ബെംഗളൂരു: നഗരത്തിന്റെ നട്ടെല്ലായ ബെംഗളൂരു മെട്രോ റെയില് കോർപ്പറേഷൻ ലിമിറ്റഡ് വരുമാനം വർധിപ്പിക്കാനുള്ള പരിശ്രമത്തിലാണ്.ഇതിനായി ബിഎംആർസിഎല് നിലവിലുള്ളതും നിർമ്മാണത്തിലിരിക്കുന്നതുമായ നമ്മ മെട്രോ പാതകളിലെ തിരഞ്ഞെടുത്ത പിയറുകളിലും പോർട്ടലുകളിലും പരസ്യം സ്ഥാപിക്കാൻ ടെൻഡർ ക്ഷണിച്ചു. ഇത് ശൃംഖലയിലുടനീളം ആയിരക്കണക്കിന് പരസ്യം ഇടങ്ങള് തുറക്കും.ഈ ടെൻഡറിലൂടെ പർപ്പിള്, ഗ്രീൻ, യെല്ലോ, പിങ്ക്, ബ്ലൂ ലൈനുകളിലെ മെട്രോ നിർമ്മിതികളില് പരസ്യം പാനലുകള് രൂപകല്പ്പന ചെയ്യാനും വികസിപ്പിക്കാനും പ്രവർത്തിപ്പിക്കാനും പരിപാലിക്കാനും ഏജൻസികളില് നിന്ന് അപേക്ഷകള് ക്ഷണിക്കുകയായിരുന്നു.
സ്ഥിരവും ഡിജിറ്റല് പാനലുകളും ഉള്പ്പെട്ട പരസ്യങ്ങള് സൗന്ദര്യാത്മകവും നിയമവിധേയവുമായിരിക്കണമെന്ന് അധികൃതർ പറയുന്നു.മെട്രോ ഓപ്പറേറ്റർക്ക് ടിക്കറ്റിതര വരുമാനം നേടുന്നതിനും ഇടനാഴികളിലെ പരസ്യങ്ങള് നിയന്ത്രിതവും ആകർഷകവുമാണെന്ന് ഉറപ്പാക്കുന്നതിനും ഇത് ലക്ഷ്യമിടുന്നുവെന്ന് ഉദ്യോഗസ്ഥൻ പറഞ്ഞു. കാഴ്ചയെ അലോസരപ്പെടുത്താത്ത വിധം മെട്രോ ഇടനാഴികളിലുടനീളം ചിട്ടപ്പെടുത്തിയതും ലോകോത്തരവുമായ പരസ്യ അടിസ്ഥാന സൗകര്യങ്ങള് വികസിപ്പിക്കുകയാണ് ലക്ഷ്യം. ഗ്രേറ്റർ ബെംഗളൂരു അതോറിറ്റിയുടെയും മറ്റ് നിയമപരമായ മാർഗനിർദ്ദേശങ്ങളും പരസ്യങ്ങള് പാലിക്കണമെന്നും ഉദ്യോഗസ്ഥൻ പറയുന്നു.വൈറ്റ്ഫീല്ഡ്-ചല്ലഗട്ട പർപ്പിള് ലൈൻ, മാടവാര-സില്ക്ക് ഇൻസ്റ്റിറ്റ്യൂട്ട് ഗ്രീൻ ലൈൻ, ബൊമ്മസാന്ദ്ര-ആർവി റോഡ് യെല്ലോ ലൈൻ ഉള്പ്പെടെയുള്ള നിലവിലുള്ളതും നിർമ്മാണത്തിലിരിക്കുന്നതുമായ പാതകള് ടെൻഡറില് ഉള്പ്പെടുന്നു.
പർപ്പിള് ലൈനില് 1.04 ലക്ഷം ചതുരശ്ര അടിയില് 2538 ബോർഡുകള് (1308 പിയറുകളിലും 76 പോർട്ടലുകളിലും). ഗ്രീൻ ലൈനില് 79,000 ചതുരശ്ര അടിയില് 2022 ബോർഡുകള്, യെല്ലോ ലൈനില് 53,000 ചതുരശ്ര അടിയില് 1355 ബോർഡുകള് എന്നിവ സ്ഥാപിക്കും.കാലേന അഗ്രഹാര-തവരക്കരെ പിങ്ക് ലൈൻ, സില്ക്ക് ബോർഡ്-കെംപെഗൗഡ ബ്ലൂ ലൈൻ എന്നിവയും ഭാവി പാതകളിലുണ്ട്. ഏകദേശം 2960 ബോർഡുകളോടെ, ബ്ലൂ ലൈൻ ഈ പദ്ധതിയിലെ ഏറ്റവും വലിയ പരസ്യ ഇടനാഴിയാകുമെന്നാണ് പ്രതീക്ഷ. പിയറുകളിലെ പരസ്യ ബോർഡുകള്ക്ക് 9 അടി x 4 അടി വലുപ്പവും, വലിയ പോർട്ടല് പരസ്യങ്ങള്ക്ക് 8 അടി x 15 അടി അളവുകളുമായിരിക്കും.ജിഎസ്ടി ഉള്പ്പെടെ പ്രതിവർഷം 83.03 കോടി രൂപയാണ് പദ്ധതിക്ക് ബിഎംആർസിഎല് നിശ്ചയിച്ച കുറഞ്ഞ കണ്സെഷൻ ഫീസ്. ഗ്രേറ്റർ ബെംഗളൂരു അതോറിറ്റി ഉള്പ്പെടെയുള്ള നിയമപരമായ ഏജൻസികളില് നിന്ന് അനുമതി നേടുക, പരസ്യം ഘടനകള് സ്ഥാപിക്കുക, വൈദ്യുത, അഗ്നി സുരക്ഷാ മാനദണ്ഡങ്ങള് പാലിക്കുന്നുവെന്ന് ഉറപ്പാക്കുക, കണ്സെഷൻ കാലയളവില് ഡിസ്പ്ലേകള് പരിപാലിക്കുക എന്നിവ കണ്സെഷനയറുടെ ഉത്തരവാദിത്തമാണ്.
കരാറിന്റെ കാലാവധി ഏഴ് വർഷമാണ്. പരസ്പര ധാരണ പ്രകാരം ഇത് മൂന്ന് വർഷം കൂടി നീട്ടാവുന്നതാണെന്ന് രേഖയില് പറയുന്നു. ഹെബ്ബഗോഡി-ഹുസ്കുരു റോഡ് മെട്രോ സ്റ്റേഷനുകള്ക്കിടയിലെ ചില പിയറുകളില് പരമ്പരാഗത ചിത്രീകരണങ്ങളുള്ളതിനാല്, കലാസൃഷ്ടികള് സംരക്ഷിക്കാൻ ഈ പിയറുകള്ക്കിടയിലെ മധ്യഭാഗത്ത് പരസ്യം സ്ഥാപിക്കാൻ അനുമതി നല്കിയേക്കുമെന്ന് രേഖ വ്യക്തമാക്കുന്നു.ടിക്കറ്റ് വരുമാനത്തില് ഉപരി മറ്റ് വരുമാന മാർഗ്ഗങ്ങള് കണ്ടെത്താനുള്ള ശ്രമങ്ങളുടെ ഭാഗമാണ് ഈ നടപടി. അടുത്തകാലത്തായി ബിഎംആർസിഎല്ലിന്റെ ടിക്കറ്റിതര വരുമാനം (എൻഎഫ്ബിആർ) കാര്യമായ വർധനവ് രേഖപ്പെടുത്തിയിട്ടുണ്ട്. 2024-25ല് വെറും 54 കോടി രൂപയായിരുന്നത് 2025-26ല് 145 കോടി രൂപയായി ഉയർന്നു, ഇത് ഏകദേശം 168 ശതമാനം വളർച്ചയാണ് കാണിക്കുന്നത്.
