ബെംഗളൂരു: ഭാര്യ തന്നെ അടിമയായി കാണുന്നുവെന്ന പരാതിയുമായി യുവാവ് പോലീസ് സ്റ്റേഷനില്‍. കുറച്ച്‌ നാളുകള്‍ക്ക് മുമ്ബ് വിവാഹം കഴിഞ്ഞ ബെംഗളൂരുവിലെ സ്വകാര്യ കമ്ബനിയിലെ ജീവനക്കാരനാണ് യുവാവ്.
ഭാര്യ തന്നെ പലപ്പോഴായി മര്‍ദ്ധിക്കാറുണ്ടെന്നും എപ്പോഴും വില പിടിപ്പുള്ള സാധനങ്ങള്‍ വാങ്ങാന്‍ നിര്‍ബന്ധിക്കുന്നതായും യുവാവിന്റെ പരാതിയില്‍ പറയുന്നു. ഭാര്യയുടെ നിര്‍ബന്ധത്തിന് വഴങ്ങി സ്വകാര്യ ആവശ്യത്തിനായി ഒരു കാര്‍ വാങ്ങിച്ചു നല്‍കിയെന്നും യുവാവ് വ്യക്തമാക്കി.
കഴിഞ്ഞവര്‍ഷം ജനുവരിയിലായിരുന്നു ഇരുവരുടെയും വിവാഹം. അപ്പാര്ട്ട്മെന്റിലാണ് ഇരുവരും താമസിച്ചുവന്നത്. ഒരു ദിവസം രാത്രി പുറത്തുപോകണമെന്ന് ഭാര്യ ശാഠ്യം പിടിച്ചു. അപ്പാര്ട്ട്മെന്റിന്റെ താക്കോല്‍ ചോദിച്ചെങ്കിലും പുറത്തുപോകരുതെന്ന് യുവാവ് ഭാര്യയോട് ആവശ്യപ്പെട്ടു. ശേഷം യുവാവ് ഉറങ്ങാന്‍ കിടന്നപ്പോള്‍ ഭാര്യ കട്ടിലില്‍ കയറി തലയണകൊണ്ട് ശ്വാസം മുട്ടിക്കാന്‍ ശ്രമിച്ചുവെന്ന് പരാതിയില്‍ പറയുന്നു
ശ്വാസമെടുക്കാന്‍ ബുദ്ധിമുട്ടിയതോടെ ഭാര്യയെ തള്ളിമാറ്റിയതായും ഇതോടെ നെഞ്ചിലും വയറിലും മാന്തുകയും കടിക്കുകയും ചെയ്തതായി യുവാവ് പരാതിയില്‍ പറയുന്നു. വഴക്ക് രൂക്ഷമായതോടെ ഇരുവരും പോലീസിനെ വിളിക്കുകയും തുടര്‍ന്ന് രണ്ടുപേര്‍ക്കും കൗണ്‍സലിങ് നല്‍കുകയും യുവാവിനെ ആശുപത്രിയില്‍ പ്രവേശിപ്പിക്കുകയും ചെയ്തു.
ആവശ്യപ്പെട്ടതെല്ലാം നല്‍കിയിട്ടും ഭാര്യ തനിക്കെതിരെ പോലീസ് സ്റ്റേഷനില്‍ സ്ത്രീധന പീഡനപരാതി നല്‍കിയെന്നും പിന്നീട് കോടതിയില്‍ നിന്നും മുന്‍കൂര്‍ ജാമ്യമെടുക്കുകയായിരുന്നുവെന്നും പരാതിയില്‍ പറയുന്നു. അതേസമയം, ദമ്ബതികളുടെ പരാതികളില്‍ അന്വേഷണം നടത്തുകയാണെന്നും പ്രശ്ന പരിഹാരത്തിനായി ഇരുവരെയും കൗണ്‍സലിങ്ങിന് വിധേയമാക്കിയതായും മുതിര്‍ന്ന പോലീസ് ഉദ്യോഗസ്ഥന്‍ അറിയിച്ചു.
