ബെംഗളൂരു: ഐടി നഗരമായ ബെംഗളൂരുവിൻ്റെ ഗതാഗത പ്രശ്നങ്ങള് പരിഹരിക്കാൻ വമ്പൻ പദ്ധതികളാണ് ഒരുങ്ങുന്നത്. നമ്മ മെട്രോ സർവീസുകള് നഗരത്തിൻ്റെ വിവിധ കോണുകളിലേക്ക് വ്യാപിപ്പിക്കുന്നതിനൊപ്പം സബർബൻ റെയില് പദ്ധതിയുമായും കർണാടക സർക്കാർ മുന്നോട്ട് പോകുകയാണ്.എന്നാല് നിരത്തിലെ ഗതാഗത പ്രശ്നങ്ങള് പരിഹരിക്കാനുള്ള വമ്പൻ പദ്ധതികളാണ് സംസ്ഥാന സർക്കാർ ആസൂത്രണം ചെയ്യുന്നത്.ബെംഗളൂരു മെട്രോ വികസനം, തുരങ്ക റോഡുകള്, ഫ്ലൈ ഓവറുകള്, ബിസിനസ് കോറിഡോർ എന്നിവയുടെ സംയോജനത്തിലൂടെ നഗരത്തിലെ ഗതാഗതക്കുരുക്ക് ലഘൂകരിക്കാൻ ലക്ഷ്യമിട്ടുള്ള അടിസ്ഥാന സൗകര്യ പദ്ധതി കർണാടക സർക്കാർ പുറത്തിറക്കി. ബെംഗളൂരുവിന്റെ അടിസ്ഥാന സൗകര്യങ്ങളില് ഏകദേശം 1.5 ട്രില്യണ് രൂപ നിക്ഷേപിക്കാനുള്ള പദ്ധതികള് മുഖ്യമന്ത്രി ഡികെ ശിവകുമാർ പ്രഖ്യാപിച്ചിരുന്നു.
ബെംഗളൂരു നഗരത്തിലെ കണക്റ്റിവിറ്റി മെച്ചപ്പെടുത്തുന്നതിനും യാത്രാ സമയം കുറയ്ക്കുന്നതിനുമുള്ള നടപടികളാണ് ആസൂത്രണം ചെയ്യുന്നതെന്ന് മുഖ്യമന്ത്രി പറഞ്ഞു. ഇന്ത്യയിലെ മുൻനിര സാങ്കേതിക കേന്ദ്രമെന്ന നിലയില് ബെംഗളൂരുവിന്റെ സാമ്പത്തിക വളർച്ചയെ പിന്തുണയ്ക്കുന്നതിന് വലിയ തോതിലുള്ള നിക്ഷേപം സഹായിക്കും. ബെംഗളൂരുവിലെ മൊബിലിറ്റി മെച്ചപ്പെടുത്തുന്നതിനായി സർക്കാർ പ്രവർത്തിക്കുന്നുണ്ടെങ്കിലും കർണാടകയിലെ ടയർ-2, ടയർ-3 നഗരങ്ങളിലുടനീളം വ്യാവസായിക വളർച്ചയെ ഒരേസമയം പ്രോത്സാഹിപ്പിക്കുന്നുണ്ടെന്നും അദ്ദേഹം കൂട്ടിച്ചേർത്തു.ബെംഗളൂരുവിന്റെ മെട്രോ ശൃംഖല വികസനത്തിൻ്റെ പാതയിലാണ്. 350 കിലോമീറ്റർ മെട്രോ കണക്റ്റിവിറ്റി ഇതിനകം ആസൂത്രണം ചെയ്തിട്ടുണ്ട്. അടുത്ത വർഷത്തോടെ ഇത് 500 കിലോമീറ്ററായി വികസിപ്പിക്കാനാണ് ലക്ഷ്യമിടുന്നതെന്ന് കഴിഞ്ഞ ദിവസം മുഖ്യമന്ത്രി ഡികെ ശിവകുമാർ പറഞ്ഞിരുന്നു. ബെംഗളൂരു നഗരത്തിലെ ഏറ്റവും തിരക്കേറിയ ചില ഭാഗങ്ങളിലെ ഗതാഗതക്കുരുക്ക് കുറയ്ക്കുന്നതിന് തുരങ്കപാത ഉള്പ്പെടെയുള്ള വൻ പദ്ധതികളാണ് സംസ്ഥാന സർക്കാർ പൂർത്തിയാക്കുന്നത്.
ബെംഗളൂരു ബിസിനസ് കോറിഡോർ ഉള്പ്പെടെയുള്ള വമ്പൻ പദ്ധതികളും അണിയറയില് സജീവമായി തുടരുകയാണ്.നഗരത്തിലെ ഗതാഗതക്കുരുക്ക് പരിഹരിക്കാനുള്ള പ്രധാന പദ്ധതികള്350 കിലോമീറ്ററില് നിന്ന് 500 കിലോമീറ്ററിലേക്ക് മെട്രോ വികസിപ്പിക്കല്. 40 കിലോമീറ്റർ പുതിയ തുരങ്ക പാത.44 കിലോമീറ്റർ ഡബിള് ഡെക്കർ ഫ്ലൈഓവർ. 133 കിലോമീറ്റർ ഫ്ലൈഓവറുകളുടെ ശൃംഖല. 123 കിലോമീറ്റർ ബെംഗളൂരു ബിസിനസ് കോറിഡോർ.* തിരക്ക് കുറയ്ക്കുന്നതിനായി ഹെബ്ബാളിന് സമീപം ഒരു പ്രത്യേക തുരങ്ക പാത.40 കിലോമീറ്റർ ദൈർഘ്യമുള്ള നിർദിഷ്ട ടണല് റോഡ് പദ്ധതി ഉടൻ തന്നെ സംസ്ഥാന മന്ത്രിസഭയുടെ അംഗീകാരത്തിനായി എത്തും.ബെംഗളൂരുവിലെ ഏറ്റവും തിരക്കേറിയ ഗതാഗത ജങ്ഷനുകളില് ഒന്നിലെ ഗതാഗതക്കുരുക്ക് കുറയ്ക്കുന്നതിനായി ഹെബ്ബാളിന് സമീപം ഒരു ചെറിയ തുരങ്ക റോഡ് പദ്ധതിക്കുള്ള പ്രവർത്തനങ്ങള് ആരംഭിച്ചതായും മുഖ്യമന്ത്രി പറഞ്ഞു.ബെംഗളൂരുവിന്റെ റോഡ് അടിസ്ഥാന സൗകര്യങ്ങള് മെച്ചപ്പെടുത്തുന്നതിനായി ലക്ഷ്യമിട്ടുള്ള മറ്റ് നിരവധി സംരംഭങ്ങളും സംസ്ഥാന സർക്കാർ പ്രഖ്യാപിച്ചു.
ബെംഗളൂരു സ്മാർട്ട് ഇൻഫ്രാസ്ട്രക്ചർ ലിമിറ്റഡ് (ബി – സ്മൈല്) ഗതാഗതക്കുരുക്ക് ലഘൂകരിക്കുന്നതില് പ്രത്യേക ശ്രദ്ധ കേന്ദ്രീകരിച്ച് സമഗ്രമായ വികസന പദ്ധതികള് തയ്യാറാക്കുന്നുണ്ട്. 2026 – 2027 സാമ്പത്തിക വർഷത്തേക്ക് 3,000 കോടി ചെലവില് 450 കിലോമീറ്റർ വൈറ്റ് – ടോപ്പിങ് റോഡുകള്ക്കായി സർക്കാർ വിശദമായ പദ്ധതി റിപ്പോർട്ട് (ഡിപിആർ) തയ്യാറാക്കിയിട്ടുണ്ട്.ശാസ്ത്രീയമായി രൂപകല്പ്പന ചെയ്ത റോഡുകള്ക്കൊപ്പം കാല്നട അടിസ്ഥാന സൗകര്യങ്ങള് മെച്ചപ്പെടുത്തുന്നതിനായി ഉയർന്ന നിലവാരമുള്ള നടപ്പാതകളും നിർമിക്കുന്നുണ്ട്. ബെംഗളൂരുവിന്റെ ഗതാഗതക്കുരുക്ക് പരിഹരിക്കുന്നതിനുള്ള ദീർഘകാല തന്ത്രത്തിന്റെ ഭാഗമായി 150 കിലോമീറ്റർ എലിവേറ്റഡ് ഇടനാഴികള് നിർമിക്കാൻ കർണാടക പദ്ധതിയിടുന്നുണ്ടെന്ന് സർക്കാർ വൃത്തങ്ങള് പറഞ്ഞു.
