ബെംഗളൂരു: ഐടി നഗരമായ ബെംഗളൂരുവിലെ തനിസാന്ദ്രയില് വന്ദേ ഭാരത് സ്ലീപ്പർ ട്രെയിനുകള്ക്കായി ആരംഭിക്കുന്ന ഡിപ്പോയുടെ നിർമാണം 2027ല് ആരംഭിച്ചേക്കും.228 കോടി രൂപ ചെലവഴിച്ചാണ് ഡിപ്പോ നിർമിക്കുക. ആറ് മാസത്തിനുള്ളില് നിർമാണം ആരംഭിക്കാനും 30 മാസത്തിനുള്ളില് പൂർത്തിയാക്കാനുമാണ് ലക്ഷ്യമിടുന്നത്.ഡിപ്പോ നിർമാണത്തിനായി ബെംഗളൂരു നഗരത്തിന്റെ വടക്കൻ ഭാഗത്തും പരിസരത്തുമായി ഏകദേശം 14 ഹെക്ടർ സ്വകാര്യ ഭൂമി ഏറ്റെടുക്കുന്നതിന് സൗത്ത് വെസ്റ്റേണ് റെയില്വേ (എസ്ഡബ്ല്യുആർ) അടുത്തിടെ വിജ്ഞാപനം പുറപ്പെടുവിച്ചിരുന്നു. പൊതുജനങ്ങള് സമർപ്പിച്ച എതിർപ്പുകള് പരിശോധിച്ച് പരിഹരിച്ചാല് ഡിപ്പോ നിർമാണം ആറ് മാസത്തിനുള്ളില് ആരംഭിക്കാനാണ് ലക്ഷ്യമിടുന്നത്.അടുത്തിടെ അവതരിപ്പിച്ച വന്ദേ ഭാരത് സ്ലീപ്പർ ട്രെയിനുകളുടെ അറ്റകുറ്റപ്പണികള്ക്കായിട്ടാണ് ഡിപ്പോ തയാറാക്കുന്നത്.
നിലവില് രാജ്യത്ത് വാണിജ്യപരമായി രണ്ട് വിബി സ്ലീപ്പർ റേക്കുകള് മാത്രമേ പ്രവർത്തിക്കുന്നുള്ളൂ. ഓഗസ്റ്റില് ഏറെ പ്രതീക്ഷയോടെ കാത്തിരിക്കുന്ന ബെംഗളൂരു – മുംബൈ റൂട്ട് ആരംഭിക്കുന്നതിനായി രണ്ട് റേക്കുകള് കൂടി ഏർപ്പെടുത്താൻ സാധ്യതയുണ്ട്. ഏതാനം വർഷങ്ങള്ക്കുള്ളില് പൊതു – സ്വകാര്യ നിർമാതാക്കള് 100ലധികം വിബി സ്ലീപ്പർ റേക്കുകള് വിതരണം ചെയ്യുമെന്ന് റെയില്വേ പ്രതീക്ഷിക്കുന്നുണ്ട്. ഈ സാഹചര്യത്തില് അറ്റകുറ്റപ്പണി സൗകര്യങ്ങള്ക്കായി ഡിപ്പോ ആവശ്യമാണ്.വന്ദേ ഭാരത് സ്ലീപ്പർ ട്രെയിനുകള്ക്കായുള്ള ഡിപ്പോ നിർമാണത്തിനായി ഭൂമി ഏറ്റെടുക്കല് പ്രക്രിയ ആരംഭിച്ചു. ജൂലൈ 26ന് മുൻപ് ഭൂമി ഏറ്റെടുക്കലുമായി ബന്ധപ്പെട്ട് പൊതുജനങ്ങള്ക്ക് പരാതി സമർപ്പിക്കാമെന്ന് സൗത്ത് വെസ്റ്റേണ് റെയില്വേ ഉദ്യോഗസ്ഥൻ പറഞ്ഞു.
ജൂണില് പ്രസിദ്ധീകരിച്ച ഔദ്യോഗിക ഗസറ്റ് വിജ്ഞാപനം അനുസരിച്ച് തനിസാന്ദ്ര റെയില്വേ സ്റ്റേഷന് സമീപമുള്ള റെയില്വേ ലൈനിന്റെ ഇരുവശത്തുമുള്ള 14 പ്ലോട്ടുകള് ഏറ്റെടുക്കാൻ സൗത്ത് വെസ്റ്റേണ് റെയില്വേ നിർദേശിക്കുന്നു.നിലവില് വിജ്ഞാപനം ചെയ്തിരിക്കുന്ന ചില പ്ലോട്ടുകള് റെസിഡൻഷ്യല് ഭാഗമാണ്.സ്വകാര്യ ഭൂമിയുടെ ഒരു ചെറിയ ഭാഗത്തിനായി മാത്രമാണ് വിജ്ഞാപനം പുറത്തിറക്കിയിരിക്കുന്നതെന്നും ഡിപ്പോ കൂടുതലായും റെയില്വേ ഭൂമിയിലാണ് നിർമിക്കുന്നതെന്നും ഉദ്യോഗസ്ഥൻ കൂട്ടിച്ചേർത്തു.സ്റ്റേബിളിങ് ലൈനുകള്, വർക്ക്ഷോപ്പ് ഇൻഫ്രാസ്ട്രക്ചർ, യൂട്ടിലിറ്റി സേവനങ്ങള്, അപ്രോച്ച് റോഡുകള്, സർവീസ് റോഡുകള് എന്നിവ ഡിപ്പോയില് സൗകര്യം ഉണ്ടാകും. റെയില്വേയുമായി ബന്ധപ്പെട്ട മറ്റ് ആവശ്യങ്ങള്ക്കും ഭൂമി ഉപയോഗിക്കാമെന്ന് സൗത്ത് വെസ്റ്റേണ് റെയില്വേ വ്യക്തമാക്കി. ഈ വർഷം ആദ്യം ഹൈദരാബാദ് ആസ്ഥാനമായുള്ള പവർ മെക്ക് പ്രോജക്ടുകള്ക്ക് ഡിപ്പോ നിർമിക്കാനുള്ള ടെൻഡർ ലഭിച്ചു. അടുത്ത വർഷം ആദ്യം പണി ആരംഭിക്കുമെന്ന് കമ്പനി പ്രതീക്ഷിക്കുന്നു.
