണ് പ്രതിഷേധിക്കുന്നവർ. ഇതിന്റെ ഭാഗമായാണ് ഓഗസ്റ്റ് 30ന് ‘വാക്ക് ഫോർ ലാല്ബാഗ്’ പ്രതിഷേധ നടത്തം സംഘടിപ്പിക്കുന്നത്.
