ചെന്നൈ: നിതീഷ് തിവാരിയുടെ ബ്രഹ്‌മാണ്ഡ ചിത്രമായ ‘രാമായണ’ത്തില്‍ സീതയായി അഭിനയിക്കുന്ന നടി സായി പല്ലവിക്കെതിരായ വിമര്‍ശനങ്ങളില്‍ പ്രതികരണവുമായി പ്രമുഖ താരം ധനുഷ് രംഗത്തെത്തി.പുതിയ ചിത്രമായ ‘ഒഎം’-ന്റെ പ്രീ-റിലീസ് ചടങ്ങിനിടയിലാണ് സായി പല്ലവിയെ പിന്തുണച്ച് ധനുഷ് സംസാരിച്ചത്. നടിയുടെ കഥാപാത്രത്തെക്കുറിച്ചുള്ള അനാവശ്യമായ വാര്‍ത്തകളും ചര്‍ച്ചകളും തനിക്ക് അത്ഭുതമാണ് ഉണ്ടാക്കിയതെന്ന് അദ്ദേഹം വ്യക്തമാക്കി. സായി പല്ലവിയെപ്പോലെ മറ്റൊരു സീതയെ ഇന്ത്യ മുഴുവന്‍ തിരഞ്ഞാലും കണ്ടെത്താന്‍ സാധിക്കില്ലെന്ന് ധനുഷ് പ്രശംസിച്ചു.ചിത്രീകരണ വേളകളിലും ഇടവേളകളിലും പോലും താരം നിരന്തരം ദൈവത്തെ പ്രാര്‍ത്ഥിക്കുന്നത് താന്‍ കണ്ടിട്ടുണ്ടെന്ന് ധനുഷ് വെളിപ്പെടുത്തി.
അത്രയധികം ദൈവഭക്തിയും ശുദ്ധമായ മനസ്സിനുമുള്ള ഉടമയാണ് സായി പല്ലവിയെന്ന് അദ്ദേഹം കൂട്ടിച്ചേര്‍ത്തു. മനോഹരമായ രൂപത്തിനുപുറമെ മികച്ച ഒരു പെര്‍ഫോമര്‍ കൂടിയാണ് സായി പല്ലവിയെന്നും അദ്ദേഹം പറഞ്ഞു. ഇത്രയധികം ആഴത്തിലുള്ള ഭക്തിയും കഴിവും ഉള്ളതുകൊണ്ടാണ് അവര്‍ ഈ വേഷത്തിലേക്ക് തെരഞ്ഞെടുക്കപ്പെട്ടതെന്നും താരം വ്യക്തമാക്കി.ആദ്യം ഒന്നിച്ച്‌ അഭിനയിച്ച ‘മാരി 2’ സിനിമയുടെ കാലത്തെ അനുഭവങ്ങളും ധനുഷ് വേദിയില്‍ ഓര്‍മ്മിക്കുകയുണ്ടായി. ആ സമയത്ത് വളരെ നിഷ്‌കളങ്കയായി സംസാരിക്കാന്‍ പോലും മടിക്കുന്ന ഒരു പെണ്‍കുട്ടിയായിരുന്നു സായി പല്ലവിയെന്ന് അദ്ദേഹം പറഞ്ഞു. എന്നാല്‍ ഒമ്പത് വര്‍ഷത്തിന് ശേഷം പുതിയ ചിത്രത്തിന്റെ സെറ്റില്‍ വെച്ച്‌ കണ്ടപ്പോള്‍ അവര്‍ പൂര്‍ണ്ണമായും മാറിമറിഞ്ഞിരുന്നുവെന്ന് അദ്ദേഹം കൂട്ടിച്ചേര്‍ത്തു. സിനിമയെക്കുറിച്ചുള്ള സമ്പൂര്‍ണ്ണമായ അറിവും ആത്മവിശ്വാസവുമാണ് ഇപ്പോള്‍ അവരില്‍ കാണാന്‍ സാധിക്കുന്നതെന്ന് അദ്ദേഹം പ്രശംസിച്ചു.
സംസാരത്തിലും നടത്തത്തിലും ഭാവങ്ങളിലും എല്ലാം വലിയ പക്വതയാണ് ഇപ്പോള്‍ പ്രകടമാകുന്നതെന്ന് ധനുഷ് ചൂണ്ടിക്കാണിച്ചു. ഒരു സിനിമയുടെ സെറ്റില്‍ ഇത്രയധികം ആത്മവിശ്വാസം പ്രകടമാക്കുന്ന നടിയെ കാണുന്നത് കൗതുകമുണര്‍ത്തുന്ന കാര്യമാണെന്ന് അദ്ദേഹം പറഞ്ഞു. ‘ഒഎം’ എന്ന ചിത്രത്തിലെ വളരെ ബുദ്ധിമുട്ടേറിയ കഥാപാത്രത്തെ സായി പല്ലവി വളരെ ധൈര്യത്തോടെയാണ് ഏറ്റെടുത്തതെന്നും അദ്ദേഹം വ്യക്തമാക്കി. വലിയ വെല്ലുവിളിയുള്ള ഈ കഥാപാത്രത്തെ മികച്ച രീതിയില്‍ തന്നെ അവര്‍ അവതരിപ്പിച്ചു തീര്‍ത്തിട്ടുണ്ടെന്നും അദ്ദേഹം കൂട്ടിച്ചേര്‍ത്തു.ധനുഷും സായി പല്ലവിയും വീണ്ടും ഒന്നിക്കുന്ന ‘ഒഎം’ എന്ന ചിത്രത്തില്‍ മെഗാസ്റ്റാര്‍ മമ്മൂട്ടിയും ഒരു പ്രധാന വേഷത്തില്‍ എത്തുന്നുണ്ട്. ചിത്രത്തില്‍ ഒരു സി.ബി.ഐ ഉദ്യോഗസ്ഥയായിട്ടാണ് സായി പല്ലവി അഭിനയിക്കുന്നത്.
ചന്ദനക്കടത്ത് കേസിലെ അന്വേഷണമാണ് ചിത്രത്തിന്റെ പ്രധാന പ്രമേയമായി വരുന്നത്. വന്‍ താരനിര അണിനിരക്കുന്ന ഈ ചിത്രത്തിനായി വലിയ പ്രതീക്ഷകളോടെയാണ് ആരാധകര്‍ കാത്തിരിക്കുന്നത്.നിതീഷ് തിവാരി സംവിധാനം ചെയ്യുന്ന ‘രാമായണ’ത്തില്‍ രണ്‍ബീര്‍ കപൂറാണ് രാമനായി അഭിനയിക്കുന്നത്. കന്നട താരം യാഷ് രാവണനായും രവി ദുബെ ലക്ഷ്മണനായും സണ്ണി ഡിയോള്‍ ഹുമാനുമായാണ് ചിത്രത്തിലെത്തുന്നത്. വിവിധ ഭാഷകളിലായി വലിയ മുതല്‍മുടക്കിലാണ് ഈ ഇതിഹാസ ചിത്രം ഒരുങ്ങിക്കൊണ്ടിരിക്കുന്നത്. സിനിമയുടെ റിലീസിനായി കാത്തിരിക്കുന്നതിനിടയിലാണ് സായി പല്ലവിക്കെതിരായ വിമര്‍ശനങ്ങളും അതിനെത്തുടര്‍ന്നുള്ള പ്രതിരോധങ്ങളും ചര്‍ച്ചയാകുന്നത്.
