ദുബായിലേക്കുള്ള യാത്രക്കായി കോയമ്ബത്തൂര്‍ അന്താരാഷ്ട്ര വിമാനത്താവളത്തിലെത്തിയ മലയാളി യാത്രക്കാരന്‍റെ ഷൂസിനടിയില്‍ വെടിയുണ്ട കണ്ടെത്തി.എറണാകുളം സ്വദേശി ഷിബു മാത്യു (48) ആണ് സിഐഎസ്‌എഫ് ഉദ്യോഗസ്ഥരുടെ പിടിയിലായത്.ഞായറാഴ്ചയാണ് സംഭവം ഉണ്ടായത്. യാത്രക്കാരനെ പീലമേട് പൊലീസിന് കൈമാറി. സംഭവത്തില്‍ കേസ് രജിസ്റ്റര്‍ ചെയ്തു. കഴിഞ്ഞ 10 വര്‍ഷമായി ദുബായിലെ ഒരു ഇന്‍ഷുറന്‍സ് കമ്ബനിയില്‍ ജോലി ചെയ്യുകയാണ് ഷിബു മാത്യു.
ഉച്ചകഴിഞ്ഞ് ദുബായിലേക്ക് ഇന്‍ഡിഗോ വിമാനത്തില്‍ പോകാനായി വിമാനത്താവളത്തിലെത്തിയതാണ് ഇയാള്‍.ഷിബുവിന്‍റെ ലഗേജും ചെരുപ്പും സ്കാന്‍ ചെയ്യുന്നതിനിടെയാണ് വെടിയുണ്ട കണ്ടെത്തിയത്. 0.22 എംഎം ലൈവ് ബുള്ളറ്റാണ് ഷൂസിന്‍റെ അടിയില്‍ കുടുങ്ങിയ നിലയില്‍ കണ്ടത്. യാത്രയ്ക്ക് മുമ്ബുള്ള പതിവ് പരിശോധനയിലാണ് സിഐഎസ്‌എഫ് ഉദ്യോഗസ്ഥര്‍ വെടിയുണ്ട കണ്ടെത്തിയത്. വെടിയുണ്ട ഷൂസില്‍ കുടുങ്ങിയത് എങ്ങനെയാണെന്ന് അറിയില്ലെന്ന് ഇയാള്‍ പറഞ്ഞെങ്കിലും പൊലീസ് കേസെടുത്ത് അന്വേഷണം ആരംഭിച്ചു.
