ബെംഗളൂരു: നമ്മ മെട്രോ മൂന്നാം ഘട്ട പദ്ധതിയുടെ സിവില് ജോലികള്ക്കായി ബെംഗളൂരു മെട്രോ റെയില് കോർപ്പറേഷൻ പുതിയ ടെൻഡർ ക്ഷണിച്ചേക്കും.അടുത്ത 45 ദിവസത്തിനുള്ളില് പുതിയ ടെൻഡർ നടപടികള് ആരംഭിക്കാനാണ് സാധ്യത. പൂർണമായും ഡബിള് ഡെക്കർ പാത നിർമ്മിക്കാനുള്ള പദ്ധതി ഉപേക്ഷിച്ചതിന് പിന്നാലെയാണ് പുതിയ തീരുമാനം.കേന്ദ്രസർക്കാർ പദ്ധതി അംഗീകരിച്ച് രണ്ട് വർഷത്തിലേറെയായിട്ടും നിർമ്മാണ പ്രവർത്തനങ്ങള് ആരംഭിക്കാത്തതില് വിമർശനം ശക്തമായിരുന്നു. പുതുക്കിയ പദ്ധതിപ്രകാരം 44.65 കിലോമീറ്റർ ദൈർഘ്യമുള്ള മെട്രോ മൂന്നാം ഘട്ടത്തില് ഏകദേശം 11 കിലോമീറ്റർ ഭാഗത്ത് മാത്രമായിരിക്കും ഡബിള് ഡെക്കർ ഘടനകള് ഉണ്ടാകുക.
ഈ വർഷം ആദ്യം ബിഎംആർസിഎല് ക്ഷണിച്ച ടെൻഡറുകള് പിൻവലിക്കും. തുടർന്ന് പദ്ധതിയുടെ ചെലവ് പുതുക്കി ആവശ്യമായ അനുമതികള് നേടിയ ശേഷം പുതിയ ടെൻഡർ ക്ഷണിക്കും. ജനുവരിയില് ഓറഞ്ച് ലൈനിലെ ഏകദേശം 18.5 കിലോമീറ്റർ ഭാഗത്തെ സിവില് ജോലികള്ക്കായി ബിഎംആർസിഎല് ടെൻഡർ ക്ഷണിച്ചിരുന്നു. മൂന്ന് പാക്കേജുകളായാണ് ജോലികള് വിഭജിച്ചിരുന്നത്.എന്നാല് പദ്ധതിയുടെ രൂപകല്പ്പനയില് മാറ്റം വരുത്തിയതിനാല് ഈ ടെൻഡറുകള് ഇപ്പോള് പിൻവലിക്കും. 44.65 കിലോമീറ്റർ പാതയില് ഏകദേശം 11 കിലോമീറ്റർ ഭാഗത്ത് ഡബിള് ഡെക്കർ ഘടന നിലനിർത്തുന്നതിന് സംസ്ഥാന സർക്കാർ തത്വത്തില് അനുമതി നല്കിയതായി നഗരവികസന വകുപ്പ് ഉദ്യോഗസ്ഥൻ അറിയിച്ചു. ആദ്യം പദ്ധതിയുടെ ചെലവ് പുതുക്കിയ ശേഷം പുതിയ ടെൻഡർ ക്ഷണിക്കാനാണ് ബിഎംആർസിഎല് ഉദ്ദേശിക്കുന്നത്.ഈ നടപടികള് പൂർത്തിയാക്കാൻ ഏകദേശം ഒരു മാസം മുതല് 45 ദിവസം വരെ സമയമെടുക്കാം. എന്നാല് ബിഎംആർസിഎല് ഡയറക്ടർ ബോർഡിന്റെ അനുമതി ലഭിക്കുന്നതും സമയക്രമത്തെ ബാധിക്കും. നിർമ്മാണം ആരംഭിക്കുന്നതില് പദ്ധതി നേരത്തെ തന്നെ വൈകിയിരുന്നു. കേന്ദ്രസർക്കാർ 2024 ഓഗസ്റ്റിലാണ് പദ്ധതിക്ക് അനുമതി നല്കിയത്.
2025 ഓഗസ്റ്റില് പദ്ധതിയുടെ തറക്കല്ലിടല് ചടങ്ങും നടന്നു. എന്നാല് ഇതിന് ശേഷവും ബിഎംആർസിഎല് നിർമാണത്തിനുള്ള വർക്ക് ഓർഡർ നല്കിയിട്ടില്ല.2024 ഓഗസ്റ്റില് കേന്ദ്രസർക്കാർ 15,611 കോടി രൂപ ചെലവ് കണക്കാക്കിയുള്ള ബെംഗളൂരു മെട്രോ മൂന്നാം ഘട്ടത്തിന് അംഗീകാരം നല്കിയിരുന്നു. 44.65 കിലോമീറ്റർ ദൈർഘ്യമുള്ള പദ്ധതിയില് 31 സ്റ്റേഷനുകളാണ് ഉണ്ടാകുക. രണ്ട് പ്രധാന പാതകളാണ് പദ്ധതിയിലുള്ളത്. ആദ്യ പാത ഔട്ടർ റിങ് റോഡിന്റെ പടിഞ്ഞാറൻ ഭാഗത്തുകൂടി കടന്നുപോകും. രണ്ടാമത്തെ പാത മഗഡി റോഡിലൂടെയായിരിക്കും.2029 ഓടെ പദ്ധതി പൂർത്തിയാക്കാനാണ് നിലവിലെ ലക്ഷ്യം. ബെംഗളൂരു മെട്രോ മൂന്നാം ഘട്ടം മുഴുവനായും ഡബിള് ഡെക്കർ രീതിയില് നിർമ്മിക്കണമെന്നായിരുന്നു സംസ്ഥാന സർക്കാരിന്റെ പ്രധാന നിർദേശം.ഈ രീതിയില് മെട്രോയുടെ വയഡക്റ്റിന് താഴെയായി റോഡ് മേല്പ്പാലവും നിർമ്മിക്കും. ഇതിലൂടെ ഒരേ സ്ഥലത്ത് മെട്രോയ്ക്കും റോഡ് ഗതാഗതത്തിനും ആവശ്യമായ സൗകര്യങ്ങള് ഒരുക്കാനാകും.ബെംഗളൂരുവിലെ റോഡുകള്ക്ക് ലഭ്യമായ സ്ഥലം പരിമിതമായതും ഭൂമി ഏറ്റെടുക്കുന്നതിനുള്ള ചെലവ് കൂടുതലായതുമാണ് ഈ ആശയത്തിന് പിന്നിലെ പ്രധാന കാരണങ്ങളില് ഒന്ന്.
ഇതിന് പുറമെ 37 കിലോമീറ്റർ ദൈർഘ്യമുള്ള പ്രത്യേക ഡബിള് ഡെക്കർ റോഡ് പദ്ധതിക്കും കർണാടക സർക്കാർ അംഗീകാരം നല്കിയിട്ടുണ്ട്. ഏകദേശം 9,700 കോടി രൂപയാണ് ഈ പദ്ധതിയുടെ ചെലവ് കണക്കാക്കുന്നത്.എന്നാല് മൂന്നാം ഘട്ടത്തിലെ മുഴുവൻ പാതയിലും ഡബിള് ഡെക്കർ ഘടന നിർമിക്കുന്നതിന്റെ സാമ്പത്തികവും ഗതാഗതപരവുമായ പ്രത്യാഘാതങ്ങളെക്കുറിച്ച് കേന്ദ്രസർക്കാർ ആശങ്കകള് ഉന്നയിച്ചു.ദീർഘദൂര റോഡ് മേല്പ്പാലങ്ങള് നിർമ്മിക്കുന്നത് നിലവിലുള്ള റോഡുകള്ക്ക് സമാന്തരമായി പുതിയ റോഡ് സൗകര്യം സൃഷ്ടിക്കുകയും സ്വകാര്യ വാഹനങ്ങളുടെ ഉപയോഗം വർധിപ്പിക്കുകയും ചെയ്യുമോ എന്ന കാര്യം കേന്ദ്ര ഭവന നഗരകാര്യ മന്ത്രാലയം പരിശോധിക്കുന്നുണ്ട്.മെട്രോ യാത്രക്കാരുടെ എണ്ണത്തെ ഇത് എങ്ങനെ ബാധിക്കും, സുരക്ഷ, പ്രവർത്തന സാധ്യത, സാമ്പത്തിക നേട്ടം തുടങ്ങിയ കാര്യങ്ങളും പരിശോധിക്കുന്നുണ്ട്. ഇതിന്റെ അടിസ്ഥാനത്തില് പുതുക്കിയ മെട്രോ മൂന്നാം ഘട്ട പദ്ധതിയില് തിരഞ്ഞെടുത്ത ചില സ്ഥലങ്ങളില് മാത്രമായിരിക്കും ഡബിള് ഡെക്കർ ഘടനകള് നിലനിർത്തുക.
