ബംഗളൂരു: ദാമ്പത്യ ജീവിതത്തില്‍ ഭാര്യയുടെ കുടുംബാംഗങ്ങള്‍ നിരന്തരം ഇടപെടുന്നുവെന്ന വിരോധത്തില്‍ ഭാര്യയെയും ആറ് ബന്ധുക്കളെയും കാബ് ഡ്രൈവര്‍ ക്രൂരമായി കൊലപ്പെടുത്തി.ബംഗളൂരു രാജാജിനഗര്‍ സ്വദേശിയായ ഇന്ദുശേഖര്‍ എന്നയാളാണ് ഈ ദാരുണമായ കൂട്ടക്കൊലപാതകം നടത്തിയത്. ഇരുപത് വര്‍ഷത്തോളമായി വിവാഹിതരായ ഇന്ദുശേഖറും ഭാര്യ സുനിതയും തമ്മില്‍ വര്‍ഷങ്ങളായി കുടുംബപ്രശ്‌നങ്ങള്‍ നിലനിന്നിരുന്നു. തങ്ങളുടെ പ്രശ്‌നങ്ങളില്‍ സുനിതയുടെ അമ്മയും സഹോദരങ്ങളും ഭാര്യയെ പിന്തുണയ്ക്കുന്നതില്‍ ഇയാള്‍ക്ക് കടുത്ത അമര്‍ഷമുണ്ടായിരുന്നുവെന്ന് പോലീസ് പറഞ്ഞു.കുടുംബ വഴക്കുകള്‍ പരിഹരിക്കാന്‍ ബന്ധുക്കള്‍ നിരന്തരം ശ്രമിച്ചിരുന്നെങ്കിലും ഇന്ദുശേഖറിന്റെ ഉള്ളില്‍ പക വളരുകയായിരുന്നു.
തന്റെ ജീവിതം തകര്‍ക്കുന്നത് ഭാര്യയുടെ വീട്ടുകാരാണെന്ന സംശയമാണ് ക്രൂരമായ കൊലപാതകത്തിലേക്ക് നയിച്ചതെന്ന് പോലീസ് സംശയിക്കുന്നു. പദ്ധതിപ്രകാരം സുനിതയെയാണ് ഇയാള്‍ ആദ്യം കൊലപ്പെടുത്തിയത്. ആട്ടുകല്ല് കൊണ്ട് തലയ്ക്കടിച്ചാണ് സുനിതയെ ഇന്ദുശേഖര്‍ വധിച്ചതെന്ന് പ്രാഥമിക അന്വേഷണ റിപ്പോര്‍ട്ടുകള്‍ വ്യക്തമാക്കുന്നു.കൊലപാതകത്തിന് ശേഷം സുനിതയുടെ മൃതദേഹം ഇയാള്‍ നന്തി ഹില്‍സ് മേഖലയില്‍ കൊണ്ടുപോയി തള്ളുകയായിരുന്നു. അയല്‍ക്കാര്‍ക്ക് സംശയം തോന്നാതിരിക്കാന്‍ ഭാര്യ കൂട്ടുകാരോടൊപ്പം യാത്ര പോയതാണെന്നും ഫോണ്‍ സ്വിച്ച്‌ ഓഫ് ആണെന്നുമാണ് ഇയാള്‍ പറഞ്ഞത്. അതിനുശേഷം വളരെ ആസൂത്രിതമായാണ് ഭാര്യയുടെ മറ്റു ബന്ധുക്കളെ ഓരോരുത്തരായി ഇയാള്‍ തന്റെ വീട്ടിലേക്ക് വിളിച്ചുവരുത്തിയത്.
അടുത്ത ദിവസം മദ്യപിക്കാമെന്ന് പറഞ്ഞ് ഭാര്യയുടെ സഹോദരന്മാരായ ശിവകുമാറിനെയും ശങ്കറിനെയും ഇയാള്‍ വീട്ടിലേക്ക് ക്ഷണിച്ചു.വീട്ടിലെത്തിയ ഇവരെ രണ്ടുപേരെയും ഇന്ദുശേഖര്‍ തന്ത്രപരമായി വധിക്കുകയായിരുന്നു. പിന്നീട് ഇവരുടെ ഭാര്യമാരായ നളിനി, ദിവ്യ, ഭാര്യാമാതാവ് രൂപവതി, ശങ്കറിന്റെ ഏഴു വയസ്സുള്ള മകന്‍ പുനീത് എന്നിവരെയും ഓരോരുത്തരായി വീട്ടിലേക്ക് വിളിച്ചുവരുത്തി കൊലപ്പെടുത്തി. ആര്‍ക്കും സംശയം തോന്നാത്ത രീതിയില്‍ ഒന്നിനു പുറകെ ഒന്നായി കൊലപാതകം നടത്തുകയായിരുന്നു. തെളിവ് നശിപ്പിക്കുന്നതിന്റെ ഭാഗമായി മൃതദേഹങ്ങള്‍ പല സ്ഥലങ്ങളിലായി ഇയാള്‍ കൊണ്ടുപോയി തള്ളി.രക്തക്കറകള്‍ മായ്ക്കാന്‍ ഇന്ദുശേഖര്‍ വീട് രാസവസ്തുക്കള്‍ ഉപയോഗിച്ച്‌ പൂര്‍ണ്ണമായും വൃത്തിയാക്കി.
കൊലപാതകത്തിന് ഉപയോഗിച്ച ആട്ടുകല്ലും ഇയാള്‍ കെമിക്കല്‍ ഉപയോഗിച്ച്‌ കഴുകി സൂക്ഷിച്ചിരുന്നു. കൃത്യത്തിന് ശേഷം മൃതദേഹങ്ങള്‍ കടത്താന്‍ ഉപയോഗിച്ച കാറും കൊലപാതകത്തിന് ഉപയോഗിച്ച ആട്ടുകല്ലും പോലീസ് കസ്റ്റഡിയിലെടുത്തു. വധിക്കപ്പെട്ട നളിനിയുടെ അമ്മ നല്‍കിയ കാണാതായെന്ന പരാതിയിലാണ് പോലീസ് അന്വേഷണം ആരംഭിച്ചത്.സംശയത്തിന്റെ അടിസ്ഥാനത്തില്‍ ഇന്ദുശേഖറിനെ കസ്റ്റഡിയിലെടുത്ത് ചോദ്യം ചെയ്തതോടെയാണ് ഞെട്ടിക്കുന്ന സത്യങ്ങള്‍ പുറത്തുവന്നത്. ചോദ്യം ചെയ്യലില്‍ പരസ്പരവിരുദ്ധമായ മറുപടികള്‍ നല്‍കിയ ഇയാള്‍ പിന്നീട് കുറ്റം സമ്മതിക്കുകയായിരുന്നു. തുടര്‍ന്ന് ഇയാളെയും കൂട്ടി നന്തി ഹില്‍സില്‍ നടത്തിയ തെരച്ചിലില്‍ ഏഴു വയസ്സുകാരന്‍ പുനീറ്റിന്റെ മൃതദേഹം കണ്ടെടുത്തു. മറ്റു മൃതദേഹങ്ങള്‍ക്കായി പോലീസ് വിവിധയിടങ്ങളില്‍ തെരച്ചില്‍ ഊര്‍ജ്ജിതമാക്കിയിട്ടുണ്ട്.വര്‍ഷങ്ങളായി നിലനിന്നിരുന്ന കുടുംബപ്രശ്‌നങ്ങളാണ് കൊലപാതകത്തിലേക്ക് നയിച്ചതെന്ന് പ്രതി ചോദ്യം ചെയ്യലില്‍ അവകാശപ്പെട്ടു.
കൊലപാതകത്തില്‍ ഇയാള്‍ക്ക് പുറമേ മറ്റാര്‍ക്കെങ്കിലും പങ്കുണ്ടോയെന്നും പോലീസ് പരിശോധിച്ചു വരികയാണ്. പ്രതിയുടെ മകള്‍ക്ക് ഇതില്‍ എന്തെങ്കിലും പങ്കുണ്ടോ എന്ന കാര്യത്തിലും അന്വേഷണം നടക്കുന്നുണ്ട്. ദാരുണമായ ഈ സംഭവം കര്‍ണാടകയില്‍ വലിയ നടുക്കമാണ് സൃഷ്ടിച്ചിരിക്കുന്നത്.സംഭവത്തില്‍ പ്രതികരണവുമായി കര്‍ണാടക മന്ത്രി പ്രിയങ്ക് ഖാര്‍ഗെ രംഗത്തെത്തി. വളരെ ദൗര്‍ഭാഗ്യകരമായ സംഭവമാണ് നടന്നിരിക്കുന്നതെന്നും കുടുംബത്തിനുള്ളില്‍ തന്നെ മുന്‍കൂട്ടി ആസൂത്രണം ചെയ്തതാണ് ഈ കൊലപാതകങ്ങളെന്നും അദ്ദേഹം പറഞ്ഞു. വധിക്കപ്പെട്ടവരുടെ മൃതദേഹങ്ങള്‍ സംസ്ഥാനത്തിന്റെ വിവിധ ഭാഗങ്ങളിലാണ് പ്രതി ഉപേക്ഷിച്ചിട്ടുള്ളത്. പ്രതിയുടെ മാനസിക നിലയെക്കുറിച്ച്‌ വ്യക്തമായ അന്വേഷണം നടത്തുമെന്നും പോലീസ് അന്വേഷണം പുരോഗമിക്കുകയാണെന്നും മന്ത്രി വ്യക്തമാക്കി.
