മുംബൈയില് വിദ്യാർഥി പ്രതിഷേധങ്ങള് കത്തിപ്പടരുന്നതിനിടെ ഒരു യുവതിയുടെ ഒറ്റയാള് പോരാട്ടത്തിന്റെ ചിത്രവും വീഡിയോയുമാണ് ഇപ്പോള് രാജ്യ ശ്രദ്ധയാകർഷിക്കുന്നത്.ദാദറിലെ ശിവാജി പാർക്കിന് സമീപം നടന്ന പ്രക്ഷോഭത്തില് നിന്ന് അറസ്റ്റ് ചെയ്ത പ്രതിഷേധക്കാരുമായി പോയ പോലീസ് ബസ് തടഞ്ഞുനിർത്തിയ ഇരുപത്തേഴുകാരിയായ റിയ ആഹിറാണ് ഈ സമരത്തിന്റെ ഏറ്റവും പുതിയ മുഖമായി മാറിയിരിക്കുന്നത്.മോഡലും അഭിനേത്രിയും സംരംഭകയുമായ റിയ, അറസ്റ്റിലായവരെ കൊണ്ടുപോകാൻ അനുവദിക്കില്ലെന്ന് പ്രഖ്യാപിച്ച് പതറാതെ പോലീസ് വാഹനത്തിന് കുറുകെ നില്ക്കുകയായിരുന്നു.കോഹിനൂർ സ്ക്വയറില് നിന്ന് ശിവാജി പാർക്കിലേക്ക് നടക്കുന്നതിനിടയിലാണ് കസ്റ്റഡിയിലെടുത്ത പ്രക്ഷോഭകരുമായി പോകുന്ന പോലീസ് വാഹനം റിയയുടെ ശ്രദ്ധയില്പ്പെടുന്നത്.വാനിനുള്ളില് നിന്ന് ഉയർന്ന മുദ്രാവാക്യങ്ങള് കേട്ടതോടെ പ്രതികരിക്കാതിരിക്കാൻ കഴിയാതെ വന്ന റിയ, മഴയും സംഘർഷഭരിതമായ അന്തരീക്ഷവും വകവെക്കാതെ വാഹനത്തിന് മുന്നിലേക്ക് കുതിച്ചെത്തുകയായിരുന്നു.പോലീസിന്റേത് തെറ്റായ നടപടിയാണെന്ന് ഉറക്കെ വിളിപ്പറഞ്ഞ റിയയുടെ ഈ ധീരമായ പ്രതിരോധത്തിന് മുന്നില് ഒടുവില് അധികൃതർക്ക് വഴങ്ങേണ്ടി വരികയും, കസ്റ്റഡിയിലുണ്ടായിരുന്നവരെ സംഭവസ്ഥലത്തു വച്ചുതന്നെ മോചിപ്പിക്കുകയും ചെയ്തു.വിദ്യാർഥി പ്രതിനിധിയല്ലെങ്കിലും പരീക്ഷാ ക്രമക്കേടുകള്ക്കെതിരെയും അധികൃതരുടെ ഏകപക്ഷീയമായ നടപടികള്ക്കെതിരെയും തെരുവില് പോരാടുന്ന യുവതലമുറയ്ക്ക് റിയ പൂർണ പിന്തുണ പ്രഖ്യാപിച്ചു.ഭരണകൂടത്തിന്റെ അതിക്രമങ്ങള്ക്കെതിരെ ഒറ്റയ്ക്ക് പോരാടിയ റിയയുടെ ഈ ദൃശ്യങ്ങള് ഇന്ന് പൗരബോധത്തിന്റെയും ധീരതയുടെയും പ്രതീകമായി സോഷ്യല് മീഡിയയിലും മാധ്യമങ്ങളിലും വ്യാപകമായി പ്രചരിക്കുകയാണ്.
“അവരെ വിട്ടയക്കാതെ വണ്ടി മുന്നോട്ട് പോകില്ല!”; മുംബൈയെ പ്രകമ്പനം കൊള്ളിച്ച് റിയ ആഹിറിന്റെ ധീരത
