ബെംഗളൂരു: നമ്മ മെട്രോ പിങ്ക് ലൈനില് നിര്ണായക പരീക്ഷണങ്ങളും പരിശോധനകളും വൈകുന്നു. ഇതേത്തുടര്ന്ന്, 7.5 കിലോമീറ്റര് ദൈര്ഘ്യമുള്ള ഉയരപ്പാതാ ഇടനാഴിയുടെ ഉദ്ഘാടനം മെയ് മാസത്തില് നടക്കുമോ എന്നതില് ആശങ്ക കനക്കുകയുമാണ്.റെയില്വേ മന്ത്രാലയത്തിന് കീഴിലുള്ള റിസര്ച്ച് ഡിസൈന്സ് ആന്ഡ് സ്റ്റാന്ഡേര്ഡ്സ് ഓര്ഗനൈസേഷന് (ആര്ഡിഎസ്ഒ) റോളിങ് സ്റ്റോക്ക്, ട്രാക്ക്, സിഗ്നലിങ്, വേഗത എന്നിവയുമായി ബന്ധപ്പെട്ട് പരിശോധനകള് നടത്തി സുരക്ഷ, പ്രവര്ത്തന ക്ഷമത എന്നിവ കാര്യക്ഷമമാണെന്ന് ഉറപ്പുവരുത്തേണ്ടതുണ്ട്.RDSOയുടെ ട്രയല് സര്ട്ടിഫിക്കേഷന് ഇല്ലാതെ, പുതിയ ട്രെയിനുകള്ക്ക് ഈ പാതയില് ഓടാന് കഴിയില്ല. ആര്ഡിഎസ്ഒ തങ്ങളുടെ പരിശോധന ആരംഭിക്കുംമുന്പ്, ഡിസൈന് അംഗീകാരങ്ങളുമായി ബന്ധപ്പെട്ട സാങ്കേതിക പ്രശ്നങ്ങളെക്കുറിച്ച് ബെംഗളൂരു മെട്രോ റെയില് കോര്പറേഷന് ലിമിറ്റഡിനോട് (BMRCL) ചില ചോദ്യങ്ങള് ഉയര്ത്തിയതായാണ് വിവരം.RDSOയുടെ ചോദ്യങ്ങള്ക്ക് തങ്ങള് ഉത്തരം നല്കിവരികയാണെന്നും ട്രെയിനുകളുടെ പരീക്ഷണ ഓട്ടത്തിനായി ഇതുവരെ കൃത്യമായ സമയപരിധി ലഭിച്ചിട്ടില്ലെന്നുമാണ് BMRCL അധികൃതരുടെ വിശദീകരണം.
ട്രെയിനുകളുടെ ട്രയല് റണ്ണിന് സാധാരണ രണ്ടോ മൂന്നോ ആഴ്ച വേണ്ടിവരും.അത്, വിജയകരമാണെങ്കില്, ആര്ഡിഎസ്ഒ അലോകന റിപ്പോര്ട്ടും സ്പീഡ് സര്ട്ടിഫിക്കറ്റും നല്കും. ഇത് BMRCL മെട്രോ റെയില് സേഫ്റ്റി കമ്മീഷണര്ക്ക് (CMRS) റോളിങ് സ്റ്റോക്ക് പരിശോധനയ്ക്കും റെയില്വേ മന്ത്രാലയത്തില് നിന്നുള്ള അന്തിമ അംഗീകാരത്തിനുമായി സമര്പ്പിക്കുന്നു.ഇതിനുശേഷം, ആര്ഡിഎസ്ഒ അന്തിമ സ്പീഡ് സര്ട്ടിഫിക്കറ്റ് നല്കുകയുമാണ് ചെയ്യുക. സര്വീസ് പ്രവര്ത്തനങ്ങള്ക്കായുള്ള നിയമപരമായ പരിശോധനയ്ക്കായി BMRCL ഈ സര്ട്ടിഫിക്കറ്റ് CMRSന് സമര്പ്പിക്കുകയും ചെയ്യും. സിഗ്നലിങ്ങ് അടക്കം ട്രെയിന് നിയന്ത്രണ സംവിധാനങ്ങള് സംബന്ധിച്ച് സ്വതന്ത്ര സുരക്ഷാ വിലയിരുത്തല് സര്ട്ടിഫിക്കേഷന് (ISA) ആവശ്യമാണ്.ബെംഗളൂരുവിലെ എച്ച്എസ്ആര് ലേഔട്ട് ആസ്ഥാനമായുള്ള ജോഡോവ ടെക്നോളജീസ് പ്രൈവറ്റ് ലിമിറ്റഡ് എന്ന കമ്പനിയാണ് പിങ്ക് ലൈനിനുള്ള ഐഎസ്എ സര്ട്ടിഫിക്കേഷന് നല്കുന്നത്.2025 നവംബറില്, പിങ്ക്, ബ്ലൂ ലൈനുകളുടെ സിഗ്നലിങ്ങിനും ട്രെയിന് നിയന്ത്രണ സംവിധാനങ്ങള്ക്കും ISA അംഗീകാരം നല്കുന്നതിനുള്ള 3.51 കോടി രൂപയുടെ കരാര് ജോഡോവ ടെക്നോളജീസ് നേടിയിരുന്നു.’സിഗ്നലിങ്ങ് സംവിധാനം സുരക്ഷിതമാണെന്ന് സാക്ഷ്യപ്പെടുത്തുന്ന രേഖകള് ഐഎസ്എ ഏജന്സി അവലോകനം ചെയ്യും. പിങ്ക്, ബ്ലൂ ലൈനുകള്ക്ക് സിഗ്നലിങ്ങ് സംവിധാനം നല്കുന്നതിനുള്ള കരാര് ഫ്രഞ്ച് മള്ട്ടിനാഷണല് ആല്സ്റ്റോം ട്രാന്സ്പോര്ട്ട് കമ്പനിയാണ് നേടിയത്.
യെല്ലോ ലൈനിലെന്നപോലെ, ഡ്രൈവറില്ലാ ട്രെയിന് പ്രവര്ത്തനങ്ങള് അനുവദിക്കുന്ന കമ്മ്യൂണിക്കേഷന്സ് ബേസ്ഡ് ട്രെയിന് കണ്ട്രോള് (സിബിടിസി) സംവിധാനമാണ് BMRCL പിങ്ക് ലൈനിലും അവതരിപ്പിക്കുന്നത്.ഫലത്തില് ആര്ഡിഎസ്ഒ പരിശോധന മുതല് സിഎംആര്എസ് സര്ട്ടിഫിക്കേഷന് വരെയുള്ള മുഴുവന് പ്രക്രിയകള്ക്കുമായി രണ്ട് മാസത്തിലേറെ വേണ്ടിവരും. അതായത് മെയ് മാസത്തില് പിങ്ക് ലൈനിന്റെ ഉദ്ഘാടനം സാധ്യമാകുമോ എന്നത് സംശയമാണ്.കൂടാതെ, പിങ്ക് ലൈനിലെ ആറ് സ്റ്റേഷനുകളിലെയും ഫിനിഷിങ്ങ് ജോലികള് മന്ദഗതിയിലാണ് പുരോഗമിക്കുന്നതെന്നും BMRCL വൃത്തങ്ങള് അറിയിക്കുന്നു. മൈസൂരു ലൈറ്റ് ആന്ഡ് ഇന്റീരിയേഴ്സ് പ്രൈവറ്റ് ലിമിറ്റഡ് നാല് സ്റ്റേഷനുകളില് (ഹുളിമാവ്, ഐഐഎംബി, ജെപി നഗര് ഫോര്ത്ത് ഫേസ്, താവരെക്കരെ) ഫിനിഷിങ് ജോലികള് നിര്വഹിക്കുന്നു.എഎന്യു കണ്സ്ട്രക്ഷന്സ് ആണ് കലേന അഗ്രഹാര സ്റ്റേഷനിലെ ജോലികള് ചെയ്യുന്നത്. ജയദേവ ആശുപത്രി സ്റ്റേഷന്റെ പണി യെല്ലോ ലൈനിലെ കരാറുകാരനുമാണ് ഏറ്റെടുത്തത്. പിങ്ക് ലൈനിനായി ബെംഗളൂരു ആസ്ഥാനമായ BEMLല് നിന്ന് BMRCLന് ഇതിനകം നാല് ട്രെയിനുകള് ലഭിച്ചിട്ടുണ്ട്.മെയ് മാസത്തോടെ രണ്ട് ട്രെയിനുകള് കൂടി പ്രതീക്ഷിക്കുകയും ചെയ്യുന്നു. നാല് ട്രെയിനുകള് ഉള്ളതിനാല്, 7.5 കിലോമീറ്റര് ദൈര്ഘ്യമുള്ള പാതയില് പീക്ക്-അവര് ഫ്രീക്വന്സി (ട്രെയിന് കാത്തിരിപ്പ് സമയം) 5-6 മിനിട്ടായിരിക്കുമെന്ന് BMRCL വൃത്തങ്ങള് അറിയിച്ചു.പിങ്ക് ലൈന് ബന്നാര്ഘട്ട റോഡിലേക്ക് മെട്രോ കണക്റ്റിവിറ്റി എത്തിക്കും. കൂടാതെ ജയദേവ ആശുപത്രിയില് ബെംഗളൂരുവിന്റെ മൂന്നാമത്തെ ഇന്റര്ചേഞ്ച് സൃഷ്ടിക്കുകയും ചെയ്യും. പിങ്ക് ലൈനിന്റെ 13.75 കിലോമീറ്റര് ദൈര്ഘ്യമുള്ള ഭൂഗര്ഭ ഭാഗം (ഡയറി സര്ക്കിള്-നാഗവാര) ഡിസംബറിലാണ് തുറക്കുക.
