മയക്കുമരുന്നും തോക്കുകളുമായി അഞ്ച് മലയാളികള്‍ അറസ്റ്റില്‍

മൂന്ന് കേസുകളിലായി മംഗളൂരു സിറ്റി ക്രൈംബ്രാഞ്ച് (സി.സി.ബി) പൊലീസ് അഞ്ച് കുപ്രസിദ്ധ അന്തർസംസ്ഥാന കുറ്റവാളികളെ അറസ്റ്റ് ചെയ്തു.കേരളത്തിലും കർണാടകയിലുമായി ഒന്നിലധികം കേസുകളില്‍ തിരയുന്ന അറസ്റ്റിലായ പ്രതികളില്‍നിന്ന് അനധികൃത തോക്കുകള്‍, വെടിക്കോപ്പുകള്‍, ഗണ്യമായ അളവില്‍ മയക്കുമരുന്ന് എന്നിവ കണ്ടെത്തി. മൂന്ന് പിസ്റ്റളുകള്‍, ആറ് ലൈവ് ബുള്ളറ്റുകള്‍, 12.895 കിലോഗ്രാം കഞ്ചാവ്, മൂന്ന് വാഹനങ്ങള്‍, നിരവധി മൊബൈല്‍ ഫോണുകള്‍ എന്നിവ പിടിച്ചെടുത്തു. ഇവയുടെ ആകെ മൂല്യം ഏകദേശം 40,50,000 രൂപയാണ്.

രഹസ്യ വിവരത്തിന്റെ അടിസ്ഥാനത്തില്‍ സി.സി.ബി പൊലീസ് നടേക്കല്‍ പ്രദേശത്ത് ഒരു സ്കോർപിയോ വാഹനം തടഞ്ഞുനിർത്തി കാസർകോട് ജില്ലയില്‍ താമസിക്കുന്ന നൗഫല്‍ (38), മൻസൂർ (36) എന്നിവരെ അറസ്റ്റ് ചെയ്തു. 14,60,000 രൂപ വിലമതിക്കുന്ന രണ്ട് പിസ്റ്റളുകള്‍, നാല് ലൈവ് ബുള്ളറ്റുകള്‍, വാഹനം എന്നിവ അധികൃതർ പിടിച്ചെടുത്തു. മയക്കുമരുന്ന് കടത്ത്, ക്രിമിനല്‍ ഭീഷണി എന്നിവയുമായി ബന്ധപ്പെട്ട് ഇവർക്കെതിരെ കേരളത്തില്‍ മുൻകാല ക്രിമിനല്‍ പശ്ചാത്തലമുണ്ട്.

കഞ്ചാവ് കള്ളക്കടത്ത് സംബന്ധിച്ച രഹസ്യ വിവരങ്ങളുടെ അടിസ്ഥാനത്തില്‍ അർക്കുള പ്രദേശത്ത് ചുവന്ന സ്വിഫ്റ്റ് കാർ പൊലീസ് തടഞ്ഞ് കാസർകോട് ജില്ലയില്‍നിന്നുള്ള അബ്ദുള്‍ ലത്തീഫിനെ (29) അറസ്റ്റ് ചെയ്തു. 12.895 കിലോഗ്രാം കഞ്ചാവും മൊബൈല്‍ ഫോണും വാഹനവും പൊലീസ് കണ്ടെടുത്തു. ഇവക്ക് 15,70,000 രൂപ വിലവരും. ഈയിടെയുണ്ടായ ഒരു വെടിവെപ്പിലും 2024ല്‍ ഉള്ളാളില്‍ നടന്ന മറ്റൊരു സംഭവത്തിലും പിസ്റ്റള്‍ വിതരണം ചെയ്തതുള്‍പ്പെടെ അനധികൃത തോക്ക് കേസുകളില്‍ അബ്ദുള്‍ ലത്തീഫിന് പങ്കുണ്ടെന്ന് പൊലീസ് പറഞ്ഞു.

ആയുധ നിയമപ്രകാരമുള്ള കുറ്റകൃത്യങ്ങള്‍, ആക്രമണം, കവർച്ച, കൊലപാതകശ്രമം, കൊലപാതകം എന്നിവയുള്‍പ്പെടെ കേരളത്തിലും കർണാടകയിലുമായി 13 മുൻ കുറ്റങ്ങള്‍ ഇയാള്‍ക്കെതിരെയുണ്ട്.വിശ്വസനീയമായ വിവരങ്ങളുടെ അടിസ്ഥാനത്തില്‍, തലപ്പാടിയിലെ ദേവിപുരക്ക് സമീപം ഒരു വെളുത്ത ഫോക്‌സ്‌വാഗണ്‍ പോളോ കാർ പൊലീസ് തടഞ്ഞുനിർത്തി കാസർകോട് ജില്ലയില്‍ താമസക്കാരായ മുഹമ്മദ് അസ്ഗർ (27), മുഹമ്മദ് സാലി (31) എന്നിവരെ അറസ്റ്റ് ചെയ്തു.ഒരു പിസ്റ്റള്‍, രണ്ട് മൊബൈല്‍ ഫോണുകള്‍, 10,20,000 രൂപ വിലമതിക്കുന്ന വാഹനം എന്നിവ കണ്ടെടുത്തു. ആക്രമണം, കവർച്ച, കൊലപാതകശ്രമം, മയക്കുമരുന്ന് വിതരണം എന്നിവയുള്‍പ്പെടെ 17 കേസുകള്‍ മുഹമ്മദ് അസ്ഗറിനെതിരെയും മയക്കുമരുന്ന് കടത്ത്, ആക്രമണം, കൊലപാതകശ്രമം, അനധികൃത മണല്‍കടത്ത് എന്നിവയുള്‍പ്പെടെ 10 കേസുകള്‍ മുഹമ്മദ് സാലിക്കെതിരെയും നിലവിലുണ്ട്.