ചെന്നൈ: തമിഴ്‌നാട്ടിലെ തേനി ജില്ലയില്‍ 17 വിചാരണത്തടവുകാർ ജയില്‍ ചാടിയ സംഭവത്തില്‍ മുഖ്യമന്ത്രി വിജയ്ക്കും ഭരണകൂടത്തിനുമെതിരെ വിമർശനം ശക്തമാക്കി ഡിഎംകെ അധ്യക്ഷൻ എം.കെ.സ്റ്റാലിൻ. ‘ബ്രേക്കിങ് ബാഡ്’ എന്ന പരാമർശത്തിന് പിന്നാലെ തമിഴ്‌നാട്ടില്‍ ഇപ്പോള്‍ ‘പ്രിസണ്‍ ബ്രേക്ക്’ തുടങ്ങിയെന്നാണ് സ്റ്റാലിന്റെ പരിഹാസം. തിങ്കളാഴ്ച തെക്കമ്പട്ടി സബ് ജയിലില്‍നിന്ന് തടവുകാർ രക്ഷപ്പെട്ട സംഭവത്തില്‍ സംസ്ഥാനത്തെ ക്രമസമാധാന നിലയെയും ജയില്‍ സുരക്ഷയെയും അദ്ദേഹം ചോദ്യം ചെയ്തു.ലഹരിമരുന്ന് വേട്ടയുമായി ബന്ധപ്പെട്ട കേസില്‍ ടിവികെ പ്രവർത്തകൻ അറസ്റ്റിലായതിനു പിന്നാലെ, കഴിഞ്ഞ ശനിയാഴ്ച വിജയ്‌യുടെ പാർട്ടിയെ ‘ബ്രേക്കിങ് ബാഡ് പാർട്ടി’ എന്ന് സ്റ്റാലിൻ വിശേഷിപ്പിച്ചിരുന്നു.
ഇതിനു പിന്നാലെയാണ് ജയില്‍ ചാട്ടത്തെക്കുറിച്ചുള്ള പുതിയ വിമർശനം. 1995നുശേഷം ഇത്രയധികം തടവുകാർ ഒരുമിച്ച്‌ രക്ഷപ്പെടുന്ന ആദ്യ സംഭവമാണിതെന്നാണ് റിപ്പോർട്ടുകളെന്നും 2026ല്‍ ഇത്തരം സുരക്ഷാവീഴ്ച അംഗീകരിക്കാനാവില്ലെന്നും സ്റ്റാലിൻ പറഞ്ഞു. വിജയുടെ കീഴിലുള്ള ആഭ്യന്തരവകുപ്പിന്റെ പ്രവർത്തനത്തെയും അദ്ദേഹം വിമർശിച്ചു.ജയില്‍ ചാട്ടത്തില്‍ ടിവികെയെ വിമർശിച്ച്‌ എഐഎഡിഎംകെ അധ്യക്ഷൻ എടപ്പാടി കെ. പളനിസ്വാമിയും രംഗത്തെത്തി. നേരത്തേ ചെന്നൈയിലെ പുഴല്‍ ജയിലില്‍നിന്ന് രണ്ട് തടവുകാർ രക്ഷപ്പെട്ട സംഭവത്തിനു പിന്നാലെയും സർക്കാർ നടപടിയെടുത്തില്ലെന്ന് അദ്ദേഹം ആരോപിച്ചു. രക്ഷപ്പെട്ടവർ വിജയ് ആരാധകരാണോ ടിവികെ പ്രവർത്തകരാണോ എന്ന് പരിശോധിക്കണമെന്ന് ഡിഎംകെ നേതാവ് ടി.കെ.എസ്. ഇളങ്കോവനും പരിഹസിച്ചു. സുരക്ഷാവീഴ്ചയ്ക്ക് ഉത്തരവാദിത്തം ഏറ്റെടുക്കണമെന്നും എഐഎഡിഎംകെ നേതാക്കള്‍ ആവശ്യപ്പെട്ടു.
അതേസമയം, രക്ഷപ്പെട്ട തടവുകാരില്‍ നാലുപേരെ പൊലീസ് വീണ്ടും പിടികൂടി. ശേഷിക്കുന്നവർക്കായി തേനി വനമേഖലയില്‍ തിരച്ചില്‍ തുടരുകയാണ്. പ്രത്യേക പൊലീസ് സംഘങ്ങളെ വിന്യസിച്ചതിനൊപ്പം 16 ഇടങ്ങളില്‍ പരിശോധനാ കേന്ദ്രങ്ങളും ബസ് സ്റ്റാൻഡുകളില്‍ പരിശോധനയും ഏർപ്പെടുത്തിയിട്ടുണ്ട്. ഡ്രോണുകളും തിരച്ചിലിന് ഉപയോഗിക്കുന്നുണ്ട്. തമിഴ്‌നാട് ജയില്‍ വകുപ്പ് ഡിജിപി സന്ദീപ് റായ് റാത്തോറും അന്വേഷണം വിലയിരുത്താൻ മധുരയിലെത്തി. പ്രാഥമിക വിവരങ്ങള്‍ പ്രകാരം, അപസ്മാരമുണ്ടായതായി നടിച്ച്‌ ഒരു തടവുകാരൻ ജയില്‍ ജീവനക്കാരെ സമീപിച്ചതിനു പിന്നാലെയാണ് രക്ഷപ്പെടല്‍ നടന്നതെന്നാണ് പൊലീസിന്റെ സംശയം. സഹായിക്കാനായി സെല്ലിന്റെ വാതില്‍ തുറന്നപ്പോള്‍ മറ്റ് തടവുകാർ ജീവനക്കാരെ ആക്രമിച്ച്‌ കീഴടക്കി രക്ഷപ്പെട്ടതായാണ് വിവരം. ശേഷിക്കുന്നവരെയും പിടികൂടാനാകുമെന്ന ആത്മവിശ്വാസം ദക്ഷിണമേഖലാ ഐജി ബിദാരി പ്രകടിപ്പിച്ചു.
