ബെംഗളൂരു: നഗരത്തിലെ രൂക്ഷമായ ഗതാഗതക്കുരുക്കിന് പരിഹാരമായി പുറംജില്ലകളിലേക്കും അയൽസംസ്ഥാനങ്ങളിലേക്കും പോകുന്ന ഇന്ധന ടാങ്കർ ലോറികൾക്ക് നിയന്ത്രണം ഏർപ്പെടുത്തി ബെംഗളൂരു ട്രാഫിക് പോലീസ്. പെട്രോൾ, ഡീസൽ, എൽ.പി.ജി എന്നിവയുമായി നഗരത്തിലൂടെ കടന്നുപോകുന്ന ടാങ്കറുകൾക്ക് നഗരപരിധിയിൽ പ്രവേശിക്കുന്നതിന് വിലക്കേർപ്പെടുത്തി. ഇത്തരം വാഹനങ്ങൾ ബദൽ പാതകൾ ഉപയോഗിക്കണമെന്നാണ് പുതിയ നിർദേശം.ഇളവുകൾ ദുരുപയോഗം ചെയ്യുന്നതായി കണ്ടെത്തൽ2014 മുതൽ ബെംഗളൂരുവിൽ രാവിലെ സമയങ്ങളിൽ ഭാരവാഹനങ്ങൾക്ക് പ്രവേശന നിയന്ത്രണമുണ്ട്. എന്നാൽ അവശ്യസർവീസെന്ന പരിഗണനയിൽ പെട്രോൾ, ഡീസൽ, എൽ.പി.ജി ടാങ്കറുകൾക്ക് 24 മണിക്കൂറും യാത്രാനുമതി നൽകിയിരുന്നു. ഈ ഇളവ് വ്യാപകമായി ദുരുപയോഗം ചെയ്യുന്നതായി പോലീസ് നടത്തിയ പരിശോധനയിൽ കണ്ടെത്തി.
ഹോസ്കോട്ട് താലൂക്കിലെ ദേവരഗുണ്ടിയിലെ ഇന്ധന ഡിപ്പോകളിൽനിന്ന് പ്രതിദിനം 800 മുതൽ 1,000 വരെ ടാങ്കറുകളാണ് മറ്റ് ജില്ലകളിലേക്ക് നഗരത്തിലൂടെ കടന്നുപോകുന്നത്. ഇത് പ്രധാന റോഡുകളിൽ വലിയ ഗതാഗതതടസ്സത്തിന് കാരണമാകുന്ന സാഹചര്യത്തിലാണ് നിയന്ത്രണം കടുപ്പിച്ചത്.ബദൽ പാതയായി നൈസ് റോഡും എസ്.ടി.ആർ.ആറുംനഗരത്തിലെ പെട്രോൾ പമ്പുകളിലേക്കും ഗ്യാസ് ഏജൻസികളിലേക്കും ഇന്ധനമെത്തിക്കുന്ന ടാങ്കറുകൾക്ക് നിയന്ത്രണമില്ലാതെ സർവീസ് നടത്താം. എന്നാൽ മറ്റ് ജില്ലകളിലേക്കും സംസ്ഥാനങ്ങളിലേക്കും പോകുന്ന ടാങ്കറുകൾ നഗരത്തിൽ പ്രവേശിക്കാതെ നൈസ് റോഡ് (NICE Road), സാറ്റലൈറ്റ് ടൗൺ റിങ് റോഡ് (STRR) എന്നിവ വഴി യാത്ര ചെയ്യണമെന്നാണ് ട്രാഫിക് പോലീസിന്റെ നിർദേശം.
പ്രധാന റോഡുകളിലെ തിരക്ക് കുറയുമെന്ന് പ്രതീക്ഷപുതിയ നിയന്ത്രണം നടപ്പാകുന്നതോടെ തുംകൂർ റോഡ്, മൈസൂരു റോഡ് തുടങ്ങിയ പ്രധാന പാതകളിലെ ഗതാഗതക്കുരുക്കിന് വലിയ ആശ്വാസമാകുമെന്നാണ് പ്രതീക്ഷ. നഗരത്തിന് പുറത്തേക്കുള്ള ഭാരവാഹനങ്ങളെ ബദൽ പാതകളിലേക്ക് തിരിച്ചുവിടുന്നതിലൂടെ പ്രധാന റോഡുകളിലെ വാഹനത്തിരക്ക് കുറയ്ക്കാനാകുമെന്നാണ് ട്രാഫിക് പോലീസിന്റെ വിലയിരുത്തൽ. പുതിയ പരിഷ്കാരം എത്രത്തോളം ഫലപ്രദമാകുമെന്ന് വരും ദിവസങ്ങളിൽ വ്യക്തമാകും.
