വയനാട് പുനരധിവാസ വിവാദത്തിൽ കർണാടക മുഖ്യമന്ത്രി സിദ്ധരാമയ്യക്ക് മറുപടിയുമായി മുഖ്യമന്ത്രി പിണറായി വിജയൻ. സിദ്ധരാമയ്യയുടെ കത്തിന് മുഖ്യമന്ത്രി മറുപടി നല്കി. ഉരുൾപൊട്ടൽ പുനരധിവാസത്തിനായുള്ള ടൗൺഷിപ്പ് പദ്ധതി അന്തിമരൂപത്തിലാകുമ്പോൾ കർണാടകയെ അറിയിക്കാമെന്നാണ് അറിയിച്ചിട്ടുള്ളത്. സുതാര്യമായ രീതിയിൽ സ്പോൺസർ ഷിപ്പ് ഫ്രെയിം വർക്ക് തയ്യാറാക്കി വരുകയാണെന്നും വയനാട് ജില്ലയിലെ വൈത്തിരി താലൂക്കിൽ കണ്ടെത്തിയ രണ്ട് സ്ഥലങ്ങളിൽ ടൗൺ ഷിപ്പ് സ്ഥാപിച്ച് പുനരധിവാസം ആലോചിക്കുന്നുണ്ടെന്നും മുഖ്യമന്ത്രി കത്തിൽ പറയുന്നു.
കർണാടക സർക്കാരിൻ്റേതടക്കം എല്ലാ ഓഫറുകളും ഉറപ്പ് വരുത്തുമെന്നും പ്ലാനിൻ്റെ ഓരോ ഘട്ടവും ട്രാക്ക് ചെയ്യാവുന്ന രീതിയിലാണ് പദ്ധതി തയ്യാറാകുന്നതെന്നും വിശദാംശങ്ങൾ ഉടൻ അറിയിക്കുമെന്നും കർണാടക മുഖ്യമന്ത്രിയെ അറിയിച്ചു. വയനാട് ദുരന്തത്തിൽ 100 വീടുകൾ നിർമ്മിക്കാനാണ് കർണാടക സർക്കാർ അറിയിച്ചിരിക്കുന്നത്. സഹായം വാഗ്ദാനം ചെയ്ത കർണാടകയ്ക്ക് മുഖ്യമന്ത്രി നന്ദി അറിയിച്ചു.
