ബെംഗളൂരു: ബെല്ലന്തൂർ മേഖല ഉത്തരേന്ത്യക്കാർ ‘കൈയടക്കി’യിരിക്കുകയാണോ? ബെംഗളൂരുവിലെ കന്നഡിഗരും ഇതര സംസ്ഥാനക്കാരും എന്ന ചർച്ചയ്ക്ക് എരിവ് പകരുന്ന ഒരു റെഡ്ഢിറ്റ് പോസ്റ്റ് വലിയ തോതില് ചർച്ചയാവുകയാണ്.ദേശീയ മാധ്യമങ്ങളടക്കം ഈ ചർച്ച ഏറ്റെടുത്തിട്ടുണ്ട്. ബെംഗളൂരുവിന്റെ കേന്ദ്ര മേഖലയില് നിന്ന് സബർബൻ മേഖലയായ ബെല്ലന്തൂരിലേക്ക് അപ്പാർട്ടുമെന്റെടുത്ത് മാറിയ ഒരു കന്നഡിഗയുടേതാണ് പോസ്റ്റ്. തന്റെ തീരുമാനത്തില് ഇപ്പോള് ഖേദിക്കുന്നതായാണ് റെഡ്ഢിറ്റ് ഉപയോക്താവ് പറയുന്നത്.ബെംഗളൂരു ജീവിതം തനിക്ക് മിസ് ചെയ്യുന്നതായി പോസ്റ്റിട്ടയാള് പറയുന്നു. നിലവില് താമസിക്കുന്ന അപ്പാർട്ടുമെന്റിന്റെ ഏക മെച്ചം അത് ഓഫീസിന് അടുത്താണെന്നത് മാത്രമാണ്. എന്നാല്, ഒരു കന്നഡ ജീവിതം തനിക്ക് ഇപ്പോഴില്ല. കന്നഡ ആഘോഷങ്ങള് ബെല്ലന്തൂരിലില്ല. ആ സ്ഥലം തന്റെ സ്വന്തമാണെന്ന തോന്നലില്ല. താൻ ബസവനഗുഡിയിലാണ് തന്റെ ജീവിതത്തിന്റെ വലിയൊരു പങ്കും ജീവിച്ചത്. ഇപ്പോഴത്തെ ഈ മാറ്റത്തോട് പൊരുത്തപ്പെടാൻ കഴിയുന്നില്ല. ശരിക്കും ഉത്തരേന്ത്യയിലെവിടെയോ ആണ് താമസിക്കുന്നതെന്ന് തനിക്ക് തോന്നിപ്പോകുന്നു എന്നും അദ്ദേഹം കൂട്ടിച്ചേർത്തു.വലിയ ചർച്ചകളാണ് ഈ പോസ്റ്റിനു താഴെ നടക്കുന്നത്.
ബെംഗളൂരുവിലെ പല മേഖലകളിലും ഇപ്പോള് കന്നഡ ഭാഷ നിലനില്ക്കുന്നില്ലെന്നതാണ് പലരുടെയും പരാതി. ഒരാള് എഴുതുന്നത് ഇങ്ങനെയാണ്: “എനിക്കും സമാന അനുഭവമാണ്. ഞാൻ വളർന്നത് മല്ലേശ്വരത്താണ്. പിന്നീട് കെങ്കേരിയിലേക്ക് മാറി. ഇപ്പോള് അഗര തടാകത്തിനടുത്താണ് താമസം. കന്നഡ സംസാരിക്കാൻ പോലും കഴിയാറില്ല. എന്തിനും ഏതിനും ഹിന്ദിയില് സംസാരിക്കേണ്ടി വരുന്നത് വളരെ നിരാശാജനകമാണ്. പക്ഷേ, വാരാന്ത്യങ്ങളില്, ഞാൻ പഴയ കന്നഡ ഗാനങ്ങള് ആലപിക്കും. വാരാന്ത്യങ്ങളില് സുഹൃത്തുക്കളെ കാണാൻ ഞാൻ ജയനഗറിലേക്കോ മല്ലേശ്വരത്തേക്കോ പോകുന്നു. ഞാൻ വളർന്ന സ്ഥലത്തെക്കുറിച്ച് ഓർമ്മിക്കാൻ വേണ്ടി.”ബെംഗളൂരു നഗരം ‘ഉത്തരേന്ത്യാവല്ക്കരിക്കപ്പെടുന്നു’ എന്ന പരാതി ഏറെ നാളായി ഉയരുന്നുണ്ട്. ഇതര സംസ്ഥാനങ്ങളില് നിന്ന് വരുന്നവർ നഗരത്തെ അധിനിവേശം ചെയ്യുന്നു എന്ന് പലർക്കും പരാതിയുണ്ട്. നിരവധി കന്നഡ ഭാഷാ സംഘടനകളും ഈ പ്രശ്നം ചൂണ്ടിക്കാട്ടി രംഗത്തിറങ്ങി. കന്നഡക്കാരുടെ നാട്ടിലെത്തുന്നവർ കന്നഡ ഭാഷ സംസാരിക്കണമെന്ന് ഭാഷാ സംഘടനകള് ആവശ്യപ്പെടുന്നു. ഇവർ പലപ്പോഴും തെരുവിലിറങ്ങി ആളുകളോട് ഹിന്ദി സംസാരിക്കുന്നത് വിലക്കിയ സംഭവങ്ങളുമുണ്ടായിട്ടുണ്ട്.എന്നാല് ഇതര സംസ്ഥാനക്കാർ കൂടി ചേർന്ന് നിർമിച്ചെടുത്ത നഗരവും സംസ്കാരവുമാണ് ബെംഗളൂരുവിലേതെന്ന് എതിർവാദവും ഉയരുന്നുണ്ട്. ബെംഗളൂരു നഗരത്തിന്റെ പ്രധാന പ്രത്യേകത ആ നഗരത്തിലെ വിവിധഭാഷാ സംസ്കാരമാണ്. അത് അനുവദിക്കാതെ വന്നാല് നഗരം മുരടിക്കുമെന്ന് ഇവർ ചൂണ്ടിക്കാട്ടുന്നു.
