ബെംഗളൂരു: സംസ്ഥാനത്തെ നാല് പൊതുഗതാഗത കോർപറേഷനുകളുടെ പുതുക്കിയ ബസ് നിരക്കുകള്‍ പ്രാബല്യത്തില്‍ വന്നതോടെ എതിർപ്പ് ശക്തം.സംസ്ഥാനത്തെ നാല് പൊതുഗതാഗത കോർപറേഷനുകള്‍ നിരക്കില്‍ വർധന വരുത്തി. വ്യാഴാഴ്ച അർധരാത്രി മുതല്‍ ബിഎംടിസി (BMTC) ബസുകളില്‍ 33% മുതല്‍ 35% വരെയും കെഎസ്‌ആർടിസി (KSRTC) എൻ.ഡബ്ല്യുകെആർടിസി (NWKRTC), കെകെആർടിസി (KKRTC) എന്നിവയില്‍ 23% വീതവും നിരക്ക് വർധിക്കും.2009നും 2025നും ഇടയിലെ നിരക്ക് വർധനകള്‍ 3.5% മുതല്‍ 15% വരെ മാത്രമായിരുന്നുവെങ്കില്‍ ഇത്തവണത്തെ വർധന ഞെട്ടിക്കുന്നതാണ്. ഇതോടെ, ചില റൂട്ടുകളില്‍ ബിഎംടിസി ബസുകളിലെ അടിസ്ഥാന ടിക്കറ്റ് നിരക്ക് മെട്രോ നിരക്കിന് തുല്യമായി. ബിഎംടിസിയുടെ പ്രീമിയം ബസുകളിലെ യാത്രയുടെ ചെലവ് യാത്രക്കാരെ ഞെട്ടിക്കും.
വിമാനത്താവളത്തിലേക്ക് യാത്ര ചെയ്യുന്നവർ ‘വായു വജ്ര’ (Vayu Vajra) സർവീസുകള്‍ക്കായി കൂടുതല്‍ പണം മുടക്കേണ്ടിവരും.നിരക്ക് വർധനയ്‌ക്കെതിരെ സോഷ്യല്‍ മീഡിയയില്‍ പ്രതിഷേധം ശക്തമാണ്. വാർഷിക ശമ്പള വർധന വെറും 3% മാത്രം ലഭിക്കുന്ന ബെംഗളൂരുവിലെ സാധാരണക്കാർക്ക് എങ്ങനെയാണ് 35% നിരക്ക് വർധന താങ്ങാനാവുക എന്ന ചോദ്യമാണ് ഗതാഗത മന്ത്രി ബൈരാത്തി സുരേഷിനോട് സമൂഹമാധ്യമങ്ങളിലൂടെ ജനങ്ങള്‍ ചോദിക്കുന്നത്. ദീപാവലി സമ്മാനമായി ഇത്രയും ക്രൂരമായ തീരുമാനമാണോ കോണ്‍ഗ്രസ് സർക്കാർ ജനങ്ങള്‍ക്ക് നല്‍കുന്നതെന്ന ചോദ്യം ഉയർന്നു. സ്ത്രീകള്‍ക്ക് സൗജന്യ യാത്ര അനുവദിക്കുന്നതിനായി പുരുഷന്മാർ എന്തിന് കൂടുതല്‍ പണം നല്‍കണം എന്ന ചോദ്യമാണ് കൂടുതലായി ഉയരുന്നത്.പ്രവർത്തനച്ചെലവ്, ഇന്ധനവില വർധന, ജീവനക്കാരുടെ ചെലവുകള്‍ എന്നിവ ചൂണ്ടിക്കാട്ടിയാണ് ബസ് നിരക്ക് വർധനയെ സർക്കാർ ന്യായീകരിക്കുന്നത്. കോർപറേഷനുകള്‍ കടുത്ത സാമ്പത്തിക പ്രതിസന്ധിയിലാണെന്ന് ഗതാഗത മന്ത്രി ബൈരാത്തി സുരേഷ് അഭിപ്രായപ്പെട്ടു.
‘ശക്തി’ (Shakti) പദ്ധതി സംസ്ഥാനത്തെ കോർപറേഷനുകളെ പ്രതിസന്ധിയിലാക്കുന്നുവെന്ന വാദം അദ്ദേഹം തള്ളി. നഗരങ്ങള്‍ക്കിടയിലുള്ള യാത്രകള്‍ക്കും ചെലവ് വർധിക്കും. ബെംഗളൂരുവില്‍ നിന്ന് കലബുറഗിയിലേക്കുള്ള എക്സ്പ്രസ് ബസ് യാത്രയ്ക്ക് നേരത്തെ 754 രൂപയായിരുന്നത് ഇപ്പോള്‍ 928 രൂപയായി ഉയർന്നു (174 രൂപയുടെ വർധന). ബെംഗളൂരു – ബെലഗാവി റൂട്ടിലെ നിരക്ക് 603 രൂപയില്‍ നിന്ന് 742 രൂപയായി വർധിച്ചു.ബസ് നിരക്ക് വർധന പുരുഷ യാത്രക്കാരെയാണ് ഏറ്റവും കൂടുതല്‍ ബാധിക്കുക. സംസ്ഥാനത്തെ നാല് പൊതുഗതാഗത കോർപറേഷനുകളിലായി ദിവസവും 1.25 കോടി യാത്രക്കാർ സഞ്ചരിക്കുന്നുണ്ട്. ഇതില്‍ 74.4 ലക്ഷം പേർ ‘ശക്തി’ പദ്ധതി പ്രകാരം സൗജന്യ യാത്ര നടത്തുന്ന സ്ത്രീകളാണ്. ബാക്കിയുള്ള 50 ലക്ഷത്തിലധികം യാത്രക്കാരുണ്ട്. ഇവരില്‍ ഭൂരിഭാഗവും ടിക്കറ്റിന് പണം നല്‍കി യാത്ര ചെയ്യുന്ന പുരുഷന്മാരാണ്.
