ദില്ലി : ഇന്ത്യയില് ഏറ്റവും പ്രചാരമുള്ള ഗതാഗത സംവിധാനമാണ് റെയില്വേ. ലോകത്തിലെ തന്നെ ഏറ്റവും വലിയ റെയില് ശൃംഖലകളിലൊന്നാണ് ഇന്ത്യയിലേത്.ദിനംപ്രതി പതിനായിരക്കണക്കിന് യാത്രക്കാരാണ് ട്രെയിനില് സഞ്ചരിക്കുന്നത്. കുറഞ്ഞ ചെലവും യാത്രാ സുഖവുമാണ് ട്രെയിൻ യാത്രകളുടെ പ്രത്യേകത. എന്നാല്, സൗജന്യ യാത്ര വാഗ്ദാനം ചെയ്യുന്ന ഒരു ട്രെയിൻ ഇന്ത്യയിലുണ്ട് എന്ന് പറഞ്ഞാല് നിങ്ങള് വിശ്വസിക്കുമോ? സംഭവം സത്യമാണ്.പഞ്ചാബിലെ നങ്കലിനും ഹിമാചല് പ്രദേശിലെ ഭക്രയ്ക്കും ഇടയില് സർവീസ് നടത്തുന്ന ഭക്ര-നംഗല് ട്രെയിനാണ് സൗജന്യ യാത്ര വാഗ്ദാനം ചെയ്യുന്നത്. 13 കിലോമീറ്റർ സഞ്ചരിക്കുന്ന ഈ ട്രെയിൻ മനോഹരമായ സത്ലജ് നദിക്കും സിവാലിക് കുന്നുകള്ക്കും മുകളിലൂടെയാണ് കടന്നുപോകുന്നത്. ഭക്ര-നംഗല് അണക്കെട്ടിന്റെ നിർമ്മാണത്തിനായി തൊഴിലാളികളെ എത്തിക്കുന്നതിനും നിർമ്മാണ സാമഗ്രികള് വിതരണം ചെയ്യുന്നതിനുമാണ് ഈ ട്രെയിൻ ആദ്യം ഉപയോഗിച്ചിരുന്നത്.1948ല് സർവീസ് ആരംഭിച്ച ഈ ട്രെയിനിന്റെ പ്രവർത്തനത്തില് കഴിഞ്ഞ 75 വര്ഷത്തിലധികമായി ഒരു മാറ്റവും സംഭവിച്ചിട്ടില്ല എന്നതാണ് പ്രത്യേകത.
1953ല് അമേരിക്കയില് നിന്ന് ഇറക്കുമതി ചെയ്ത ഡീസല് എഞ്ചിനുകള് ട്രെയിനില് ഘടിപ്പിച്ചു. ട്രെയിൻ മണിക്കൂറില് ഏകദേശം 18 മുതല് 20 ലിറ്റർ വരെ ഇന്ധനം ഉപയോഗിക്കുന്നുണ്ട്. ഇതിനിടെ, ഭക്ര ബിയാസ് മാനേജ്മെന്റ് ബോർഡ് (ബിബിഎംബി) ടിക്കറ്റ് നിരക്ക് ഈടാക്കുന്നത് പരിഗണിച്ചിരുന്നെങ്കിലും ട്രെയിനിന്റെ പൈതൃകത്തെ ആദരിച്ചുകൊണ്ട് സൗജന്യമായി നിലനിർത്താനുള്ള തീരുമാനം എടുക്കുകയായിരുന്നു.പ്രതിദിനം 800-ലധികം ആളുകള് ഈ ട്രെയിൻ ഉപയോഗിക്കുന്നുണ്ടെന്നാണ് കണക്കുകള് വ്യക്തമാക്കുന്നത്. യാത്രക്കാർക്ക് ഇന്ത്യയിലെ ഏറ്റവും ഉയരം കൂടിയ അണക്കെട്ടുകളില് ഒന്നായ ഭക്ര-നംഗല് അണക്കെട്ടും മനോഹരമായ സിവാലിക് കുന്നുകളും സന്ദർശകർക്ക് കാണാൻ കഴിയും എന്നതാണ് പ്രത്യേകത.അണക്കെട്ടിന്റെ നിർമ്മാണ വേളയില് ഫെറി തൊഴിലാളികള്ക്കും എഞ്ചിനീയർമാർക്കും വസ്തുക്കള് എത്തിക്കാനും വേണ്ടിയാണ് ട്രെയിൻ ഉപയോഗിച്ചതെങ്കിലും കാലക്രമേണ പദ്ധതി പൂർത്തിയായപ്പോള് ഡാമിലെ ജീവനക്കാർക്കും നാട്ടുകാർക്കും സന്ദർശകർക്കും വേണ്ടിയുള്ള ഒരു സേവനമെന്ന നിലയില് ട്രെയിൻ സൗജന്യമായി ഓടിത്തുടങ്ങി. പതിറ്റാണ്ടുകളായി സംഭവിക്കുന്ന മാറ്റങ്ങളെ ഈ ട്രെയിൻ എങ്ങനെ അതിജീവിച്ചു എന്നതാണ് അതിലും ശ്രദ്ധേയമായ കാര്യം. സർക്കാരുകള് മാറി, നയങ്ങള് വികസിച്ചു, റെയില്വേ സംവിധാനങ്ങള് ആധുനികവല്ക്കരിക്കപ്പെട്ടു. എന്നാല്, ഈ ഒരു ട്രെയിൻ സർവീസ് മാത്രം ഇന്നും മാറ്റമില്ലാതെ തുടരുന്നു.
