ബെംഗളൂരു: ഐടി നഗരമായ ബെംഗളൂരുവിന് പുറത്തേക്ക് വികസനം വ്യാപിപ്പിക്കാനൊരുങ്ങി കർണാടക സർക്കാർ. ബെംഗളൂരുവിന് പുറത്തുള്ള നഗരങ്ങളിലെ നിക്ഷേപങ്ങള് പ്രോത്സാഹിപ്പിക്കുന്നതിനായി ‘വിഷൻ ബിയോണ്ട് ബെംഗളൂരു’ പദ്ധതി സർക്കാർ കൊണ്ടുവരുമെന്ന് മുഖ്യമന്ത്രി ഡി കെ ശിവകുമാർ പ്രഖ്യാപിച്ചു.ഇതിനായി ലോകോത്തര ഓഫീസ്, അടിസ്ഥാന സൗകര്യങ്ങള് വളരെ താങ്ങാവുന്ന വിലയില് വാഗ്ദാനം ചെയ്യും. ചതുരശ്ര അടിക്ക് 50 സെന്റ് വിലയ്ക്ക് മറ്റ് നഗരങ്ങളില് ഓഫീസ് സ്ഥലം ഉള്പ്പെടെയാണ് ഒരുക്കുകയെന്ന് മുഖ്യമന്ത്രി പറഞ്ഞു.കർണാടകയിലെ മറ്റ് നഗരങ്ങളിലെ ഓഫീസ് സ്ഥലം ചതുരശ്ര അടിക്ക് 50 സെന്റ് എന്ന കുറഞ്ഞ നിരക്കില് നല്കും. സംസ്ഥാനത്തിന്റെ അടുത്ത ഘട്ട വളർച്ച രൂപപ്പെടുത്തുന്നതില് കർണാടക സർക്കാരുമായി പങ്കാളികളാകാൻ വ്യവസായ പ്രമുഖരോട് ആഹ്വാനം ചെയ്തുവെന്നും മുഖ്യമന്ത്രി ശിവകുമാർ പറഞ്ഞു.
പരിസ്ഥിതി വ്യവസ്ഥ, ചെലവ് എന്നിവ കാരണം കമ്പനികള് ബെംഗളൂരുവിനെയാണ് ഇഷ്ടപ്പെടുന്നത്. എന്നാല് വികസനം ബെംഗളൂരുവില് മാത്രം ഒതുങ്ങി നില്ക്കരുതെന്നും മൈസൂരു, ഹുബ്ബള്ളി – ധാർവാഡ്, മംഗളൂരു, ബെലഗാവി തുടങ്ങിയ നഗരങ്ങള് പ്രധാന സാങ്കേതികവിദ്യ, നിക്ഷേപ കേന്ദ്രങ്ങളായി ഉയർന്നുവരണമെന്നും മുഖ്യമന്ത്രി പറഞ്ഞു.നഗരത്തിലെ സിഇഒ സമൂഹവുമായുള്ള ഒരു യോഗത്തില് സംസാരിക്കുകയായിരുന്നു അദ്ദേഹം.കർണാടകയുടെ സോഫ്റ്റ്വെയർ കയറ്റുമതി 4.36 ലക്ഷം കോടി രൂപ കവിഞ്ഞതായും ഈ വർഷം ഇത് 5.5 ലക്ഷം കോടി രൂപ കവിയുമെന്നും മുഖ്യമന്ത്രി പറഞ്ഞു. കർണാടകയിലെ ആഗോള ശേഷി കേന്ദ്രങ്ങള് ബാക്ക് ഓഫീസുകളില് നിന്ന് ഇന്നൊവേഷൻ, ഉല്പ്പന്ന വികസനം, ഉയർന്ന മൂല്യമുള്ള ജോലി എന്നിവയുടെ കേന്ദ്രങ്ങളായി പരിണമിച്ചിട്ടുണ്ടെന്നും ഇന്ത്യയുടെ ഓഫീസ് വിപണി സ്വാംശീകരണത്തില് ബെംഗളൂരു തുടർന്നും നേതൃത്വം നല്കുന്നുണ്ടെന്നും മുഖ്യമന്ത്രി ഡികെ ശിവകുമാർ പറഞ്ഞു.ഡീപ്ടെക്, ഡിജിറ്റല് ഇൻഫ്രാസ്ട്രക്ചർ, ഗവേഷണം, വ്യവസായ – അക്കാദമിക് സഹകരണം, സംരംഭകത്വം എന്നിവയില് ശ്രദ്ധ കേന്ദ്രീകരിച്ച് പുതിയ ഐടി, ബഹിരാകാശ സാങ്കേതികവിദ്യ, സ്റ്റാർട്ടപ്പ് നയങ്ങള് സർക്കാർ ഇതിനകം പുറത്തിറക്കിയിട്ടുണ്ടെന്ന് അദ്ദേഹം പറഞ്ഞു.
വളർന്നുവരുന്ന സാങ്കേതികവിദ്യകളുടെ വാണിജ്യവല്ക്കരണം ത്വരിതപ്പെടുത്തുന്നതിനായി കർണാടക നടപടികളും സ്വീകരിച്ചിട്ടുണ്ട്.വ്യവസായവുമായി സഹകരിച്ച് കർണാടക ഒരു എഐ സർവകലാശാല നിർമിക്കുന്നുണ്ടെന്ന് ശിവകുമാർ പറഞ്ഞു. ഈ സംരംഭത്തെക്കുറിച്ച് ഗൂഗിളുമായി വിശദമായ ചർച്ചകള് നടത്തിയതായും വ്യവസായങ്ങള് നേതൃത്വം വഹിക്കാൻ ആഹ്വാനം ചെയ്തതായും ഓർമ്മിപ്പിച്ചു. ആറാം ക്ലാസ് മുതല് ഗ്രാമീണ വിദ്യാർത്ഥികള്ക്ക് എഐ വിദ്യാഭ്യാസം പരിചയപ്പെടുത്തുകയെന്ന കാഴ്ചപ്പാടോടെ, പഠനം, നവീകരണം, സഹകരണം, പൊതു ഡിജിറ്റല് ആക്സസ് എന്നിവയ്ക്കുള്ള ഒരു കേന്ദ്രമായി സർവകലാശാല പ്രവർത്തിക്കുമെന്ന് അദ്ദേഹം പറഞ്ഞു.
ഭൂമി, വൈദ്യുതി, ജലം, കണക്റ്റിവിറ്റി, പുനരുപയോഗ ഊർജ്ജം എന്നിവയുടെ പിന്തുണയോടെ പരിസ്ഥിതി സൗഹൃദ ഡിജിറ്റല് അടിസ്ഥാന സൗകര്യങ്ങള് സൃഷ്ടിക്കുക എന്ന ലക്ഷ്യത്തോടെ ബെംഗളൂരു റോബോട്ടിക്സ് ആൻഡ് ഇന്നൊവേഷൻ സോണും സുസ്ഥിര ഡാറ്റാ സെന്റർ നയം 2026-31 ഉം മുഖ്യമന്ത്രി ഡികെ ശിവകുമാർ പ്രഖ്യാപിച്ചു.അടിസ്ഥാന സൗകര്യങ്ങള്, ക്ലാസ് മുറികള്, അധ്യാപക പരിശീലനം, പഠന ഫലങ്ങള് എന്നിവ മെച്ചപ്പെടുത്തുന്നതിനായി കമ്പനികള് അവരുടെ കോർപറേറ്റ് സോഷ്യല് റെസ്പോണ്സിബിലിറ്റി (സിഎസ്ആർ) പ്രോഗ്രാമുകള്ക്ക് കീഴില് ഓരോ സർക്കാർ സ്കൂള് വീതം ദത്തെടുക്കണമെന്ന് മുഖ്യമന്ത്രി ആവശ്യപ്പെട്ടു. നവംബർ 17 മുതല് 19 വരെ ബാംഗ്ലൂർ ഇന്റർനാഷണല് എക്സിബിഷൻ സെന്ററില് നടക്കാനിരിക്കുന്ന ബെംഗളൂരു ടെക് ഉച്ചകോടിയില് പങ്കെടുക്കാൻ സിഇഒമാരെ ക്ഷണിച്ചു.
