ബെംഗളൂരുവിലെ നമ്മ മെട്രോയുടെ ടിക്കറ്റിതര വരുമാനം വർധിപ്പിക്കാൻ പുതിയ കരാറുകളിലേർപ്പെട്ട് ബെംഗളൂരു മെട്രോ റെയിൽ കോർപറേഷൻ ലിമിറ്റഡ് (ബിഎംആർസിഎൽ). പരസ്യങ്ങളിലൂടെ വരുമാനം നേടാനായി ബിഎംആർസിഎൽ രണ്ട് സ്വകാര്യ കമ്പനികളുമായി കരാറുകളിൽ ഒപ്പുവെച്ചു. മുദ്ര വെൻചേഴ്സ്, ലോകേഷ് ഔട്ട്ഡോർ എന്നീ കമ്പനികളുമായാണ് കരാറിൽ ഏർപ്പെട്ടത്.പുതിയ കരാറുകൾ മുഖേന പ്രതിവർഷം 25 കോടി രൂപയുടെ വരുമാനമാണ് ബിഎംആർസിഎൽ പ്രതീക്ഷിക്കുന്നത്. ഏഴു വർഷത്തേക്കാണ് കരാർ.
ബെംഗളൂരു മെട്രോയുടെ പർപ്പിൾ, ഗ്രീൻ ലൈനുകളിൽ സർവീസ് നടത്തുന്ന ട്രെയിനുകളിലാണ് പരസ്യം പതിക്കുക. ട്രെയിനിന് അകവും പുറവും പരസ്യങ്ങൾ കൊണ്ട് നിറയും.പർപ്പിൾ ലൈനിൽ സർവീസ് നടത്തുന്ന ട്രെയിനുകളിൽ മുദ്രാ വെൻചേഴ്സും ഗ്രീൻ ലൈനിൽ സർവീസ് നടത്തുന്ന ട്രെയിനുകളിൽ ലോകേഷ് ഔട്ട്ഡോറും പരസ്യം ചെയ്യും. മുദ്രാ വെൻചേഴ്സുമായി 1.26 കോടി രൂപയ്ക്കും ലോകേഷ് ഔട്ട്ഡോറുമായി 81.49 ലക്ഷം രൂപയ്ക്കുമാണ് കരാർ. പ്രാരംഭഘട്ടത്തിൽ 10 ട്രെയിനുകളിലാകും പരസ്യം പതിക്കുക.
ട്രെയിനുകളുടെ പുറം പരസ്യ ബാനർകൊണ്ട് ചുറ്റും. ഇത്തരത്തിൽ പരസ്യം പതിക്കുന്നത് കോച്ചുകൾക്ക് കേടുപാട് ഉണ്ടാക്കുമോ എന്ന ആശങ്ക ഉയർന്നിരുന്നെങ്കിലും രണ്ട് ട്രെയിനുകളിൽ പരീക്ഷണാടിസ്ഥാനത്തിൽ പരസ്യം പതിച്ചു ആശങ്ക ലഘൂകരിച്ചു.ടിക്കറ്റിതര വരുമാനം വർധിപ്പിക്കാനായി മറ്റ് മാർഗങ്ങളും ബിഎംആർസിഎൽ ആലോചിക്കുന്നുണ്ട്. ഡൽഹി മെട്രോയിൽനിന്ന് പ്രചോദനം ഉൾക്കൊണ്ട് കാർഗോ സർവീസിന് ബിഎംആർസിഎൽ ആലോചന നടത്തിവരികയാണ്. തിരക്കില്ലാത്ത മണിക്കൂറുകൾ മെട്രോ വഴിയുള്ള കാർഗോ നീക്കത്തിനാണ് ആലോചന നടക്കുന്നത്.
ഇതിനു പുറമേ, മജസ്റ്റിക് മെട്രോ സ്റ്റേഷന് മുകളിലായി ഹോട്ടൽ ഉൾപ്പെടെയുള്ള കോംപ്ലക്സ് നിർമിക്കാൻ ബിഎംആർസിഎൽ ടെൻഡർ ക്ഷണിച്ചിരുന്നു. പൊതു – സ്വകാര്യ പങ്കാളിത്തത്തിലാണ് പദ്ധതി നടപ്പിലാക്കുക.നേരത്തെ മെട്രോ തൂണുകളിൽ പരസ്യം അനുവദിച്ചിരുന്നെങ്കിലും ഇടക്കാലത്ത് ഇത് ബിഎംആർസിഎൽ നിർത്തലാക്കിയിരുന്നു. മെട്രോ തൂണുകളിൽ വീണ്ടും പരസ്യങ്ങൾ അനുവദിക്കാൻ ആലോചന നടക്കുന്നുണ്ട്. പർപ്പിൾ, ഗ്രീൻ ലൈനുകളിലാകെ 1844 തൂണുകളാണ് ഉള്ളത്.
അതിനിടെ, ടിക്കറ്റ് നിരക്ക് വർധനയ്ക്ക് പിന്നാലെ യാത്രക്കാർ എണ്ണത്തിൽ ഇടിവുണ്ടായെങ്കിലും ആഴ്ചകൾക്കിപ്പുറം ഇത് തിരിച്ചുപിടിക്കാൻ നമ്മ മെട്രോയ്ക്ക് കഴിഞ്ഞു. ബെംഗളൂരു മെട്രോയുടെ ചരിത്രത്തിൽ പ്രതിദിന യാത്രക്കാരുടെ കണക്കിൽ രണ്ടാമതെത്തിയ ദിവസമായി ഏപ്രിൽ 17 മാറി. ഈ ദിവസം 9,08,153 യാത്രക്കാരാണ് സഞ്ചരിച്ചത്.
