കണ്ണൂര്: കണ്ണൂർ പയ്യാവൂരില് വിദ്യാർത്ഥിനി സ്കൂള് കെട്ടിടത്തിന് മുകളില് നിന്ന് ചാടി. പയ്യാവൂർ സേക്രട്ട് ഹാർട്ട് ഹയർസെക്കൻഡറി സ്കൂളിലെ പ്ലസ്ടു വിദ്യാർത്ഥിനി ആണ് താഴേക്ക് ചാടിയത്.താഴേക്ക് വീണ് ഗുരുതരമായി പരിക്കേറ്റ കുട്ടിയെ കണ്ണൂരിലെ സ്വകാര്യ ആശുപത്രിയില് പ്രവേശിപ്പിച്ചു. പ്രാക്ടിക്കല് മോഡല് എക്സാം എഴുതാൻ എത്തിയതായിരുന്നു പതിനേഴുകാരി. ഇന്ന് രാവിലെ 8.15ഓടെയാണ് സംഭവമെന്ന് പയ്യാവൂര് സേക്രട്ട് ഹാര്ട്ട് സ്കൂള് പ്രിന്സിപ്പല് കെ ബിനോയ് പറഞ്ഞു.
സ്കൂളില് പ്രാക്ടിക്കല് മോഡല് പരീക്ഷകള് നടക്കുന്നുണ്ടായിരുന്നു. ഇതിനിടയിലാണ് വിദ്യാര്ത്ഥിനി കെട്ടിടത്തിന്റെ മുകളില് നിന്ന് താഴേക്ക് ചാടിയത്. കെട്ടിടത്തിന്റെ മൂന്നാം നിലയില് നിന്നാണ് ചാടിയത്. പഠിക്കാൻ മിടുക്കിയായിരുന്ന കുട്ടിയായിരുന്നുവെന്നും സ്കൂളില് മറ്റു പ്രശ്നങ്ങള് ഒന്നും ഉണ്ടായിരുന്നില്ലെന്നും പ്രിന്സിപ്പല് കെ ബിനോയ് പറഞ്ഞു. മാനസിക പ്രയാസം ഒന്നും ശ്രദ്ധയില്പെട്ടില്ല. ക്രിസ്തുമസ് അവധി കഴിഞ്ഞ് കുട്ടികള് തിരിച്ചെത്തിയതാണ്. പരീക്ഷയുമായി ബന്ധപ്പെട്ട് യാതൊരു മാനസിക പ്രയാസവും കുട്ടിക്ക് ഉണ്ടായിരുന്നില്ലെന്നും സ്കൂള് പ്രിൻസിപ്പല് കെ ബിനോയ് പറഞ്ഞു.വിദ്യാർത്ഥിനിയുടെ അമ്മ അടുത്ത ദിവസം വിദേശത്തേക്ക് ജോലി ആവശ്യത്തിന് പോകാനിരിക്കെയാണ് അപകടം.
