ബെംഗളൂരു: നഗരവികസനത്തിനായി കർണാടക സർക്കാർ പുതുതായി പ്രഖ്യാപിച്ച 1.5 ലക്ഷം കോടി രൂപയുടെ മെഗാബജറ്റില് മെട്രോയുടെ 500 കിലോമീറ്റർ ദൈർഘ്യമുള്ള വിപുലീകരണം ഒരുങ്ങുന്നു.അടുത്തിടെ നടന്ന കാറ്റലിസ്റ്റ് കണക്റ്റ് ഉച്ചകോടിയില് അനാച്ഛാദനം ചെയ്ത ഈ പദ്ധതി പ്രകാരം 2029-ഓടെ 3.5 ലക്ഷം ഉയർന്ന നിലവാരമുള്ള തൊഴിലവസരങ്ങള് സൃഷ്ടിക്കുക, 500 പുതിയ ഗ്ലോബല് കാപ്പബിലിറ്റി സെന്ററുകള് ചേർക്കുക എന്നിവയാണ് ലക്ഷ്യമിടുന്നത്.നമ്മ മെട്രോയുടെ വിപുലീകരണം നഗര വളർച്ചാ തന്ത്രത്തിന്റെ പ്രധാന മേഖലകളില് ഒന്നായി കർണാടക സർക്കാർ എടുത്തുപറയുന്നു. ബിയോണ്ട് ബെംഗളുരു സംരംഭത്തിനൊപ്പം രൂപപ്പെടുത്തിയ ഈ പദ്ധതികള് ഗ്ലോബല് കപ്പബിലിറ്റി സെൻ്ററുകളില് നിന്നുള്ള വൻതോതിലുള്ള നിക്ഷേപങ്ങളെ പിന്തുണയ്ക്കുന്നതിന് ആവശ്യമായ അടിസ്ഥാന സൗകര്യങ്ങള് നിർമ്മിക്കുന്നതിനൊപ്പം നഗര ഗതാഗതം കൈകാര്യം ചെയ്യാൻ കൂടി ലക്ഷ്യമിടുന്നു.നിലവില് പ്രവർത്തിക്കുന്ന 96 കിലോമീറ്റർ ശൃംഖല ഇരട്ടിയാക്കാനുള്ള ശ്രമത്തിലാണ് സംസ്ഥാനമെന്ന് മുഖ്യമന്ത്രി ഡികെ ശിവകുമാർ അറിയിച്ചു.
അടുത്ത വർഷം ഡിസംബറോടെ 175 കിലോമീറ്റർ സജീവമായ മെട്രോ ലൈനുകള് പൂർണമായും പ്രവർത്തനക്ഷമമാക്കുകയാണ് ലക്ഷ്യം. പുതിയ എലവേറ്റഡ് റൂട്ടുകളും പരസ്പരം ബന്ധിപ്പിച്ചിട്ടുള്ള ഭൂഗർഭ തുരങ്ക ഇടനാഴികളും അടങ്ങുന്ന 500 കിലോമീറ്റർ ദൈർഘ്യമുള്ള ഒരു വലിയ വിപുലീകരണ പദ്ധതി സർക്കാർ വിഭാവനം ചെയ്തിട്ടുണ്ട്.ഈ മെഗാ ട്രാൻസിറ്റ് കാഴ്ചപ്പാട് നഗരത്തിലെ തിരക്ക് നേരിടാൻ രൂപകല്പ്പന ചെയ്ത 1.5 ലക്ഷം കോടി രൂപയുടെ സമഗ്രമായ സിറ്റി ഇൻഫ്രാസ്ട്രക്ച്ചർ ബജറ്റ് പൂർണ പിന്തുണ നല്കുന്നു. അതിനിടെ പ്രധാന ബിസിനസ്, ഐടി ഹബ്ബുകളെ ബന്ധിപ്പിക്കുന്നതിനുള്ള രണ്ടാം ഘട്ട ഇടനാഴികളുടെ പ്രവർത്തനം അതിവേഗം പുരോഗമിക്കുകയാണ്.അതില് ഏറെ പ്രതീക്ഷയോടെ ആളുകള് കാത്തിരിക്കുന്ന പിങ്ക് ലൈൻ അഥവാ കലേന അഗ്രഹാര മുതല് നാഗവാര വരെയുള്ള റൂട്ടും ഉള്പ്പെടുന്നു. ഈ നിർണായക പാതയുടെ ഉയർന്ന ഭാഗം ഈ വർഷം ഓഗസ്റ്റില് ആദ്യം തുറക്കും, പിന്നീട് മുഴുവൻ ഇടനാഴിയും-അതിന്റെ സങ്കീർണമായ ഭൂഗർഭ ഭാഗങ്ങള് ഉള്പ്പെടെ അടുത്ത വർഷം മാർച്ചോടെ സമ്പൂർണമായി തുറക്കാനാണ് പദ്ധതി.
ഇത് കൂടാതെ ബ്ലൂ ലൈൻ ഔട്ടർ റിംഗ് റോഡ് ഭാഗങ്ങളുടെ നിർമ്മാണം മുന്നോട്ട് നീങ്ങുന്നുണ്ട്. കെംപഗൗഡ അന്താരാഷ്ട്ര വിമാനത്താവളത്തിലേക്കുള്ള ഭാഗം ഉള്പ്പെടെയാണിത്. ഇത് 2027 പകുതി മുതല് അവസാനം വരെയുള്ള സമയത്തില് പൂർണമായി പ്രവർത്തനം തുടങ്ങാനാണ് ലക്ഷ്യമിടുന്നത്. 58 കോടി രൂപയുടെ പദ്ധതിയാണിത്.ഒപ്പം കേന്ദ്ര കാബിനറ്റ് അംഗീകരിച്ച, മൂന്നാം ഘട്ടം പടിഞ്ഞാറൻ ബെംഗളൂരുവിലുടനീളം ഗതാഗത തടസങ്ങള് പരിഹരിക്കുന്നതില് ശ്രദ്ധ കേന്ദ്രീകരിക്കുന്നു. ഈ ഭാഗത്ത് ഇന്ത്യയിലെ ഏറ്റവും നീളമേറിയ ഡബിള് ഡെക്കർ മെട്രോ കോറിഡോർ അവതരിപ്പിക്കും. ഇതില് മള്ട്ടി ലെയ്ൻ വെഹിക്കിള് ഫ്ലൈ ഓവറുകള്ക്ക് മുകളില് നേരിട്ട് എലവേറ്റഡ് മെട്രോ ട്രാക്കുകള് അടുക്കിവയ്ക്കും. ഇത് കൂടി പൂർത്തിയായാല് മെട്രോ കൂടുതല് ജനങ്ങള്ക്ക് ഉപകാരപ്രദമാവും എന്നാണ് വിലയിരുത്തല്.
